1 Zua dimwe, Yesu viyakalile yofunda wanhu mui ng'anda ya Mulungu mbuli ya usenga unogile, Vilongozi wa wakulu wa nhambiko na wafunda ndagizi na wavele vilongozi weza 2 na wamuuza, "Chilongele gweye kosang'na mbuli zino kwa kwa udaho ulihi? Na yalihi yakudahize?"

3 Yesu kawedika, "Tanhu leka nie niwauze. Nogeleni, 4 udaho wa Yohana wa kubatiza ulawa kuulanga kwa Mulungu hebu ulawa kwa wanhu?

5 Mbali wao wailongela wenyego kwa wenyego, "Chomlongela choni? Chihalonga, ‘Ulawa kuulanga kwa Mulungu,’ Kochilongela, ‘Ivo habali hamumtogole?’ 6 Mbali chahalonga, ‘Ulawa kwa wanhu,’ dino bumbila jose dili hano dochitoa kwa mabwe, kwa vija wamtogola kua Yohana kakala Mlagusi." 7 Baho wamwidika, "Hachimanyile kuulawile."

8 Yesu kawalongela, "Nanie siwalongela, nosang'hana gano kwa udaho ulihi."

9 Amala Yesu kawalongela wanhu mfano uno, "Hakala na munhu imwe yahandile mizabibu mumgunda wake, ivo kawazima walimi amala kapata mwanza kahalawa kwa chipindi chitali. 10 Msimo wa mlao vuuvikile, kamlagiza mtumwa wake yaite kwa waja wazime mgunda yakasole manhunda kulawa mumgunda wa zabibu. Mbali waja wazime mgunda wamtoa ija mtumwa na kabwela bila chinhu. 11 Baho ija Mndewa kamlagiza mtumigwa wake imwenga, na mtumwa iyo nayo wamtoa ivija, na wamgela chinyala, na kabwela bila chinhu. 12 Baho kamlagiza mtumwa wa kadatu, na ino ivija wamlumiza ng'hani na wamwasa kunze. 13 Amala ija mndewa yeli na umgunda kaiuza, ‘Nhendeze niye? Nokwiza kumlagiza mwanangu yaiyeka nili na wende nayo, mmanye ino wokwiza kumtegeleza!’ 14 Mbali waja wazime mgunda viwamonile mwana iyo, wailongela wenyego, ‘Ino iyo mwana mndewa iyo yeli na uhazi wa mgunda. Na chimkome na uhazi wake wokua wetu!’

15 Amala wamlava hamgwazo hamgunda wa mizabebu na baho wamkoma. "Yesu kawauza, "Mmane mwenemgundakowatendaze waja walimi?" 16 "Kokwiza kuwakoma walimi wose, na koweng'ha wanhu wamwenga mgunda uo wa mizebibu." Wanhu viwahulke gano walolonga, "Habule seke galawilile gago!"

17 Mbali Yesu kawalola kwa kuwagangamizila meso gake na kulonga, "Yandiko dino manake choni?

Dibwe dilemigwe na wazengaji

ijo diwa dibwe kulu da kutumanila da hamgwazo dakuzengela ng'anda.’

18 Munhu yoyose yogwa mdibwe ijo kobeneka vihande vihande, na ivija dibwe ijo dihamgwila munhu, iyo munhu domhonda honda na kua kama usage."

19 Nao wafunda ndagizi na wakulu wa nhambiko wageza kumgoga Yesu bahaja, kwa vija wavimanya mfano uja uwalonga wao, mbali wawadumba wanhu. 20 Kwaivo wakala wozambwila nyafasi inogile ya kumgoga. Ivo walagiza vibilikizi waitende kama wanoga kwa Yesu ili wamwamhe kwa mbuli zake ziyalonga na kumgala mwa wakulu wa silikali ya Walumi. 21 Baho waja vibilikizii wamuuza Yesu, "Mfundaji, chivimanya kua kolonga na kofunda mbuli zitogoligwa. Na humbagula munhu kwa vovose viyeli, mbali kofunda nzila ya Mulungu ya ukweli. 22 Tebu chilongele kama cheye cholondeka kumliha kodi Kaisali hebu hachilondeka?"

