1 Yesu viyakomeleze kugalonga gose gago kwa wanhu wakalile womtegeleza, kaita Kapelenaumu. 2 Na mtumigwa imwe yakalile Mkulu wa bumbila da jeshi wa Kilumi iyo yakalile na wende nayo, kakala mtamu ng'hani behi na kudanganika. 3 Iyo Jemedali viyahulike mbuli za Yesu, kawalagiza Wavele wa Kiyahudi waite kumpula Yesu yaite kumhonya ija mtumigwa wake. 4 Viwavikile kwa Yesu wampula ng'hani yamtaze ija Jemedali walonga, "Munhu ino kweli kolondeka yatazigwe mbuli ino na gweye. 5 Kwa vija iyo kowatogola wanhu wetu, ivija kachizengela kae ya kuiting'hanila."

6 Ivo Yesu kailongoza nawo. Viyawile behi na kuvika muikae ya ija Jemedali, ija afisa kalagiza mbwiga zake kumwake walonga, "Mndewa, seke ugae. Manake niye sifaya hata gweye wingile muikae yangu, 7 ivo nie mwenyego niiyona silondeka hata kwiza kumwako. Mbali longa mbuli imwe kumwake nayo mtumigwa wangu kohona. 8 Manake niye mwenyego nna mkulu wangu, na ivija nna wamilizi weli hasi yangu wonitegeleza malagizo gangu. Nihamlongela imwe ‘Genda!’ Nayo koita, nihamlongela imwenga ‘Izo hano!’ Nayo kokwiza; na iyo mtumigwa wangu, ‘Sang'hana chinhu chino!’ Nayo kosang'hana.’'

9 Yesu viyahulike mbuli izo kakanganya, amala kadihindukila bumbila da wanhu wakalile womuwinza, "Nowalongeleni, sinaiona nhogoli ng'hulu kama ino, hata mui Izilaeli!’'

10 Na waja wanhu wakalile walagizigwe kwa Yesu viwabwelile ukae wamvika ija mtumigwa kahona.

11 Chipindi chidodo vichibitile, Yesu kaita muikae imwe yokemigwa Naini, kuno yailongoze na waluko wake na bumbila kulu da wanhu diwawinza. 12 Viyawile behi na kuvika kudilango kulu da ija kae, wanhu wakalile woita kuwanda mwana wa mgane wakala wolawa kunze muikae. Mwana iyo wa chilume yadanganike kakala mwana waiyeka wa mami iyo mgane, na bumbila kulu da wanhu dikala hamwe na mgane iyo. 13 Mbali Mndewa Yesu viyamonile ija mgane kamonela bazi, kamlongela "Sekeulile." 14 Amala kadigendela komwa na kujamha, na waja wose wadipapile wema. Yesu kalonga, "Gombwanga, nokulongela lamka wime!" 15 Ija munhu yakalile kadanganika kalamuka kakala na kasonga kulonga, nayo Yesu kamwing'ha mami yake iyo mwana.

16 Wanhu wose wazaganyika na wamtogola Mulungu. walonga, "Lelo mlagusi mkulu wa Mulungu kachizila, Mulungu keza kuhonya wanhu wake!"

17 Mbuli ino yenela Yudea yose na mziisi zili behibehi.

18 Waluko wa Yohana Mbatizi viwamulongele mbuli yose viilawile, kawakema waidi wao 19 na kawalagiza wao wakamuuze Yesu, "Ivo gweye iyo ija Yohana yachilongele kokwiza, hebu chimbetele imwenga?"

20 Na waja waluko wake viwavikile kwa Yesu wamlongela, "Yohana imbatizaji kachilagiza chize chikuuze, ‘Gweye iyo ija yokwiza hebu chimlolele imwemga?’"

21 Muumsimo uwo uwo Yesu kawahonya wanhu wengi weli na vitamu na kawalava wambule vinyamkela, na weli vipofu wengi walola. 22 Ivo kawedika waja wasenga wa Yohana, "Mbweleganye kwa Yohana mkamlongele gaja gamuonile na kugahulika, vipofu wolola na mbetembete wogenda na waja weli na dikulu kuhonyigwa na kwing'higwa nyafasi ya kumfugamila Mulungu na mswamagutwi wohulika, na wafile wozilibuligwa, na Usenga Unogile wofundigwa kwa vikumbi muyega. 23 Kamweda munhu ija yonitogola nie!"

