1 Amala Yesu kawalongela waluko wake, haidahika kabisa sekezilawilile ng'walo zigala malozo, mbali koluona munhu ija yogala ng'walo! 2 Yofaa ng'hani munhu iyo yafungiligwe dimwe kulu da kudundila muisingo yake, na kwasigwa muibahali. Kuliko kumwing'ha ng'walo mwana mdodo mwa wana wano. 3 Kwaivo itiganyeni!

"Miago yahatenda malozo, mkomhokele, yahalonga na kuleka malozo, gela kumgongo. 4 Na mdizua dimwe yahakuhasanya mala saba na kwiza kumwako mala saba ivija na, ‘Yahalonga na kuleka malozo,’ Gwee gela kumgongo."

5 Wasenga wa Mulungu wamlongela Mndewa, "Chongezele tumanilo." 6 Mndewa Yesu kedika, "Kama mwahawile na tumanilo dodo kama mhule ya haladali, mwahadahile kuulongela umbiki wa mkuyu, lawa ukaihande muibahali,’ nao uhatogole.

7 "Chilonge hana munhu imwe mmwenu kana mlimi hebu msusilaji bung'hukilalo. Ivo yahabwela kulawa kuchiwala mndewa wake kodaha kumlongela, ‘Lopola kala uje ndia?’ 8 Baho havidahika, mbali komlongela, ‘Nhandile ndia, na nikile nije na kung'wa amala nagweye leka uje na kung'wa.’ 9 Ivo, komwing'ha hewela mtumigwa wake kwavija kasang'hana kama viyalagizigwe? 10 Ivija mhasang'hana gose gamlagizigwe, longeni, ‘Cheye watumigwa tu chilibule nhogolwa, chosang'hana gaja gachilondeke kusang'hana.’"

11 Yesu viyakalile muumwanza kuita Yelusalemu, kobitila mzimhaka za isi ya Samalia na Galilaya. 12 Na viyakalile yokwingila mchijiji chimwe, kaiting'hanila na wanhu kumi weli na dikulu, wema kutali nayo. 13 Wenula dizi kulu walonga, "Gweye Yesu Mfundaji, chionele bazi!"

14 Viyawonile kawalongela, "Gendeni mkilaguse kwa Walava nhambiko."

Ivo viwakalile woita uko wahona na kutogoligwa kumfugamila Mulungu. 15 Nayo munhu imwe mmwao viyaonile kua kahona kabwela, kuno yomtogola Mulungu kwa dizi kulu, 16 kagwa chifudifudi mmagulu ga Yesu,’ na kumwing'ha hewela Yesu. Munhu iyo kakala Msamalia. 17 Yesu kalonga, "Ivo, hamkalile kumi niwahonyile na kupata chibali cha kutogoligwa kumfugamila Mulungu? Waja tisa wa kulihi? 18 Habule yoyose yabwelile kumtogola Mulungu ila ino nyambenyambe?" 19 Amala Yesu kamlongea, "Ima ugende, tumanilo uli nayo dikuhonya."

20 Chipindi chimwe Mafalisayo wamuuza Yesu,"Ufaume wa Mulungu wokwiza lini?" Nayo kawalongela ufaume wa Mulungu hawiza kwa nzila ya kuulolesa. 21 Ivija habule yonda kulonga, ‘Wakuno hebu ‘Wakuja.’ Kweli ufaume wa Mulungu wammwenu."

22 Amala Yesu kawalongela waluko wake, "Chipindi chokwiza molonda kuona zua dimwe tu da nie Mwanage Munhu na hamuiona. 23 Ivija wanhu wowalongela, ‘Loleni kakuja! Hebu ‘Loleni kahano!’ Mbali mweye sekemlawe hebu kuwawinza. 24 Kwa vija nie Mwanage Munhu mdizua jangu nokwiza kama lumwesa lwa ladi, ubung'hule kuulanga kulawa mhande imwe kuita kumwenga, ivo vondaili nie Mwanage Munhu mdizua ijo. 25 Mbali kolondeka Mwanage Munhu kudununzika ng'hani, ivija na kulemigwa na wanhu wa ulelo uno.

26 "Kama viili mmazua ga Nuhu, vivo vonda iwe mdizua jangu nie Mwanage Munhu. 27 Msimo uo wa Nuhu wanhu wakala woja na wong'wa na kusola na kusoligwa mbaka zua dija Nuhu viyengile Muingalawa ng'hulu, Mvula kulu itoa na bung'hukila da mazi kuwakoma wanhu wose. 28 Ivo ikalile mdizua da Lutu, Wanhu wakala woja na kung'wa, na kuigulila, na kuhanda na kuzenga. 29 Mbali zua dija Lutu viyasegele kulawa Sodoma, moto wa chibeliti upwililika kama mvula kuwakoma wanhu na vinhu vose. 30 Ivo vonda iwe mdizua ijo vija nie Mwanage Munhu nihalawilila.

31 "Mdazua ijo, Munhu yoyose yonda yawe hachanha haing'anda yake, sekeyahulumuke na kuita kusola via vake, ivija na ija yakalile kumgunda sekeyabwele ukae kusola chochose. 32 Seke muisemwe ija mbuli ya mwehe wa Loti! 33 Munhu yoyose yonda yageze kuuhonya ugima wake, kowagiza, na munhu yokwagiza ugima wake kouhonya. 34 Nowalongeleni, chilo icho wanhu waidi wakala wawasa mdikomwa dimwe, munhu imwe kosoligwa na imwenga kolekigwa. 35 Wanachike waidi wokua wodunda ndia mdibwe, imwe kosoligwa na imwenga kolekigwa." 36 Walume waidi wokua wosang'hana kumgunda, munhu imwe kosoligwa na io imwengwa kolekigwa.

37 Waluko wake wamuuza, "Halihi Mndewa?" Yesu kawalongela, "Haja hali na mtufi, baho honda waikunzanyile mkwangule."