1 Mdizua dimwe da kuhumula da Wayahudi Yesu kakala yobita mmigunda ya uhemba, waluko wake wakala wokwanyula makwamvi ga uhemba, wakala wofigisafigisa mmakono gao woja. 2 Baho Mafalisayo wamwenga wawauza, "Habali mosang'hana ivo mdizua da kuhumula da Wayahudi?" 3 Yesu kawedika, kawauza "Che, mweye hamsomile dija yadisang'hane Daudi na wayage viwakalile na nzala? 4 Daudi kengila Muikae ya Mulungu, kaisola ija migate ya laguso ijigwa na Walava nhambiko waiyeka, kaja na ivija kaweng'ha wayage waja." 5 Yesu kawalongela, "Mwana wa Munhu iyo Mndewa wa zua ijo da kuhumula da Wayahudi."

6 Vidivikile zua dimwenga da kuhumula, Yesu kengila muikae ya kuiting'hanila Wayahudi, na kawafunda, baho hakala na munhu imwe yakalile yaholole mkono wake wa kulume. 7 Mafalisayo na waja wafundaji wa ndagizi wakala womsepa Yesu walole kama komhonya mdizua da kuhumula, amala wapate mbuli ya kumgala mchitala. 8 Mbali Yesu kaimanya nhonga yao, baho kamlongela munhu ija yeli na mkono uholole, "Ima wize haulongozi ha wanhu." Bahaja munhu ija kema haulongozi hao wose. 9 Amala Yesu kawalongela waja wafundaji wa ndagizi na Mafalisayo, kalonga, "Mweye nowauzeni, "Dofaya dilihi mdizua da kuhumula, kusang'hana ganogile hebu gehile? Kulohola ugima wa munhu hebu kuubananga?" 10 Kawabunhulila meso gage mhande zose, kamlongela munhu ija yeli na mkono uholole, "Golosa mkono wako." Munhu ija kaugolosa mkono wake nao uhona kabisa.

11 Mbali mafalisayo na waja wafundaji wa ndagizi wagevuzika ng'hani na waiuza wenyego vija viwalonda kumtendela vihile Yesu.

12 Zua dimwe Yesu kakwela kulugongo kumpula Mulungu, kakala uko meso chilo chose kuno yompula Mulungu. 13 Viivikile imitondo kawakema waluko wake, nayo kasagula kumi na waidi mmwao, wao kawakema watumigwa, 14 Simoni ija yeng'higwe na Yesu zina dimwenga Petulo, na walukolo wake Andelea na Yakobo na Yohana na Filipo na Batolomayo, 15 Matayo na Tomasi, Yakobo mwanage Alufayo na Simoni yoigombela isi yake, 16 na Yuda mwanage Yakobo, na Yuda Isikaliote, mwaluko yamhinduke Yesu.

17 Yesu viyahulumuke kulawa kulugongo hamwe na watumigwa wake, kema hanhu halibule lugongo, wanhu wengi ng'hani waikunzanya walawile kuuyahudi na Yelusalem, na mhwani ya Tilo na Sidoni. 18 Wanhu wose wavika kumtegeleza Yesu na kuhonyigwa vitamu weli navo ivija kawahonya wanhu wakalile wogazigwa na vinyamkela. 19 Wanhu wose walonda kumwamha Yesu, kwa vija udaho ukala omlawa na uhonya wanhu.

20 Yesu kawalola waja waluko wake, kalonga,

"Mmweda mweye vikumbi muyega, kwa vija

Ufaume wa Mulungu uwo wenu!

21 "Mmweda mweye mlinanzala sambi,

kwa vija mokwiza kwiguta.

"Mmweda mweye mlila sambi,

kwa vija mokwiza kuseka!

22 "Mmweda mweye wanhu wahawehila, na kuwabagula na kuwaliga, na kuwalonga vihile kwa mbuli ya Mwana wa Munhu. 23 Na vondagalawilile gago, deng'heni na kuzumhazumha, manake gweko jenu kulu kuulanga kwa Mulungu. Manake wavele wenu wawatendela ivo Walagusi wa Mulungu.

24 "Mbali moluona mweye mliwazenzi,

kwa vija mweye mmweda tiyali!

25 "Moluona mweye mwigute sambi, manake mokwiza kuona nzala!

"Moluona mweye mseka sambi,

manake mokwiza kulila na kulombokeza!

