1 Mdizua dimwe da kuhumula Yesu viyagonekigwe kuja ndia muikae ya munhu imwe mkulu wa Mafalisayo, wanhu wakala womsepa. 2 Haulongozi ha Yesu hakala na mtamu imwe yavimbile lukuli wose. 3 Yesu kawauza wafundaji wa shalia na waja Mafalisayo, "Ivo vinoga kumhonya munhu mdizua da kuhumula da hebu havinogile?"

4 Wao wose wanyamala hupii. Baho Yesu kamgoga mkono na kamuhonya, amala kamlongela yaite kumwake. 5 Amala Yesu kawauza, Yalihi mmwenu kama mwanage hebu ng'ombe wake yahengile mdikombo, honda yamlave mdizua ijo da kuhumula seke yatende hima kumlava hata ihawa mdizua da kuhumula?"

6 Nao hawapatile da kulonga kwa mbuli iyo.

7 Yesu viyawaonile waja wagonekigwe wosagula vigoda va haulongozi kawalongela mfano uo, kalonga, 8 Kama kulongeligwa wize mdizengele, seke ukale chigoda cha wahenga, manake vodahika kekiligwa mkulu kubita gweye, 9 na ihawa io yawalongele mweye mwize mdizengele, kowiza na kukulongela, ‘Segela mchigoda chako yakale muhenga ino.’ Amala gweye koita kukala kuchisogo kwa chinyala. 10 Mbali wahagonekigwa mdizengele kala vigoda vili kukisogo, ili yaheza ija yakugoneke, yakukeme, ‘Mbwigaangu genda ukale chigoda cha haulongozi ng'hani,’ Baho kopata nhogolwa hawanhu wose wokulola. 11 Manake chila munhu yoitenda mkulu, kotendigwa mdodo, na iyo yaitendile mdodo kutendigwa iyo mkulu."

12 Amala Yesu kamlongela ija munhu yawagoneke mdizengele, vuuteleka ndia ya imisi hebu ichilo, seke uwagoneke mbwiga zako hebu wayago hebu wayago weli na uzenzi, wahatenda ivo, manake wao wokutendela ivo na gweye, mbuli yokua kama yakuiliha. 13 Mbali chila vuutanda ndia ya lusona, wakeme ivija na vikumbi muyega, weli na nhale na vipofu, 14 nagweye komweda kwa vuuwakemile waja vikumbi muyega, kwavija wabule ludabwa wa kukubwelezela, ivo kobwelezeligwa na Mulungu chipindi chonda wazilibuke wanhu watogoligwe.

15 Baho viyahulike gago munhu imwe yakalile na Yesu muindia, kalonga, "Kamweda munhu ija yonda yaje ndia mulusona lwa Ufaume wa Mulungu!"

16 Yesu kamwidika, munhu imwe katanda lusona mkulu, kawagoneka wanhu wengi. 17 Chipindi cha lusona vichivikile, iyo munhu kamlagiza mtumigwa wake yakawagoneke waja wose wagonekigwe lusona, ‘Izoni chila chinhu chitandigwa goya!’ 18 Mbali waja wanhu chila munhu kasonga kulava masolo, yalongole kalonga mtumigwa, niye nigula mgunda nonda niite kuulola, nokupula seke unihile.’ 19 Imwenga nayo ivija kalonga, ‘Nigula ng'ombe walimi jozi tano, nonda niite kuwageza; nokupula seke unihile.’ 20 Nayo imwenga kalonga, ‘Niye mhosa mwehe wangu na kwa mbuli io sidaha kwiza.’ 21 Ija mtumigwa kabwela kwa mndewa wake na kumlongela, mbuli zose vizili. Baho ija mndewa kagevuzika, kamlagiza ija mtumigwa wake kaidi kamlongela, ‘Lawa hano lopola uite muinzila na mja mvibululu vose va kae, wize nao hano vikumbi muyega na weli na nhale na vipofu.’ 22 Ija mtumigwa kamlongela Mndewa, ‘Gose gaulonga gamala kutendeka kama vuunilagize, ivo ing'hali nyafasi yakukala wanhu muing'anda ya lusona.’ 23 Mndewa ija kamlongela mtumigwa wake, lawa hanze uite muinzila na mzimhaka, ukawaseseze weze kwingila mgati kae yangu imeme. 24 Manake nowalongela kua, mwa waja wose niwagoneke walema, habule hata munhu imwe honda yailanze ndia yangu!’ "

25 Mabumbila makulu ga Wanhu gakala goita hamwe na Yesu, nayo kagahindukila kawalongela, 26 "Munhu yoyose yonda kua Mwaluko wangu kolondeka yanigese nie badili ya kuwagesa tati yake hebu mami yake hebu mwehe wake na wanage, hebu na wakulu wake na lumbu zake, enaa, hata ugima wake mwenyego, kama hatendile ivo hadaha kua mwaluko wangu. 27 Munhu yoyose kama hatogola kudununzika na kufa kwa kuniwinza hadaha kua Mwaluko wangu. 28 Manake yalihi kumwenu yahalonda kuzenga ng'anda ng'hulu, na seke yakale hasi na kulola goya udahi wake wa sente yeli nazo kumanya kama kodaha kukomeleza kuzenga? 29 Manake yahazenga ng'anda ya tofali yahapotigwa kukomeleza hausimikilo, baho wanhu wose wamonile viyasongile kuzenga wokwiza kumzeha, 30 kwa kulonga, munhu ino kasonga kuzenga, mbali hanakomeleza. 31 "Tebu nilonge mfano umwenga, ihawa hana Mfaume yoyose, yahalonda kuita miubung'hukila, ‘Ivo hakala hasi na kutonga goya na wanhu wake elufu kumi, kama kodaha kuitowa na ija miage yokwiza na wanhu elufu ishilini? 32 Na kama yahaona havidaha, nayo kowalagiza Wanhu waite kwa ija yeli na ludabwa mkulu, kumpula mbuli ya kuitogolela kwa utindiwala. 33 Basi ivija kama munhu yoyose kumwenu kama haleka vose yali navo," Mchikomelezo Yesu kalonga, "Habule munhu yodaha kua Mwaluko wangu.

34 "Munyu icho chinhu chinogile, mbali ihazabuka, mbali kogela choni ikolele kaidi mbaka inoge? 35 Haifaya hata muulongo hebu muimboji, mbali yokwasigwa hanze. Ivo yeli na magutwi yavimanye chinilonga."