1 Nayo Yesu kengila Yeliko kakala yobita mzinzila za kae iyo. 2 Baho hakala na munhu imwe mkulu wa wagoga kodi kokemigwa Zakayo, nayo kakala mzenzi. 3 Nayo Zakayo kakala kolonda kumona Yesu kuwa munhu yeli vilihi, kwa ivo kapotigwa kumona Yesu kwa vija kakala mguhi na hakala na bumbila da wanhu. 4 Ivo kakimbila hima kuulongozi mwa bumbila da wanhu na kakwela kuchanha mwa mkuyu yadahe kumona Yesu, kwa vija Yesu kakala yobitila nzila ija. 5 Basi Yesu viyavikile haja ha mkuyu, kalola kuchanha kamlongela Zakayo, "Lopola hulumuka, kwa vija lelo kokua mwenekae wangu."

6 Baho Zakayo kahulumuka hima na kamgoneka Yesu ukae yake kwa deng'o. 7 Wanhu wose viwaonile mbuli iyo, wehiligwa na kulonga, "Kengila kwa mwenekae yeli na malozo."

8 Mbali Zakayo kema na kumlongela Mndewa, "Tegeleza Mndewa! Fungu dimwe mmafungu gangu maidi ga uzenzi wangu noweng'ha vikumbi muyega, na kama nimboka chinhu munhu yoyose, nombwelezela mala kane ya chinimbokile.

9 Amala Yesu kamlongela Zakayo, "Lelo kae ino muloholigwa kwa vija ino nayo ni Mwana wa Ibulahimu.

10 Kwa vija nie Mwana wa Munhu niza kuzambwila na kulohola chija chagile."

11 Waja wanhu viwakalile womtegeleza Yesu, watonga kua Ufaume wa Mungu wa habehi kulawila, kwa vija wakala habehi kuvika Yelusalemu. Baho Yesu kawalongela mfano uno. 12 "Hakala na munhu imwe wa lukolo lwa Kifaume, kaita isi ya kutali ili yasimikigwe kua Mfaume, amala yahasimikigwa yabwele ukae yake. 13 Kabula hanasegela kawakema watumigwa wake kumi na kamwing'ha sente chila munhu, kawalongela, ‘Mzisang'hanile sang'hano zimeme mbaka nihabwela.’ 14 Mbali wanhu wa isi yake wamwihila na wagala usenga na walonga, ‘Hachimlonda munhu ino yawe Mfaume wetu.’

15 "Hata ivo munhu iyo kasimikigwa ukulu na kabwela kumwake yeli mfaume. Ivo kawakema waja watumigwa wake yaweng'ile sente, ili yavimanye zongezeka sente nyingahi kwa chila munhu. 16 Wa mosi keza na kalonga, ‘Mndewa, kwa gaja mafungu gauning'ile gongezeka mafungu gamwenga kumi.’ 17 Mndewa kalonga, ‘Kusang'hana goya,’ ‘Gweye kwa mtumigwa unogile! kwa vija kukala munhu wa kutogoligwa vinhu vidodo, nokwing'ha ukulu mzikae kumi.’ 18 Wa kaidi nayo keza na kulonga, ‘Mndewa, kwa gaja mafungu gauning'ile mhata mafungu matano gamwenga.’ 19 Na ino wa kaidi kamlongela, ‘Nokwing'ha ukulu mzikae tano.’ 20 Amala keza ija mtumigwa imwenga na kalonga, ‘Mndewa dino hano fungu jako, kwa vija nikala niifisile goya muifundo ya msuli wangu. 21 Nikudumba kwa vija nikumanya gweye hubunzwaga. Kosola chinhu sichako, na kokwaha chinhu huchihandile.’ 22 Mndewa kamlongela, ‘Gweye mtumigwa wihile! Kolamuligwa kwa ulonzi wako mwenyego! Kunimanya kua niye sibunzwaga, nosola chinhu sichangu na ivija nokwaha sichihandile. 23 Vinoga, ivo habali huzigalile sente zangu kwa wanhu wa kuzisang'hanila sang'hano! Amala nahabwela mhate fungu jangu na dija fungu jongezeke.’ 24 Baho kawalongela waja wemile habehi, ‘Mbokeni sente yeli nayo na mwing'heni ija mtumigwa yeli na sente kumi.’ 25 Mbali wamlongela, ‘Mndewa iyo tiyali kana sente kumi! 26 Mndewa kedika, ‘Nomlongeleni’ ‘Munhu yeli na chinhu, hata yahawa na vingi kokwing'higwa, mbali yelibule chinhu hata chidodo yelinacho kobokigwa. 27 Ivija na waja wahasanyi wangu, waja hawalonda niwe Mfaume wao, wagaleni hano muwakome kuno nowalola!’"

