1 Amala baho, Yesu kakala yobita bita mzikae, kuno koligula Usenga Unogile kwa mbuli ya ufaume wa Mulungu. Ivija wakala hamwe na waluko wake kumi na waidi, 2 na wake waja walavigwe vinyamkela na kuhonyigwa vitamu vao, Malia kulawa Magdalena iyo yalavigwe Vinyamkela saba 3 wao wakala Yoana mwehe wa Kuza yakalile mkulu ng'anda ya Helode, na Suzana na wake wamwenga wengi wakalile wotumila vinhu vao kuwasang'hanila Yesu na waluko wake.

4 Wanhu wengi wakala wolawa kuno na uko mzikae zao kumuiza Yesu, na vidivikile bumbila kulu Yesu kasonga kulava chilaguso chino,

5 "Mlimi kaita kuhanda mbeyu, nayo viyakalile yomiza mbeyu zake, zimwenga zilagalila nzila, zikanyagigwa na wabita nzila na ndege wazija. 6 Zimwenga zilagalila mmabwe, uhemba vuuzisongile kota, unyala kwavija ulongo ukala unyalile ivo haukalile unyeka. 7 Zimwenga zilagalila mmiwa, vizikulile miwa iizonga. 8 Na zimwenga zilagalila muulongo unogile, izo zota na kulela mala mia kubita zija yazihandile."

Mchikomelezo, "Yesu kalonga, yeli na magutwi na yahulike!"

9 Waluko wake wamuuza Yesu, mfano uno manake choni? 10 Nayo kawedika, "Mwing'higwa ubala wa kuumanya ugati wa ufaume wa Mulungu. Mbali kwa wanhu wamwenga wao wolongiligwa kwa mifano, ili wahalola seke waone, na wahahulika seke wavimanye.

11 "Dino ijo fambulo da mfano uno, mbeyu iyo Usenga wa Mulungu. 12 Mbeyu zilagale nzila iyo waja wanhu wahulike Usenga wa Mulungu, mbali mwenembago keza na kuwasegezela mmoyo Usenga wa Mulungu sekewadahe kuutogola na kuloholigwa. 13 Mbeyu zilagale muulongo wa mmabwe iyo waja wanhu wahulike Usenga wa Mulungu na kuubokela kwa deng'o, mbali kama zija mbeyu usenga wa Mulungu haukala mmoyo, kwavija hutogola kwa chipindi chidodo tu wahagezigwa chidogo wogwa. 14 Mbeyu zilagale mmibiki ya miwa iyo waja wanhu wohulika usenga wa Mulungu, mbali chipindi chidodo chahabita wozongigwazongigwa na kugaya, uzenzi na unovu wa isi ivo hawagendelela kukala mmayandiko ga Mulungu. 15 Mbali mbeyu zilagale muulongo unogile iyo waja wanhu wauhulike Usenga wa Mulungu na kuubokela kwa moyo mnovu, wanhu hao wofunya moyo mbaka wogendelela kukala mmayandiko ga Mulungu.

16 "Habule munhu yobwina muli na kwika muuvungu wa komwa. Mbali kokwika mchingolobweda kuwabung'hulila wokwingila mng'anda.

17 Kwa vija chochose chifisigwe chokwikigwa hazelu, na chochose chikigwe mchifiso chomanyika na kwikigwa hazelu.

18 Ivo itiganyeni, kwa gaja gamhulika, wose weli na chinhu wokongezeligwa, mbali yelibule chinhu kobokigwa hata chija chidodo yelinacho."

19 Zua dimwe mami yake Yesu na walukolo wake wamgendela Yesu, mbali wapotigwa kumvikila kwavija hakala na bumbila da wanhu. 20 Munhu imwe kamlongela Yesu, "Mami yako na walukolo wako wahanze wolonda kukuona."

21 Mbali Yesu kawalongela, "Mami yangu na walukolo wangu iyo waja wose wouhulika Usenga wa Mulungu na kuusang'hana."

22 Zua dimwe Yesu kawalongela Waluko wake, "Chiloke mbaka mmwambu mwa lamba." Amala wekwela muingalawa hamwe na waluko wake, wasonga kuloka. 23 Nawo viwakalile muingalawa Yesu kawasa. Hamwande chidogo beho kulu dilawila dilava ng'humbi kulu da mazi dilawila na kwingila muingalawa, baho ngalawa ikala muibung'hukila. 24 Nao waja waluko wake waita kwa Yesu na kumlamsa walonga, "Go Mndewa go Mndewa lamka chodanganika!"

Yesu kalamka kadikomhokela beho na ija ng'humbi ya mazi, na dija beho kulu dinyamala na hakala na utindiwala. 25 Labaho Yesu kawauza waluko wake, "Nhogoli yenu yakulihi?"

Mbali waja waluko wakanganya na kudumba na kuiuza wenyego, waiuza "Ivo munhu ino yelihi? Mbaka kodikomhokela beho na ng'humbi da mazi navo vomuhulika!"