23 Mbali Yesu kaumanya ubala wao, baho kawauza, mweye habali monigeza, 24 "Ndagusileni sente. Chihanga chino chanani na mayandiko gano ga nani?" Wamwidika, "Ga Kaisali Mfaume mkulu wa Loma."

25 Baho Yesu kawalongela, "Vinoga, mliheni Kaisali vija va Kaisali, na mwing'heni Mulungu vija va Mulungu."

26 Baho wapotigwa kumgela mmakono kwa mbuli zija yazilongile hawanhu. Ivo wanyamala hupi, wakanganyigwa kwa ulonzi wake.

27 Amala Masadukayo wamwenga, waja wolonga kua habule uzilibuko wa wafile, weza kwa Yesu na kumuuza, 28 "Go mfundaji, Musa kachandikila ndagizi ino, ‘Kama munhu yahadanganika na kumleka mwehe wake bila mwana, kolondeka mkulu wake yamuhazi mgane iyo ili yamlelele wana ija mdodo wake yadanganike bila mwana.’ 29 Ivo hakala na wanhu saba wa tata imwe, imkulu kasola mwehe na kadanganika bila mwana. 30 Amala magati kamhazi mgane yalekigwe na mkulu wake, 31 Na chibule nayo ivija. Ivo vilawilile kwa waja wose saba wadanganika bila kuleka wana. 32 Mchikomelezo, na iyo muke ivija kadanganika. 33 Ivo basi, mdizua da uzilibuko, iyo muke kokua mwehe wa yelihi? Kwavija kakala yasoligwe na walume wose saba."

34 Yesu kawedika, "Wanhu wa chipindi chino wasola na kusoligwa, 35 mbali kwa waja wonda yawaone wolondeka wapate nyafasi ya ugima muuzilibuko chipindi icho hawasola hebu kusoligwa. 36 Wao wokua kama watumigwa wa kwa Mulungu, wao wanage Mulungu, weng'higwa nyafasi ya ugima kaidi, kwavija wao wana wa uzilibuko. 37 Musa ivija kagangamiza kua wafile wozilibuka. Kwa mbuli ya chija chisaka chikalile chokwaka moto bila kumala na kakala kolonga na Mndewa kama ‘Mulungu wa Ibulahimu na Mulungu wa Isaka na Mulungu wa Yakobo.’ 38 Iyo Mulungu wa wagima, sio Mulungu wa wafile, manake wokala kumwake wose wana ugima."

39 Wafunda ndagizi wamwenga walonga, "Go mfundaji, kulonga goya!" 40 Viwakomeleze baho, hawagezile kumuuza mbuli zimwenga kaidi.

41 Amala Yesu kawauza, "Wolongaze kua Kilisito yasaguligwe na Mulungu mwanage Daudi? 42 Manake Daudi mwenyego kolonga mchitabau cha Zabuli,

‘Mndewa kamlongela, Mndewa wangu,

Kala ubanzi wangu wa nhogolwa,

43 mbaka vonda niwatende wahasanyi wako kua chigoda cha kwikila magulu gako.

44 Kama Daudi komkema ‘Mndewa,’ yokuwaze kaidi Kilisito yasaguligwe na Mulungu kua ulelo wa Daudi?"

45 Wanhu wose viwakalile womtegeleza, Yesu kawalongela waluko wake, 46 "Itiganyeni na wanda ndagizi za Musa, wenyego wotenda nhogolwa kugenda kuno wavala ng'hanzu nhali ivija wolonda wawalamse wanhu mmasoko, wao wokala mvigoda va haulongozi mzing'anda za kuiting'hanila wayahudi, na husola nyafasi za watogoligwe mulusona, 47 wowasolela wagane vinhu vao kuno woitenda wanoga na woigoda kupula kwa chipindi chitali! Wanhu kama wano wokwing'higwa nyinukila ng'hulu."