1 Msimo uwo hakala na wanhu wamlongela Yesu mbuli za wanhu wamwenga wa Galilaya, na Pilato kalagiza wakomigwe na damu yao ihanyigwe na damu ya wanyama kwa mbuli ya nhambiko. 2 Yesu kawauza, "Ivo mweye mogesa kua zino zilawilila kwa vija wano Wagalilaya wakala na malozo kubita Wagalilaya wose? 3 Niye nowalongela sio kwa mbuli iyo, mbali kama na mweye hamlekile malozo genu, modanganika kama wao. 4 Hebu mweye mogesa hata uja mnala wa Siloam viugwile na kuwakoma waja wanhu kumi na nane, wakala malozo kubita wanhu wose wakalile Yelusalemu? 5 Nowalongela sio kwa mbuli iyo, mbali kama hamlekile malozo, na mweye modanganika kama wao."

6 Amala Yesu akawalongela mfano uno, "Munhu imwe kakala na mbiki wake wa manhunda mumgumgunda wa mizabibu, viyaitile kwaha manhunda, mbali hagapatile. 7 Ivo akamlongela ija mtumigwa wa uja mgunda wake, ‘Lola, milao midatu yose nikala nokwiza kwaha manhunda ga mbiki uno, mbali sinapata chinhu, ivo ukanhe mbiki uno! Habali woibananga isi ino?’ 8 Ija mtumigwa akamlongela, ‘mndewa tanhu uleke kwa mlao uno umwe kaidi, na niye nouhalilila na kugela mboji. 9 Kama wahalela manhunda mumsimo ukwiza yokua goya, mbali kama haulelile basi ukanhe.’"

10 Mdizua da kuhumula da Wayahudi, Yesu kakala yofunda Muikae ya kuiting'hanila Wayahudi. 11 Baho hakala na muke imwe yakalile mtamu wa milao kumi na nane, kwavija kakala yambule chinyamkela mbaka kamtenda yawe na kinhumbi ivo kapotigwa kwima kwa kugoloka. 12 Yesu viyamonile kamkema, akamlongela, "Gwee muke, ima kuhonyigwa kinhumbi ulinacho!" 13 Yesu viyamwikile makono gake muke iyo, bahaja kenuka goya na kumtogola Mulungu.

14 Mbali mkulu wa Kae ya kuiting'hanila Wayahudi kagevuzika kwa vija Yesu kamhonya muke iyo mdizua da kuhumula da Wayahudi. Ivo iyo mkulu Kae yakuiting'hanila Wayahudi kagendelela kudilongela dija bumbila da wanhu,"hana mazua sita ga kusang'hana sang'hano zenu, ivo mwize mmazua gago kuhonyigwa, mbali sio mdizua da kuhumula da Wayahudi!"

15 Baho mndewa kalonga, "Mweye wanhu vibilikizi, yelihi kumwenu mdizua ijo da kuhumula da Wayahudi seke yamlave ng'ombe hebu mhunda wake kuita kung'wa mazi? 16 Na ino muke wa ulelo wa Ibulahimu, yadununzigwe na chinyamkela kwa milao kumi na minane, baho halondeke kulekeseligwa madununzo gake mdizua ijo da kuhumula da Wayahudi?" 17 Viyakomeleze kugalonga gago, waja wahasanyi wake wagwa chinyala, mbali wanhu wamwenga wose wadeng'helela kwa mbuli za uzonza zisang'hanigwe nayo.

18 Amala Yesu kauza, "Choni chiilinge na ufaume wa Mulungu? Mmane na niye niulinge na choni? 19 Uilinga na mbeyu ndodo ya mbiki wa haladali, na yaisolile munhu imwe na kaita kuhanda mumgunda wake, nao ulela ukula kua mbiki mkulu. Na mgamakwamvi gake, ndege wa kuulanga wazenga mvulu."

20 Yesu kauza kaidi, "Niulinge nachoni uno Ufaume wa Mulungu? 21 Noulinga na uja usasu usoligwe na ija muke yaitile kuhanganya mja mgamadebe madatu ga usage amala uwo usage wose usasuka ivija.

22 Yesu mumsimo wake wa kuita Yelusalemu kakala yobita muzikae na mvijiji kuno yofunda. 23 Munhu imwe kamuuza Yesu, "Go Mndewa ivo wanhu woloholigwa wadodo?"

Yesu kawedika, 24 "Lopoleni kwingila kubitila lwivi uno msisili, kwa vija nowalongela kweli wanhu wengi wogeza kwingila mbali hawadaha kwingila. 25 Chipindi chokwiza baho mwenekae yalamke na kuuhinda lwivi, na mweye mwima hanze na kutoa hodi na kulonga, ‘Mndewa chivugulile ulwivi!’ Mbali nayo kowalongela, niye sivugula lwivi kwa vija mweye siwamanyale kumlawa!’ 26 Baho mosonga kulonga, ‘Ching'wa na kuja hamwe na gweye, ivija gweye kuchifunda cheye mvibuga vetu!’ 27 Mbali nayo kowalongela, ‘Niye mweye siwamanya hebu kumlawa. Segeleni hano kumwangu mweye wabananzi!’ 28 Baho Yesu kagendelela kulonga, mwahamona Isaka na Yakobo na Walagusi wa Mulungu wose, wahawa mu Ufaume wa Mungu, na mweye mokua mwasigwa kunze baho mokua na ludoko na kusiginha meno! 29 Wanhu wokwiza kulawa ubanzi wa usimbukilo wa zuwa na ubanzi wa uswelo wa zuwa, na kulawa ubanzi wa kuchanha na ubanzi wa hasi, na wose wokwiza kukala hanhu hao waje ndiya watandiligwe na Mulungu nayo Mulungu kowalongoza. 30 Lola waja waulongozi wokua wakuchisogo na waja weli kuchisogo wokua haulongozi."

31 Mchipindi icho, Mafalisayo na wanhu wamwenga waita kwa Yesu na wamlongela, "Lawa hano usegele hanhu hamwenga, kwa vija Mfaume Helode konda kukukoma." 32 Yesu kawalongela, "Gendeni mkamlongele vino io mbwisi, niye nabaha lelo na igolo nolava wanhu vinyamkela na kuwahonya watamu wose, mbali mdizua da kadatu noikomeleza sang'hano yangu.’ 33 Nolondeka kugendelela na mwanza wangu wangu lelo na igolo na ikisindo, kwa vija Mlagusi wa Mulungu, halondeka kudanganika hanhu hengine mbali na Yelusalemu.

34 "Yelusalemu, gwee Yelusalemu, gwee uwakoma walagusi wa Mulungu, na kuawatoa na mabwe Wasenga watumigwe kumwako! Mala nying'hahi nikukunzanya kama nguku viyakunzanya vinzia vake mmabawa gake, mbali hamtogole! 35 Loleni kae yenu ilekigwa uchiwa. Na niye nowalongela hamniona kaidi mbe, mbaka vonda mlonge, ‘Kamweda iyo yokwiza kwa zina da Mndewa.’ "