1 Yesu viyakalile mui ng'anda ya Mulungu kawaona wazenzi viwakalile wolava nhosa mchia chakulavila nhosa. 2 Ivija kamona mwanchike imwe mgane yeli chikumbi muyega, keka nhosa ya sente mbili mchia chija. 3 Baho Yesu kalonga, "Nomlongeleni kweli, ino mgane chikumbi muyega kalava hakulu kubita wamwenga wose. 4 Manake wanhu waja wamwenga walava nhosa ija isigale kulawa muuzenzi wao, mbali ino mgane yeli chikumbi muyega kalava sente ya ngama yelinavo muugima wake."

5 Baho waluko wamwenga wakala wolongelela mbuli za ng'anda ya Mulungu, viihambigwe goya kwa mabwe ga bei ng'hulu kubitila nhosa za wanhu wazilavile kwa Mulungu. Mbali Yesu kawalongela, 6 kwa mbuli zino mzilola, chipindi chokwiza habule hata dibwe dimwe donda disigale mdibwe dimwengwa, chila dibwe dobanangika."

7 Wamuuza, "Mfundaji," Lini zolawilila mbuli zino? Na choni chonda chilaguse kua chipindi chakulawilila mbuli zino cha habehi?"

8 Yesu kawalongela, "Muitiganye seke mvwiziligwe. Kwavija wengi wolawila na kutumila zina jangu, nakulonga, ‘Iyo nie!’ Na kaidi, ‘Chipindi icho chahabehi.’ Mbali mweye seke muwawinze. 9 Seke mdumbe muhahulika bung'hukila na mahasanyo, mbuli izo zolondeka zisonge kulawilila, mbali hailagusa kua uhelelo wa vose uvika.

10 Amala Yesu kawalongela, "Wanhu wa isi imwe woitoa na wanhu wa isi imwenga na ivija wanhu wa ufaume umwe woitoa na wanhu wa ufaume umwenga. 11 Mbali hokua na migudemo mikulu muuisi, nzala na vitamu va chila namna va kuilokeza, kolawila bung'hukila ng'hulu kuchana kuulanga. 12 Mbali kabula ya gano gose haganalawilila, mweye mogeligwa mmakono, na wowadununza, wowagela mzikae za kuitinganila na kuwagela mmageleza, mogaligwa mwa wafaume na vilongozi kwambuli ya kuniwinza. 13 Na ino yokua nyafasi yako ya kuligula Usenga Unogile. 14 Mbali mchipindi icho seke mgae, choni chakulonga kuikimila, 15 kwa vija niye mwenyego noweng'ha chakulonga na nzewele ija habule hata imwe mwa wahasanyi wenu yonda yeme na kubela gamlonga. 16 Na mweye mohindukigwa hata na tata na mami zetu na ndugu zenu na mbwiga zenu na wayenu, wamwenga wenu wokomigwa. 17 Chila munhu kowehila kwambuli ya kuniwinza. 18 Mbali habule honda mpate dihile jojose. 19 Na mweye mwahafunya moyo mouhonya ugima wenu.

20 Mbali mwahaona kae ya Yelusalemu izungukiligwa na wamilizi, baho mvimanye ubananzi wa habehi. 21 Amala waja wanhu wali Yuda wakimilile mvigongo, waja weli muikae ya Yelusalemu walawe, na waja wali mmigunda seke wabwele muikae. 22 Kwa vija mmazua gago hokua 'Zua da nyinukila,’ kulagusa kua kweli gaja gose gandikigwe mmayandiko. 23 Woluona weli na inda na waja weli na ving'hele! Kwavija holawila madununzo makulu muisi, na nyinukila ya Mulungu yowagwila wanhu wa isi ya Yudea. 24 Wamwenga wokomigwa kwa panga, na wamwenga wosoligwa kama wafungigwa mziisi zimwenga, na kae ya Yelusalemu yolongozigwa na wanhu hawali Wayahudi, mbaka mchipindi chao cha kulongoza chonda chivike.

25 "Baho hokua na vilaguso mdizua na muumwezi na mzinhondo. Wanhu wose mziisi wokwazaganyika ng'hani na holawila ng'humbi da bahali dili na gudemo. 26 Wanhu wosinduka kwa kudumba na kwa kulola mbuli zonda kulawilile muiisi, kwa vija udahi wa kuulanga kwa Mulungu wotigisigwa. 27 Baho vonda wamone Mwanage Munhu yokwiza mdiwingu kwa udahi mkulu na Ukulu wa Mulungu. 28 Basi mbuli zino vonda zilawilile mweye imeni na mwinule vihanga venu, kwa vija ulohozi wenu wa habehi."

29 Amala kawalaongela mfano uno; "Uloleni mkuyu na mibiki imwenga yose. 30 Chipindi chonda kuzuka mayani, mweye wenyego movimanya kua vuli da habehi. 31 Na mwahaona kulawilila kwa mbuli zino, mvimanye kua Ufaume wa Mulungu wa habehi ivija.

32 "Kweli nowalongeleni, ulelo wonda wagaone gano hawabita mbaka mbuli zino zose zenele. 33 Isi na ulanga vobita, mbali mbuli zangu hazibita ng'o.

34 "Itiganyeni, sekeinogeligwe na mbuli za ubananzi wowose mugima wenu kama umelo, ulevi na kugaya muugima uno, kwa vija zua ijo dodaha kwiza kwa kusinhukiza kama mtego vuwenzeka 35 kama vija ching'hungo. Iyo yowalawilila wanhu wose hohose chila hanhu muiisi. 36 Basi mkale meso kuno mompula, Mulungu yawadahize kwa mbuli zonda zilawilile na kwima haulongozi mwa Mwanage Munhu."

37 Mmazua gose Yesu kakala kofunda Mui ng'anda ya Mulungu, na zua dihaswela, koita kuhumula mchigongo cha Mizeituni na kua uko chilo chose. 38 Na wanhu wose wakala wokwiza lukwiki Mui ng'anda ya Mulungu kutegeleza viyofunda.