1 Msimo uja Agusto Mfaume wa Loma kalagiza wanhu wose wa ufaume wa Loma wapetigwe. 2 Ino ikala mala ya mosi ya kwandikigwa mazina ga wanhu chipindi chija Kilenio viyakalile Liwali wa Silia. 3 Wanhu wose waita kwandikigwa, chila munhu kaita kwandikigwa kuikae yake iyaleligwe.

4 Yusufu nayo kalawa kae ya Nazaleti ili Galilaya, kuita, Betelehemu muikae Yudea kae ya Daudi, Yusufu kaita uko kwavija yeye wa lukolo wa Daudi. 5 Kaita uko ili yandikigwe hamwe na Maliamu mwehe yamlavile pamvu nayo kakala na inda, 6 ivo, viwakalile uko Betelehemu, mazua gake kuibasula chimvikila. 7 Kamlela mwanage wachilume wa chaudele na kamvaza vikumbi, kamtambaliza mdidogo disongoligwe da kudila ng'ombe kwavija hawapatile hanhu hakuwasa mzikae za wageni.

8 Hakala na wasusilaji wakalile wokala behi na baho, wakala wokwamila bung'hukilalo zao ichilo. 9 Bahaja Mtumigwa wa kuulanga kwa Mulungu kawalawila, na bung'hulo da Mulungu uwabung'hulila ubanzi wose, nao wengila na gudemo kulu. 10 Mbali mtumigwa wa kuulanga kwa Mulungu kawalongela, "Sekemdumbe! Kwa vija nie niwagalila Usenga unogile yonda iweng'he ndeng'helo ng'hulu kwa wanhu wose. 11 Kwavija lelo muikae ya Daudi kaleligwa mlohozi kwa mbuli yenu, iyo Kilisito Mndewa! 12 Na vino vokua vilaguso kumwenu, momvika mwana kavazigwa vikumbi, kawasa mdigogo disongoligwe kwa kudila ng'ombe.

13 Bahaja walawila bumbila kulu da watumigwa wa kuulanga kwa Mulungu, wailumba na mtumigwa miyao, wamtogola Mulungu wolonga,

14 "Yatogoligwe Mulungu yeli kuchanha kuulanga

na muiisi kukale na utindawala kwa wanhu yeli na lazi nao.

15 Viwasegele waja watumigwa kuita kuulanga kwa Mulungu, waja wasusilaji wailongela, "Haya na chiteni mbaka Beselehemu, chikalole gaja galawilile, mbuli ziyachilongele Mndewa."

16 Walopola kuita Betelehemu wamvika Maliamu na Yusufu na ija mwana ching'hele katambalalizwa mdigogo disongoligwe da kulisila ng'ombe. 17 Viwamonile imwana, wapwililisa gaja gawalongiligwe na mtumigwa wa kuulanga kwa Mulungu kwa mbuli ya mwana io. 18 Wose wahulike wakanganyika ng'hani kwa gaja gawalongiligwe na wasusilaji wa ngh‘ondolo. 19 Mbali Maliamu kazika mmoyo mbuli zose na kuzitonga. 20 Amala waja wasusilaji wabwela kuchiwala, kuno womwing'ha ukulu Mulungu na kumtogola kwa gaja gawahulike na kugaona, kama viwalongeligwe Mtumigwa wa kuulanga kwa Mulungu.

21 Na vidivikile zua da nane mwana kengizigwa kumbi, na kwing'higwa zina da Yesu, zina diyeng'higwe na mtumigwa wa kuulanga kabula Malia hanapata inda.

22 Amala, chipindi cha kusunhigwa vizimalile ka Maliamu, kama viikalile ndagizi ya Musa, Yusufu na Maliamu wamgala mwana Yelusalemu, ili asimikigwe kwa Mndewa, 23 kama viyandikigwe muindagizi ya Mndewa, "Chila mwana wa chilume wa chaudele yasimikigwe kwa Mndewa." 24 Nao ivija wakalave nhosa ya kulunguza, kama viilagizigwe muindagizi ya Mndewa, hua waidi hebu mang'inda maidi ga njiwa. 25 Muikae ya Yelusalemu hakala na munhu imwe zina jake Simeoni, nayo ni munhu yatogoligwe kwa Mulungu, yomfugamila Mulungu, yokalizila kuloholigwa kwa Waizilaeli na Muhe wa Mulungu ukala nayo 26 nayo kagangamiziligwa na Muhe wa Mulungu kua hopata ifa mbaka yamone Kilisito yasaguligwe na Mndewa. 27 Ivo kuno kolongozigwa na Muhe wa Mulungu, Simeoni kengila Haikae ya Mulungu, na tata na mami yake Yesu wamgala mwana Haikae ya Mulungu, wamtendele kama viwazowele mzindagizi zao, 28 Simeoni kamsola mwana mmakono gake kuno komtogola Mulungu, kalonga,

29 "Mndewa, sambi kodaha kumleka mtumigwa wako

yage kwa utindiwala, kama vuunilalike.