26 Amala Yesu na Waluko wake waloka mbakamhwani ya isi ya Wagelasi ikanhiza kuita ziwa da Galilaya 27 Viyawile yolawa muingalawa na kuvika mhwani, kaiting'hana na munhu imwe wa kae ija yakalile yambule chinyamkela. Munhu iyo kakala havalile chivalo kwa mazua mengi na kakala yokala mmapanga. 28 Munhu iyo viyamonile Yesu kaguta nyangi na kamtumbalila mavindi na kaguta nyangi, kalonga kwa dizi kulu "Yesu mwanage Mulungu yeli hachanha ng'hani! Konda kunhendaze? Nokupula sekeunidununze!" 29 Kwa vija Yesu kakala kamlongela ija chinyamkela yamlawe munhu iyo. Manake ija chinyamkela kakala yomwambula ija munhu mala nyingi, ila wanhu wakala womwika womhota kwa mhingu mmakono na loda mmagulu. Mbali kazikanha zija loda na mhingu na kugaligwa na chinyamkela mbaka kuchiwala.

30 Baho Yesu kamuuza, "Gweye zina jako nani?" Kedika kalonga, "Zina jangu 'Bumbila da Mwenembago," Kwavija kakala kambula vinyamkela wengi.

31 Waja vinyamkela wakala wopula womgongomeza Yesu seke yawalagize kwingila mdikombo kulu. 32 Baho habehi hakala na bumbila kulu da nguluwe, wolisigwa hamgwazo ha lugongo. Ivo vinyamkela waja wampula Yesu yawaleke wawengile nguluwe, nayo kawatogolela yawengile. 33 Waja vinyamkela viwalawile kwa munhu ija, wawengila nguluwe. Bumbila jose da nguluwe dihulumukila kwa ludabwa kulawa kuchigongo wadidimila mdilamba na wang'wa ng'habu wafa.

34 Na waja wasusilaji viwaonile dija dilawilile wakimbilila na kuibwililisa mbuli ija mzikae na mvijiji. 35 Wanhu walawa kuita kulola choni chilawilile, viwavikile kwa Yesu, wamona ija munhu yalavigwe vinyamkela, sambi kahona na kavala vivalo vake na kukala mmagulu mwa Yesu, wanhu waja wadumba. 36 Wanhu waonile mbuli ija wawasimulila wanhu hao vija ija yambule chinyamkela viyahonyigwe. 37 Amala wanhu wose wa isi ija ya Wagelasi wampula Yesu yasegele kumwao, kwa vija wakala wodumba ng'hani. Baho Yesu kengila muingalawa kaita zake. 38 Chipindi Yesu kosegela munhu ija yalavigwe vinyamkela kampula Yesu waite hamwe, "Nokupula nikuwinze."

Mbali Yesu kamlagiza na kumlongela, 39 "Bwela ukae yako, kasimulile mbuli ng'hulu za Mulungu utendiligwe."

Ija munhu kaita zake chila hanhu kuno kosimulila mbuli ng'hulu ziyatendigwe na Yesu.

40 Chipindi Yesu viyabwelile kulawa umwambu mwa Gelasi, wanhu wambokela kwa deng'o kwavija wakala wombeta. 41 Baho keza munhu imwe yokemigwa Yailo, iyo kakala mkulu mui Kae ya kuiting'hanila Wayahudi. Kamtumbalila mavindi Yesu na kumpula kuita ukae yake, 42 kwa vija biti yake yaiyeka yeli na milao kumi na midi kakala yolumwa behi na kudanganika.

Chipindi Yesu viyakalile koita uko wanhu wengi wammemela mhande zose. 43 Ivija baho kukala na muke imwe yakalile yodununzika kwa utamu wa kulawa damu kwa milao kumi na midi, nayo katumila uzenzi wake wose kazambwila walaguzi wa kumhonya mbali wapotigwa kumhonya. 44 Na ija muke kabita hagati ha dija bumbila da wanhu mbaka kamvikila Yesu na kamha mhindo ya valo da Yesu, bahaja utamu wake uhona. 45 Yesu kauza, "Yelihi yanyamhile?"

Ivo wanhu wose wabela, mbali Petulo kamwidika, "Go Mndewa, wanhu wano wose wakumemela gweye."

46 Mbali Yesu kalonga, "Hana munhu kanyamha, manake nivimanya kua udaho unilawa." 47 Ija muke viyaonile hadaha kuifisa ija mbuli imlawilile, kalawilila kwa Yesu kuno kogudema, na kagwa mmagulu ga Yesu. Yeli haulongozi ha wanhu wose, kamlongela Yesu na wanhu wose wakalile haja, habali kamwamha Yesu na vija viyahonyigwe. 48 Yesu kamlongela ija muke, biti yangu nhogoli yako ikuhonya. Genda kwa utindiwala.

49 Yesu viyakalile yang'hali kolonga gano, keza mtumigwa ija kulawa ukae kwa Yailo. Kamlongela Yailo, "Biti yako kadanganika, habali umgaze mfundaji?"

50 Mbali Yesu viyehulike gago, kamlongela Yailo, "Seke udumbe, togola tu, biti yako kohona."

51 Yesu viyavikile ukae ya biti Yailo, halondile kwingila mgati na wanhu wamwenga, ila kengila na Petulo na Yakobo na Yohana na tati na mami yake ija biti. 52 Wanhu wose wakala wolila na giogio kwa mwana iyo. Yesu kalonga, "Seke ulile, kwavija mwanago hadanganike mbali kawasa!"

53 Wose wamzeha kwa vija wakala wavimanyile mwana iyo kadanganika. 54 Mbali Yesu kamgoga mkono wa ija mwana na kamlongela, "Biti, ima!" 55 Ugima wake umbwelela, bahaja kenuka. Yesu kawalongela tata na mami yake mwing'heni ndia. 56 Tata na mami yake wakanganya ng'hani, mbali Yesu kawagomesa sekewamlongele munhu yoyose chija chilawilile.