1 Zua dimwe wagoga kodi na weli na malozo wakala waitile kumtegeleza yesu. 2 Mbali Mafalisayo na waja wafunda ndagizi wakala womdeta, munhu ino kowagoneka wanhu weli na malozo, "Ivija kaidi koja nao, 3 Baho Yesu kawalongela mfano uno,

4 "Kama Munhu imwe kumwenu yahawa na bung'hukilalo mia amala bung'hukilalo imwe kaga, honda yawaleke waja wamwenga tisini na tisa, amala sekeyaite kuchiwala kuzambwila ija imwe yagile mbaka yamone? 5 Nayo yahamona, kompika mmayega gake kuno kodeng'helela. 6 Na yahavika ukae yake, kowakema mbwiga zake na ivija wayage na kuwalongela, ‘Chideng'helele hamwe kwa vija nimpata ija bung'hukilalo wangu yagile.’ 7 Niye nowalongeleni, ivija hokua na deng'o kuulanga kwa Mulungu, kwa munhu imwe yali na malozo yahaleka malozo gake, kubita waja wanhu tisini na tisa wotogoligwa kwa Mulungu na hawagesa kuleka malozo.

8 Yesu kagendelela, "Kama muke kana sente kumi za madini ga feza, amala sente imwe yahaga, holeka kumulika na muli kuno yofagila kwa mbuli ya kuizambwila sente yake yagile mbaka aione? 9 Na yahaiona, kowakema mbwiga zake na wayage, na kuwalongela, ‘Deng'heni na niye kwa vija nichipata chija chipande changu chimwe cha madini ga feza chagile!’ 10 Nowalongela, ivija hokua na deng'o hawatumigwa wa kwa Mulungu kwa mbuli ya munhu imwe yeli na malozo yahaleka malozo gake."

11 Baho Yesu kagendelela kulonga, hakala na muhu imwe yakalile na wabwanga waidi. 12 Baho ija mdodo kamlongela tati yake, "Tata ning'he uhazi wangu. Tata kabagula amala kamwing'ha vinhu vake. 13 Mchipindi chidodo, mbwanga ija mdo kasola vinhu vave vose kaita isi ya kutali na hamwao, uko kapwililisa vinhu vake vose kwa luhadu. 14 Na viyakomeleze kupwililisa vinhu vose, nzala ng'hulu ingila muisi ija, nayo kasigala kabule chinhu chochose. 15 Baho mbwanga ija kaita kwa mwenekae imwe kupula sang'hano, iyo mwenekae kamgala mumgunda wake kulisa nguluwe. 16 Ivo kakala kolonda kuja ndia iyoja nguluwe mbali habule munhu yamwing'ile ndiya yoyose. 17 Mbali viyatongile mmoyo wake, kailongela, "Kwa tati yangu hana watumigwa wengi woja ndiya na kusigaza habali niye nidanganike na nzala! 18 Nobwela kwa tati yangu na kumlongela, "Tata nhenda malozo kumwako na kuulanga kwa Mulungu. 19 Silondeka kukemigwa mwanago kaidi, mbali unhende kama imwe mwa watumigwa wako.’ " 20 Ivo kasegela kubwela kwa tati yake.

"Mbali viyakalile kutali mnzila, tati yake kamona na kumonela bazi, tataake kamkimbilila kumhagatila na kumlamsa. 21 Mbwanga ija kamlongela tataake, ‘Nhenda malozo kumwako na kuulanga kwa Mulungu, silondeka kukemigwa mwanago kaidi.’ 22 Mbali tati yake kawalagiza watumigwa wake, ‘Lopoleni, ‘Ngalileni valo dinogile, mumvaze, na kumumvaze mhete mchidole chake na mumvaze vilatu mmagulu gake. 23 Amala kasoleni bofu da ng'ombe yanonile mumchinje, chije na chitende lusona. 24 Kwa vija mwanangu ino kakala kama munhu yadanganike, nayo sambi mgima, kakala yagile, sambi nayo kaoneka.’ Baho wasonga kudeng'helela.

25 "Chipindi icho ija mbwanga mkulu kakala kumgunda, viyavikilile habehi na ukae, kahulika dizi da nyila kuno wanhu wovina. 26 Kamkema mtumigwa imwe kamuuza, choni chigendelela hano? 27 Iyo mtumigwa kamlongela, mdodo wako keza, labaho na tati yako kamchinjila bofu da ng'ombe yanonile kwa vija mwanage kabwela ukae yeli mgima. 28 Ija mkulu wake kehiligwa, na kalema hata kwingila mng'anda. Baho tati yake kalwa kunze na kumpula ng'hani. 29 Mbali iyo mbwanga kamwidika tati yake kamlongela, ‘Tata lola, niye nikala nikusang'hanila milao mingi, hata zua dimwe sinaleka kuzitogola ndagizi zako, na hunaning'ha hata mbuzi imwe mhate kudeng'helela na mbwiza zangu! 30 Mbali viyezile ino mwanago yapwililise vinhu na weli na luhadu, gweye kumchinjila ndama yanonile! 31 Tati yake kamlongela, ‘Go mwana, gweye kukala na niye mazua gose, na vinhu vino vose nili navo ni vako ivija. 32 Chilondeke kutendigwa ni kuvina na kudeng'helela kwa vija mdodo wako yakalile kadanganika sambi mgima, na yakalile kaga sambi kaoneka.’ "