26 "Moluona mweye wanhu wahawatogola kwavija ivo tata zao viwawatendele waja walagusi wa uvwizi.

27 "Mbali nowalongeleni mweye mnitegeleza, weng'heni wende wahasanyi wenu, wasang'hanileni goya waja wose wowenukila, 28 wengheni wende waja wose wowaduila, wapulileni waja wowadununza. 29 Mbali munhu yahakutowa kanza da kulume mhindulile na da kumoso ivija. Munhu yahakuboka golole jako mwing'he na umsuli ivija. 30 Munhu yoyose yokupula chinhu mwing'he, na munhu yokuboka vinhu vako sekeulonde yakubwelezele. 31 Wawasang'hanileni wamwenga, kama vumlonda wawasang'hanile mweye. 32 "Mbali mwahawatogola waja wowatogola mweye, momweda choni? Weli na malozo ivija nawo wowatogola wayao! 33 Hebu mwawasang'hanila ganogile waja wowasang'hanila mweye mwopata choni? Hebu weli na malozo wosang'hana ivo. 34 Kama mwahawakopesha wanhu kwa tamanilo da kumbwezeligwa, momweda choni? Hata weli na malozo woikopa na wotamanila kubwelezeligwa vose! 35 Mbali mweye weng'heni wende wahasanyi wenu na kuwasang'hanila ganogile, laveni kumwao bila kutamanila kubwelezigwa, na gweko jenu dokua kulu, na mweye mokua wanage Mulungu yeli kuchanha kuulanga. Kwa vija Mulungu kanawende na wabananzi na walibule hewela. 36 Ivo muwe na bazi kama Tati yenu wa Kuulanga viyeli na bazi.

37 "Sekemuwalamule wamwenga, na mweye hamulamuligwa, seke muwalonge vihile wamwenga namweye sekemulongigwe ivo, walekeseleni wamwenga na mweye molekeseligwa. 38 Weng'heni wanhu viwolonda, na mweye mokwing'higwa na Mulungu. Chipimo chimemile na kusindiligwa mbaka malagalila, ivo wanhu viwalonda kuweng'ha mmakono genu. Kwa vija chija chipimo chimpimila wayenu, icho chimpimiligwa na mweye." 39 Amala kawalongela ulonzi umwe, "Munhu chipofu kodahaze kumlongoza chipofu miyage, baho wose waidi wonda wengile mdikombo. 40 Mwaluko hadaha kumbita mfundaji wake, mbali ija yafundigwe goya kodaha kua kama mfundaji wake.

41 "Habali kochilola chibale chilimgati ya siso da miago, mbali hudilola bale dilimgati ya siso jako mwenyego? 42 Hebu kodahaze kumlongela walukolo wako, ‘Ima nikulave chibale chilimgati mmeso gako,’ Mbali hudilola bale dilimmeso gako mwenyego? Kwa chibilikizi gweye! Tanhu lava bale dilimmeso gako, labaho kodaha kuchilola goya chibale chilimgati ya siso da walukolo wako na kuchilava.

43 "Habule mbiki unogile ulela manhunda gehile, hebu mbiki wihile ulela manhunda ganogile. 44 Wanhu huumanya mbiki kulawila mgamanhunda gage, manake wanhu hawadaha kwaha manhunda ga masada kulawa mmiwa, hebu manhunda ga zambalau kulawa mumbiki wa msonobali. 45 Ivoili munhu yanogile kolava mbuli zinogile kulawa muumoyo wake, nayo munhu yehile kolava gehile kulawa muumoyo wake, kwa vija munhu kolonga gaja gamemile mmoyo wake.

46 "Habali monikema, ‘Mndewa, Mndewa,’ mbali hamgasang'hana gaja ganiwalongela? 47 Nowalagusileni vija viyeli ija munhu yonda kwiza kumwangu na kutegeleza usenga wangu na kuusang'hanila. 48 Iyo koigala na munhu yazengile ng'anda, kwa kuhimba hasi na kwika msingi ugangamale, labaho halawila bung'hukila da mazi na kutoa haja hazengigwe ija nga'nda mbali haigwile mbe kwa vija ikala izengigwe goya mmabwe. 49 Mbali munhu yoyose yohulika usenga unilonga na hausang'hanila, iyo kokua kama munhu yazengile ng'anda yake mumsanga bila kwika msingi, bung'hukila da mazi vidibitile hanu haja ija ng'anda igwa na kubanangika yose!"