30 Kwavija niuona ulohozi wako kwa meso gangu mwenyego,

31 uutandile goya mmeso ga wanhu wose,

32 diwe bung'hulo kwa kuwabung'hulila wanhu waja sio Wayahudi

na Ukulu wa Mulungu kwa wanhu wako Wazilaeli."

33 Na tata na mami yake wakala wakanganyigwe ng'hani kwa gaja galongigwe kwa mbuli yake. 34 Ivo Simeoni kawapulila kwa Mulungu yaweng'he ganogile, na kumlongela Maliamu mami yake Yesu, "Mwana ino kekigwa giladi kwa mbuli ya kwaga na kuloholigwa kwa wanhu wengi muiisi ya Waizilaeli. Iyo kokua kilaguso kulawa kwa Mulungu yonda ilemigwe na wanhu wengi. 35 Na ivo nhonga za wanhu wengi zooneka hazelu na gweye mwenyego, kopata giogio ng'hani." 36 Hakala na muke imwe mgane, mlagusi wa Mulungu zina jake Ana biti Fanueli, lukolo lwake lwa Asheli, kakala mvele na ivija kakala na mulume wake milao saba tu kulawa viyafungile zengele. 37 Amala kakala chizuka kwa milao samanini na mine, halawile Haikae ya Mulungu mazua gose, kuno komfugamila Mulungu kokala bila kuja kuno yompula Mulungu. 38 Bahaja Ana kalawilila haulongozi ha Yusufu na Malia na kasonga kumtogola na kumwing'ha hewela Mulungu na kulonga mbuli ya mwana iyo kwa wanhu wose wokalile wobeta ulohozi wa Yelusalemu.

39 Yusufu na Malia viwakomeleze kusang'hana gose galagizigwe na ndagizi ya Mndewa Mulungu, wabwela muikae yao ya Nazaleti uko Galilaya. 40 Nayo mwana Yesu kakula yokongezeka ludabwa, nzewele na unovu wa Mulungu ukala nayo.

41 Ivo chila mlao Yusufu na Malia Mami yake wakala woita Yelusalemu mumsimo wa lusona lwa Pasaka. 42 Yesu viyavikize ukulu wa milao kumi na midi, walawa kuita mulusona lwa Pasaka kama viwazowele. 43 Pasaka viimalile, haja Yusufu na Malia viwakalile wobwela ukae, Yesu yeye kasigala Yelusalemu mbali wao hawavimanyile. 44 Yusufu na Malia wavimanya kaumo muumwanza na wamwenga, wagenda mwanza mbaka hadiswele zua. Leka wandusa kumzambwila kwa wenekae wao na kwa mbwiga zake. 45 Viwamhonyile wabwela Yelusalemu ili kumzambwila uko. 46 Mdizua dakadatu ivo viwamonile, wamvika Haikae ya Mulungu, kakala yakalile hagati yao wafunza ndagizi, kowategeleza na kuwauza mbuli. 47 Wose wamuhulike wakanganyika ng'hani na udaho wake mkulu wa umanyi na kufambula goya mbuli ziyauzigwa. 48 Yusufu na Malia viwamonile wakanganya ng'hani. Malia, mami yake kamuuza, "Mwanangu, mbona kuchitendela vino? Lola nie na tataako chikala chokuzambwila kila hanhu kwa kugwaya." 49 Yesu kawauza, "Habali mnizambwile? Hamvimanyile nilondeka kukala Haikae ya Tata angu?" 50 Mbali wao hawadimanyile dija diyawalongele.

51 Labaho kaita nao mbaka Nazaleti, nayo kakala yowategeleza. Mbali mami yake kazika mmoyo wake mbuli zino zose. 52 Nayo Yesu kakala yokula kwa chimo na nzewele kuno yomnogela Mulungu na Wanhu.