24 Ivo wasenga waja wa Yohana viwasegele, Yesu kasonga kudilongela dija bumbila da wanhu kwa mbuli ya Yohana, "Vumuitile kuchiwala muita kulola choni? Ivo muita kulola gaja madete gahembelusigwa na beho? 25 Ama muita kuchiwala kulola choni? Hebu ija munhu yavalile vivalo vinogile ng'hani? Mvimanye kua wanhu wavalaga vivalo vinogile, wao wokala mzikae za Wafaume. 26 Ivo nowauzeni, mweye muita kulola choni? Muita kumlola Mlagusi wa Mulungu? Enaa, mbali mulola gamwenga mengi kubita ulagusi. 27 Ino iyo mbuli zake zandikigwa mmayandiko, ‘Mulungu kalonga, lola nomgala msenga wangu yakulongolele yakakutandile nzila.’ 28 Yesu kagangamiza kulonga, "Yohana iyo munhu mkulu kubita wose. Hataivo ija yeli mdodo muufaume wa Mulungu ni mkulu kubita Yohana.

29 Wanhu wose mbaka wagoga kodi viwahulike mbuli izo wasonga kumtogola Mulungu kwa unovu wake na wabatizigwa na Yohana. 30 Mbali Mafalisayo na Wafunda shalia hawautogole usenga uja wa Mulungu kwa kulema kubatizigwa na Yohana.

31 Yesu kagendelela kulonga, "Manye niwalinge na chinhu gani wanhu wa ulelo uno? Mmanye walinga choni? 32 Wao walinga kama wana wadodo wakalile mdigulilo wokema wayao na wowalongela, ‘Chiwatowela vibundo va lusona mbali hamvinile! chiwembila nyila za giogio mbali hamlilile!’ 33 Kwa vija Yohana imbatizi keza, na kakala hoja hebu kung'wa divai kuno yopula chila mala, wanhu walonga kambula kinyamkela. 34 Mwana wa munhu keza, nayo koja na kung'wa, na mweye molonga, ‘Mloleni ino! Mmelo na mng'waji upele, mbwiga wa wagoga kodi na waja weli na malozo! 35 Nzewele ya Mulungu zooneka kweli kwa waja wose wozitogola."

36 Zua dimwe Mfalisayo kamgoneka Yesu waje hamwe ndia ya ichilo, nayo Yesu kaita kuikae yake kakala hasi yaje. 37 Na muikae ija hakala na muke imwe yakalile na malozo. Viyahulike Yesu koja muikae ya Falisayo keza na nhyupa yake imemile mavuta gonung'ila 38 na kainamila haukisogo ha magulu ga Yesu, kuno kolila na mahozi gake gosulula mmagulu ga Yesu.Iyo meke kaihangusa migulu ya Yesu kwa mvili zake, amala kainonela na kuihaka na mavuta ganhung'ile. 39 Ija Falisayo yamgoneke Yesu viyaonile gaja, kailongela mwenyego mmoyo, "Maza munhu ino yahawile Mlagusi wa Mulungu, yahavimanyile yelihi yomwanha na muke ino kavilihi na ivija kana malozo!"

40 Yesu kamwidika kamlongela, "Simoni, nna mbuli nolonda nikulongele."

Nayo Simoni kedika,"Enaa mfundaji, nongele."

41 "Hakala na wanhu waidi wakopile sente kwa munhu yokopesha," Yesu kalonga, "Imwe kakopeshigwa dinali mia tano, zoilinga na chitumetume na munhu cha mazua hamsini, imwenga kakopeshigwa dinali, zoilinga na chitumetume cha munhu cha mazua hamsini. 42 Viwapotigwe kubweleza sente zake, kawalekesela wose waidi. Vuuona yelihi yonda yawe na wende ng'hani na Munhu iyo?"

43 Simoni kamwidika, "Nogesa munhu ija yalekeseligwe deni nyingi iyo yeli na wende ng'hani na iyo yokopesha.

Yesu kamwidika, "Kulonga goya." 44 Amala kamhindukila ija muke, na kamulongela Simoni, "Kumuona muke ino? Niza muikae yako na huning'ile mazi ga kusunha magulu gangu, mbali ino kanisunha magulu gangu kwa mahozi gake na kunihangusa kwa mvili zake. 45 Gweye hunilamse kwa kunihagatila mbali ino muke halekile kuninonela magulu gangu tangia niingile. 46 Hunibakile ditwi jangu mavuta, mbali muke ino kanibaka magulu gangu gose mafuta gakunung'ila. 47 Ivo nokulongela, wende mkulu uyatendile muke iyo, wolagusa kua kalekeseligwa malozo gake mengi. Mbali kama kulekeseligwa malozo madodo kolagusa wende mdodo."

48 Yesu kamhindukila ija imuke,kamlongela "Kulekeseligwa malozo gako."

49 Baho waja wanhu wamwenga wakalile hamwe nayo mui ndia wasonga kuiuza wenyego, "Yelihi ino yodaha kuwalekesela wanhu malozo?"

50 Yesu kamlongela ija muke, "Nhogoli yako ikulohola, genda kwa utindiwala."