1 Viyakomeleze gago Mndewa akawabagula waja sabini na waidi na kawalagiza waidi waidi waite chila kae kuja kuyalondile kuita iyo mwenyego. 2 Yesu Kawalongela, "Mndewa wa va kugobola vingi mmigunda mbali wagobolaji wadodo. Ivo mpuleni iyo Mndewa wa kugobola yagale wagobolaji mumgunda wake. 3 Mgende! mvimanye, nowalagiza kama wana bung'hukilalo hagati ha mbwisi. 4 Seke umsole sente hebu mgelo hebu vilatu, ivija seke mumlamse munhu yoyose mnzila. 5 Mwahengila muikae yoyose, molondeka muwalamuse vino, ‘Utindiwala ukale na mweye.’ 6 Kama kuna munhu yeli na utindiwala, utindiwala wenu wokala nayo, mbali kama habule yeli na utindiwala, utindiwala wenu wowabwelela. 7 Baho kaleni muikae iyo, muje na kung'wa va ukae yao, manake chila msang'hanaji sang'hano kolondeka kwing'higwa chitumetume chake. Seke muite muisi ino hebu ija. 8 Kama mwahingila muisi yoyose na wanhu wahawabokela, diyeni vumtandiligwe, 9 wahonyeni watamu wakalile uko, walongeleni wanhu weli baho,’Ufaume wa Mulungu wammabehi.’ 10 Mbali mwahengila muisi yoyose, na hawawabokele, laweni muite mzinzila zake na kulonga, 11 'Ivija dija timbwisi da muisi yenu digogile magulu getu chodikung'husa. Mbali mvimanye kua Ufaume wa Mulungu wa habehi!’ 12 Niye nowagangamiza mdizua da chitala, wanhu wa isi iyo wopata madununzo ng'hani kubita wajawa isi ya Sodoma!"

13 "Moluona mweye wanhu wa Kolazini na moluona mweye wanhu wa Betisaida! Kama uzonza uja utendeke kumwenu uhatendeke kuja Tilo na Sidoni bahaja wanhu wahamfugamile Mulungu na kuleka malozo gao, kuno wavalile vikumbi na kubakala maivu. 14 Mbali mdizua da kulamula yobuha kwa Tillo na Sidoni kufunya moyo nyinukila ya Mulungu kubita mweye. 15 Na gweye wanhu wa isi ya Kapelenaumu, che! kodaha kuinula mbaka kuchanha kuulanga? Habule, kohulumusigwa mbaka kwa wanhu wadanganike."

16 Amala Yesu kalonga na Waluko wake, "Munhu yomuhulikeni mweye iyo kanihhulika niye, na iyo yowalema mweye konilema na niye. Mbali iyo yonilema niye, baho komlema iyo yanilagize."

17 Waja sabini na waidi wabwela kwa deng'o na kulonga, "Go Mndewa, hata vinyamkela vowalawa wanhu vichiwakomokela kwa udaho wako!"

18 Yesu kawedika, nimwona ija Mwenembago kogwa kulawa kuchanha Kuulanga kama lumwesa. 19 Yesu kawalongela, tegelezeni, niweng'heni udaho wa kubojoga nyoka na inge na 'ludabwa mkulu kwa wahasanyi wenu, habule chinhu chonda chiwadahe. 20 Mbali sekemuigode kwa vija vinyamkela wowahulika, mbali deng'heleleni kwa vija mazina genu gandikigwa Kuulanga kwa Mulungu.

21 Chipindi icho Yesu viyabokele Muhe wa Mulungu kadeng'helela kalonga, "Tata, Mndewa wa kuulanga na kuiisi nokwing'ha hewela kwavija kuwafisa mbuli ino weli na nzewele na weli na ilimu, mbali kuwalagusila wana wadogo. Enaa Tata, vuulondile ilawilile.

22 Amala kalonga, "Tataangu kanidahiza kusang'hana mbuli zose, na habule munhu yoyose yammanyile Mwana ila Tata, hebu yammanyile Tata ila Mwana, na yoyose ija Mwana yomlonda komfunhulila." 23 Amala Yesu kawahindukila Waluko wake kawalongela kwa kifiso, "Gamweda meso golola gamlola mweye! 24 Manake nowalongela, Walagusi wa Mulungu na Wafaume walonda kuona gamuona mweye mbali hawagaone, na kuhulika gamhulika mbali hawahulike."

25 Bahaja kema Mfundaji wa ndagizi imwe kamgeza Yesu, kamuuza, "Mfundaji, nhende choni mhate ugima ulibule uhelelo?" 26 Yesu kamuuza, "Mgamayandiko gandikwaze kwa mbuli ya ndagizi za Musa? Na gweye kumanya choni? 27 Ija munhu Kedika, kalonga "Mtogole Mndewa Mulungu wako kwa moyo wako wose, na kwa muhe wako wose na ludabwa wako wose, na kwa ubala wako wose, ‘Na mwing'he wende miago kama vuuwing'ha mwenyego.’ " 28 Yesu kamlongela "Kulonga goya," "Tenda ivo na gweye kokua na ugima."

29 Mbali ija mfundaji wa ndagizi viyalondile kuilagusa kua kana ubala kamuuza Yesu, "Miangu nie yelihi?"

30 Yesu kedika kalonga, munhu imwe kalawa Yelusalem kuita Yeliko, viyakalile nzila wabavi wamvamila na kumvula vivalo vake na kutoa na kumboka chila chinhu, na wamleka bahaja behi na kudanganika. 31 Labaho mlava nhambiko imwe kakala yobita nzila ija, viyamonile munhu ija yavamiligwe na wabavi kabita kumgwazo. 32 Amala kabita mwanahina wa mlava nhambiko imwe nayo viyamonile munhu ija yavamiligwe na wabavi kabita kumgwazo ivija. 33 Mbali munhu imwe wa isi ya Samalia viyakalile muumwanza, kabita haja hakalile munhu ija na viyamonile kamonela bazi. 34 Kaita kwa munhu ija kamsunha goya vilonda vake amala kamgela divai na kumfunga, baho kamkweza mchihongwe wake amala kamgala muing'anda yakugona nyambenyambe ili wamlole goya. 35 Viivikile igolo, ija munhu wa isi ya Samalia kalava vihande vidi va madini ga sente ng'hulu kamwing'ha mlolezi wa ija ng'anda, na kamlongela, "Mlole goya ino mtamu na kama sente zokongezeka, niye nahabwela nokwiza kukuliha."

36 Labaho Yesu kauza, Vuutonga kwa wanhu waja wadatu yelihi iyo miage munhu ija yatoigwe na Majambazi?"

37 Na mfundaji wa ndagizi za Musa kedika, kalonga "Ija yamonele bazi iyo miage." Yesu kamlongela, "Genda kasang'hane ivoivo."

38 Amala Yesu viyakalile yoita Muumwanza na Waluko wake, wengila mchijiji chimwe na muke imwe yokemigwa Mata kambokela ukae yake. 39 Nayo Mata kakala na mwali yokemigwa Malia iyo kakala mmagulu ga Yesu kuno komtegeleza Yesu mbuli ziyolonga. 40 Mbali Mata kakala yohunganika na mbuli nyingi, amala Mata kaita kwa Yesu kamuuza, "Mndewa komona ino mwali viyanilekile nihunganike niiyeka? Ivo mlongele yeze yanitaze!"

41 Baho Mndewa kalonga, "Gweye Mata! koigaza na mbuli nyingi, 42 mbali cholondeka chinhu chimwe tu chinogile, na Malia kakisagula na habule munhu yonda yamboke."