1 Yesu kawalongela Waluko wake, "Hakala na Munhu imwe mzenzi, na yakalile na mnyapala wake, munhu ino kapatika na mbuli ya kupwililisa vinhu va mdewa wake. 2 Zua dimwe mndewa mzenzi kamkema na kamuuza, ‘Mbuli gani zino zinihulika zokulonga gweye? Mhetele idadi ya vinhu vangu, kwa vija havidahika gweye kugendelela kua mnyapala.’ 3 Ija mnyapala kaiuza mmoyo wake, ‘Sambi notendaze? Manake mzenzi wangu koniwinga unyapala wangu. Na kulima sidaha, na ivija kupula noona chinyala. 4 Mbali novimanya va kusang'hana, ili vonda nilavigwe muunyapala, wanhu wadahe kunibokela mzikae zao. 5 Kawakema waja wanhu wodaigwa na mzenzi wake, na kuwauza chila munhu, ‘Ivo sente nyingahi zuulondeka kumliha mzenzi wangu?’ 6 Ija munhu kalonga, vidumu mia saba alubaini va mavuta ga mzaituni, ija mnyapala kamlongela, sola kalatasi yako ya chuulondeka kuliha, amala kala hasi, yandika mia nhatu na sabini.’ 7 Amala kamuuza ija munhu wa kaidi, na gweye kolondeka kuliha sente nyingahi? kedika magunia mia mbili ga ngano. Ija mnyapala kamlongela ivija, sola kalatasi yako, yandika magunia mia moja na sitini.’ 8 Ija mzenzi kamtogola nyapala mbala kwa vija viyatendile kwa nzewele, manake wanhu wa ulelo uno wokua na ubala ng'hani wakuisang'hanila mbuli zao mbali wanhu womuwinza Mulungu wabule ubala uo."

9 Na niye nowalongela, "Muisang'hanile ubwiga kwa vinhu va muuisi, ili vahaga Mulungu yawabokele muugima ulibule uhelelo. 10 Munhu yotogoligwa kwa vinhu vidodo ng'hani, kotogoligwa kwa mbuli ng'hulu ivija, na munhu hotogoligwa vinhu vidodo, iyo hatogoligwa hata kwa vinhu vikulu ivija. 11 Baho kama mweye hamuwile wakutogoligwa muuzenzi wa muuisi, yelihi yonda yaweng'he mweye uo unzenzi unogile? 12 Ivija kama hamwile wanhu wakutogoligwa kwa vinhu va munhu imwenga, yelihi yonda yaweng'he vinhu venu wenyego?

13 Habule mtumigwa yonda yawasang'hanila wandewa waidi ng'o! Manake hebu komwihila ino na kukala na wende na ija, hebu koilumba na ija na kumzeleu ino. Havidahaika kumsang'hanila Mulungu na uzenzi vose hamwe."

14 Mbali Mafalisayo kwavija wenyego wakala wozilonda sente ng'hani viwahulike gago, wamzeha Yesu. 15 Baho Yesu kawalongela, mweye iyo wanhu moigoda kua motenda goya hawanhu, mbali Mulungu kawamanya mmioyo yenu. Manake vija vinhu vitogoligwa ng'hani na wanhu kwa Mulungu viha.

16 Ndagizi za Musa na mayandiko ya walagusi wa Mulungu vikala voliguligwa mbaka viyezile Yohana Mbatizi, kulawa baho Ufaume wa Mulungu wofundigwa, ivo chila munhu kokwingila kwa ludabwa muufaume uo. 17 Mbali ibuha ng'hani ulanga na isi kuhalawa kubita hata helufi imwe ilawe muindagizi.

18 Munhu yoyose yomleka mwehe wake na kusola mwehe imwenga iyo kutenda ugoni, nayo mulume yomsola mwehe ija yalekigwe na mulume wake iyo munhu kotenda ugoni ivija.

19 Yesu kalonga, hakala na munhu imwe yali na uzenzi ng'hani, yavalile vivalo va langi zambalau zikalile za bei ng'hulu, na mazua gose kakala koja kwa luhadu. 20 Baho haulwivi hakala na chikumbi muyega imwe, zina jake Lazalo, yeli na vilonda vingi, 21 Lazalo kakala kotumanila ndia ilagale kulawa muimeza ya ija mzenzi, hata umbwa weza na kuvilambita vilonda vake.

22 "Ija chikumbi muyega viyadanganike, kasoligwa na mtumigwa wa kuulanga kwa Mulungu wamwika habehi na Ibulahimu. Na ija mzenzi ivija kadanganika na wamuwanda. 23 Basi ija mzenzi viyakalile kuja kwa wanhu wafile kuno yodununzika, kenula meso gake kamuona Ibulahimu na ija Lazalo kahabehi yake. 24 Baho ija mzenzi kalila, kalonga, ‘Tata Ibulahimu nionele bazi, mlagize Lazalo yazabike chidole chake mgamazi amala yahoze lulimi lwangu, kwa vija nodununzika muumoto uno hano hanili.’ 25 Mbali Ibulahimu kamlongela, ‘Mwanangu sekeuisemwe kua gweye kukala kopata vinhu vinogile muugima wako, nayo Lazalo kakala yopata gehile, ivo sambi nayo Lazalo kahano kohumula na gweye kodununzika. 26 Na kulu kubita gose, hagati yetu cheye na mweye hana kombo kulu, kwa mbuli ya waja wanhu wolonda kulawa kumwetu kwiza kumwenu wapotigwe, na waja wolonda kulawa kumwenu kwiza kumwetu ivija wapotigwe kwiza. 27 Mzenzi iyo kalonga, ‘Tata nokupula mlagize Lazalo yaite ukae kwa walukolo wangu, 28 kwa vija hana walukolo wangu watano yawakomhokele ili nao seke wavike hanhu hano ivija ha madununzo.’ 29 "Ibulahimu kamwidika, ‘Wao wahamwe na Musa na Walagusi wa Mulungu, ivo wolondeka kuwategeleza wao.’

30 "Mbali ija mzenzi kalonga, ‘Sio ivo Tata Ibulahimu, mbali kama munhu yahalawa kwa wafile yahaita kumwao, nao woleka malozo na kumfugamila Mulungu.’ 31 Ibulahimu kawalongela, kama hawalonda kuwatogola Musa na Walagusi wa Mulungu, hawadaha kutogola mbe hata munhu yahalawa kwa wafile hawamtegeleza.