1 Chipindi chahabehi cha ulusona lwa migate ilibule hamila, lusona wokemigwa Pasaka. 2 Baho wakulu wa nhambiko na wafunda ndagizi za Musa wakala wowadumba wanhu, na ivo walonda nzila ya kumkoma Yesu kwa kifiso.

3 Mwenembago kamwingila Yuda ija yokemigwa Isikaliyote, yakalile imwe mwa waja wajalusona kumi na waidi. 4 Yuda kaita kwa wakulu wa nhambiko na waja wamilizi wa ng'anda ya Mulungu na kulonga nao vija viyalondile kumkoma Yesu. 5 Nao wadeng'helela na kuilumba kumwing'ha sente. 6 Yuda ivija katogola na kasonga kulonda nyafasi ya kumuhinduka Yesu yahawa yaiyeka.

7 Baho zua da lusona divika damigate ilibule hamila chipindi mwana bung'hukilalo wa pasaka kochinjigwa. 8 Yesu kawalagiza Petulo na Yohana kwa malagizo gano kawalongela, "Gendeni mkatande goya lusona lwa Pasaka kwa mbuli yetu chize kuja." 9 Wamuuza, "Kulihi kuulonda cheye chikahatande?" 10 Yesu kawalongela, "Tegelezeni, vonda mwingile muikae, moiting'hanila na mulume imwe yapapile nongo ya mazi. Muinzeni mbaka muikae yondayengile, 11 na mweye mulongeleni mwenekae, ‘Mfundaji kokuuza wahalihi uhelengo wakujila Pasaka nie na waluko wangu?’ 12 Nayo kowalagusileni uhelengo mkulu uhambigwe goya muigolofa, chili na chila chinhu chikigwe goya." 13 Waita na wavika chila chinhu kama Yesu viyawalongele, na waheka goya kwa mbuli ya kuja lusona wa Pasaka.

14 Chipindi vichivikile, Yesu kakala kuja ndia hamwe na watumigwa muindia ya Pasaka. 15 Amala Yesu kawalongela, "Nivilonda ng'hani kuja lusona wa Pasaka hamwe na mweye, kabula sinadununzika! 16 Kwa vija nowalongeleni,mbaka Mulungu vonda yawalohole wanhu wake wose na kuwalongoza. 17 Amala Yesu kasola chikombe, kamwing'ha hewela Mulungu na kalonga," Soleni chino chikombe na mching'wele. 18 Nowalongeleni kua, kulawa sambi sing'wa kaidi divai ya nhunda da mzabibu mbaka Ufaume wa Mulungu vonda uvike." 19 Amala kasola chihande cha gate, na kamwing'ha hewela Mulungu na kaubena kuweng'ha waja watumigwa wake na kulonga,"Uno uo lukuli lwangu wolavigwa kwa mbuli yenu. Sang'haneni vino kwa kung'humbuka." 20 Ivija, viwakomeleze kuja kaweng'ha chikombe na kalonga, "Chikombe chino ni lagano da sambi dolagusa damu yangu ikwitika kwa mbuli yenu. 21 Mbali mlole, ija yonihinduka kahamwe nanie muindia! 22 Nie mwanage Munhu nodanganika kama Mulungu viyalondile, mbali koluona munhu ija yonda yanihinduke!" 23 Amala wasonga kuiuza wenyego kwa wenyego, yalihi kumwetu yodaha kusang'hana mbuli iyo?

24 Baho halawilila mwazaganyo mmwao kuno wotonga kua yalihi yonda yawe Mkulu mmwao. 25 Yesu kawalongela, "Wafaume na wamhazi wowalongoza kwa ludabwa wanhu wao, na vilongozi womanyika kua 'Walava nying'ha wa wanhu.’ 26 Mbali mweye seke muigale nao, mbali yali mkulu mmwenu, kolondeka yawe kama mdodo kwa wose, na chilongozi kumwenu yawe kama mtumigwa. 27 Kwaivo yalihi yali mkulu? Munhu ija yakalile hasi muindia kuja? Hebu ija msang'hanaji? Sio ija yakaliza kugaliligwa? Mbali nie nahano na mweye kama msang'hanaji. 28 Na mweye iyo msigale na nie chipindi chose mmagezo gangu, 29 na kama vija Tatangu viyanitogole kulongoza, nanie nowatogola ivija, 30 ili mdahe kuja ndia na kung'wa muufaume wangu na kukala mvigoda va ufaume, na kulamula makabila kumi na maidi ga Izilaeli.

31 Yesu kalonga, "Simoni, Simoni, tegeleza! Mwenembago kapula udaho wa kumgezani, kama mlimi viyobeta uhemba kulava mifuya. 32 Mbali nikupulila gweye Simoni, nhogoli yako sekeihunguke, na gweye wahanibwelela, uwagele moyo wayago." 33 Petulo kalonga, "Go Mndewa, niye nitogola kwingila na gweye mdigeleza hebu hata kudanganika!" 34 Yesu kamwidika kamlongela, "Nokulongela gweye Petulo, kabula nzogolo hanakwika, gweye kokua kunibela mala nhatu kua hunimanyile."