28 Yesu viyakomeleze kulonga gago, kalongoza nzila kuita Yelusalemu. 29 Nayo viyavikile behi na Betifage na Betania mchigongo cha mizeituni, kawalagiza waluko wake waidi walongole 30 na malagizo gano, "Gendeni mchijiji chija mchiona, muheingila, momona mwana wa mhunda kafungigwa na hanampapa munhu. Mfuguleni na mumgale hano. 31 Na kama munhu yahawauza habali momfungula? Mulongeleni Mndewa komlonda."

32 Na waja watumigwe viwaitile kuja, wavika chila chinhu kama vija Yesu viyalongile. 33 Viwakalile womfugula mwana mhunda, wenyego wawauza, "Habali momfugula iyo mhunda?"

34 Wao wedika, "Mndewa komlonda, 35 na wamgalila Yesu mwana mhunda. Amala watandika vivalo vao mumgongo mwa mhunda na baho mhunda kampapa Yesu. 36 Na Yesu viyakalile koita kuno kakwela mwana mhunda, wanhu waviyanzanza vivalo vao mnzila.

37 Na viyavikile behi na Yelusalemu, mchigongo cha Mizeituni, bumbila da wajalusona wake, wasonga kumwing'ha hewela Mulungu na kumtogola kwa dizi kulu, kwa mbuli ya miuzonza yose iwaonile, 38 Walonga, "Kamweda iyo Mfaume yokwiza kwa Zina da Mndewa! Utindiwala ukale kuulanga kwa Mulungu na ukulu kuchna ng'hani kwa Mulungu!"

39 Amala Mafalisayo wamwenga wakalile mdibumbila wamlongela Yesu. "Mfundaji, "Wakomhokele waluko wako wanyamale hupi!"

40 Yesu kawalongela, "Nowalongeleni wano wahanyamala, mabwe genyego gosonga kuguta nyangi."

41 Yesu viyavikile behi na Yelusalemu na kuiona kae kaililila, 42 kuno yolonga, "Maza uhavimanyile lelo choni chilondeka kwa utindiwala! Mbali sambi gafisigwa mmeso gako! 43 Kwa vija zua dokwiza, baho wahasanyi wako wonda wakuzunguluke na kukusunha kulawa mhande zose. 44 Wokulagaza hasi, gweye na wanago ulinao. Hawakulekela hata dibwe donda disigale mdibwe dimwenga, kwavija kukala ulema kuvimanya chipindi chija Mulungu yokugalila ulohozi!"

45 Amala Yesu kengila mui ng'anda ya Mulungu, na kasonga kuwawinga waja wakalile wogula vinhu, 46 kawalongela, "Yandikigwa mmayandiko, ‘Ng'anda yangu ni ng'anda ya kumpula Mulungu.’ Mbali mweye muihindula kua mhango ya wabavi!"

47 Chila zua Yesu kakala yofunda mui ng'anda ya Mulungu. Mkulu wa walava nhambiko na wafunda ndagizi na Vilongozi wa wanhu wakala wolonda kumkoma, 48 mbali hawapatile nyafasi ya kutenda diwalondile, kwa vija wanhu wose wakala womtegeleza goya na hawalondile hata mbuli imwe iwabite.