35 Amala Yesu kawauza waluko wake,"Uja msimo viniwalonde muite bila mvuko wa sente hebu kadi da vivalo hebu vilatu, muhungukiligwa na chochose?" Wedikila, "Habule," 36 Yesu kawalongela, "Mbali sambi," "Kama kuna mkoba ya sente hebu kadi iyeka kolondeka uisole, na kama kwabule panga gula golole jako ukagule panga dimwe. 37 Kwa vija mayandiko yolonga, ‘Kahanganyigwa hamwe na wabananzi,’ Nna niye nowalongela mbuli ino yolondeka ivike kumwangu. Chandikiligwe niye cholondeka chivike." 38 Waja waluko wake wamlongela, "Mndewa lola hano hana mapanga maidi!" Nayo kalonga, "Imala."

39 Yesu kaita mbaka kulugongo lwa mizeituni kama viikalile mazoela gake, na waluko wake wakala womuwinza. 40 Viwavikile uko, kawaloangela Waluko wake,"Puleni sekemwingile mmagezo." 41 Kainega nao hatali chiidogo kama vija hanhu hakupigisa dibwe, kafugama mavindi kapula. 42 Kalonga, "Tata," "Kama yahadahika, nilavile madununzo gano. Sikama vinilonda, mbali sang'hana kama vuulonda." 43 Mtumigwa wa kwa Mulungu kamlawila na kumgela moyo. 44 Nayo Yesu yeli na usungu mkulu, kapula ng'hani mbaka fuguti dimlawa kama damu idwendeka muiisi. 45 Viyakomeleze kupula, kawabwelela waja waluko wake kawavika wawasa, kwavija wakala walegela kwa giogio. 46 Nayo kawauza, "Habali muwasa? Lamkeni mkapule, seke mwingile mmagezo."

47 Yesu viyakalile yang'hali yolonga nao, bumbila kulu da wanhu divika, kwa kulongozigwa na Yuda, ija mtumigwa wake imwe mwa waja kumi na waidi. Kaita behi na Yesu yapate kumlamsa kumnonela. 48 Mbali Yesu kamuuza, ‘"Gweye Yuda! Komhinduka Mwanage Munhu kwa kumnonela?" 49 Mbali waja wajalusona wa Yesu wakalile hamwe nayo, viwaonile yonda yalawilile, walonga, "Mndewa, chiwakanhe na mapanga getu?" 50 Munhu imwe mwa waja wajalusona kamkanha na panga gutwi da kulume ija mtumigwa wa Mkulu wa nhambiko. 51 Mbali Yesu kalonga, "Lekeni!" Nayo kadigoga gutwi da ija munhu na kamhonya. 52 Amala Yesu kawalongela Vilongozi wa wakulu wa nhambiko, na wakulu wa wamilizi wa Kae ya Mulungu na waja wavele vilongozi wezile kumgela mmakono, "Ivo mweye mwiza na mapanga na viwenguwengu kama vija niye mgala ndwagi? 53 Mazua gose nikala na mweye muluhelengo lwa ng'anda ya Mulungu hamnigelile mmakono. Mbali chino icho chipindi chenu cha ulongozi wa ziza."

54 Amala wamgela Yesu mmakono, wamsola na waita nayo mbaka ukae kwa Mkulu wa nhambiko, mbali Petulo kamuwinza Yesu kwa hatali. 55 Viwakomeleze kukoka moto haluhelengo, Petulo nayo kailumba nao waja wakalile wokota moto. 56 Mtumigwa imwe wa chike viyamonile Petulo kakala habehi na uja moto, kambunhulila meso na kulonga, "Munhu ino nayo kakala hamwe na Yesu!" 57 Mbali Petulo kabela na kalonga, "Gweye muke, nie ata simanyile munhu iyo!" 58 Chipindi chidodo munhu imwenga kamona Petulo na kalonga, "Gweye ivija kwa miage Yesu!" Mbali Petulo kalonga, "Munhu gweye sio nie!" 59 Viibitile kama saa dimwe vino, munhu imwenga kagendelela kugangamiza, "Kweli ino munhu nayo kakala hamwe na Yesu, kwa vija ino nayo Mgalilaya." 60 Petulo kalonga, "Gwee munhu sichimanya chuulonga!" Bahaja viyakalile yolonga, nzogolo keka. 61 Na Mndewa kamhindukila na kumlola Petulo, baho Petulo kakumbuka zija mbuli yalongiligwe na Mndewa, "Kabula nzogolo lelo hanakwika, gweye kokua kunibela mala nhatu." 62 Petulo kalawa kunze na kulila kwa giogio.

63 Waja wanhu wakalile womkimila Yesu wasonga kumzeha na kumtoa. 64 Wamzingiliza chikumbi mmeso na kumuuza, yotela, "Chilongele yalihi yakutowile!" 65 Wagendelela kulonga mbuli nyingi za kumliga.

66 Viivikile imitondo, chitala cha wavele wa wanhu na wakulu wa walava nhambiko na wafunda ndagizi waiting'hanila, na wamgala Yesu mchitala icho. 67 Wamlongela, "Chilongele," "Gweye iyo Kilisito yasaguligwe na Mulungu?" Kawedika, "Hata nihawalongela, hamnitogola, 68 na niye nihawauza mbuli, hamdaha kunidika. 69 Mbali kulawa sambi nie Mwanage Munhu kokala ubanzi wa mkono wa nhogolwa wa Mulungu yeli na udaho." 70 Wose wamuuza, "Gweye iyo Mwana wa Mulungu?" Yesu kawedika, "Mweye iyo mulonga iyo nie." 71 Amala walonga, "Cholonda choni kaidi! Cheye wenyego chimhulika viyolonga kwa mulomo wake mwenyego!"