1 Zua dimwenga da Kuhumula Yesu kengila mgati ya ng'anda ya kuiting'hanila da Wayahudi na umo kukala munhu imwe yeli na mkono uholole. 2 Mafalisayo wamwenga wakalile umo wakala womlola wamone kama kodaha kumhonya mdizua da kuhumula, ili wadahe kumwing'ha mbuli yakumgala mchitala. 3 Yesu kamlongela ija yeli na mkono uholole, "Izo hano hagati." 4 Amala Yesu kawauza, "Ivo, dilihi dilondeka mdizua da kuhumula, kusang'hana dinogile hebu dihile, kuhonya ugima hebu kukoma?" Mbali wao wanyamala hupii. 5 Yesu kawalola wose kwa ludoko, kagwa giogio ng'hani kwambuli ya udala wao wa kutogola. Baho kamlongela ija munhu yeli na mkono uholole, "Golosa mkono wako!" Mtamu ija kaugolosa, nawo mkono uhona kabisa! 6 Mafalisayo walawa kunze, waiting'hana hamwe na wajalusona wa Helode walonda nzila ya kumkoma Yesu.

7 Nayo Yesu na waja waluko wake, wahalawa wainega waita kudilamba. Bumbila da wanhu diwawinza, kulawa Galilaya, na Yudea. 8 Wanhu wahulika gaja gayasang'hane, ivo wamwenga kulawa Yelusalemu na kulawa Idumeya na vijiji vili mgwazo ya lwanda lwa Yolodani, ivija na waja wakalile behi na Tilo na Sidoni, wamuwinza Yesu. 9 Ivo Yesu kawalongela waja waluko wake watande goya ngalawa ndodo aitumile, ili wanhu seke wamsung'hesung'he kwavija hakala na bumbila kulu da wanhu. 10 Kwavija kakala kawahonya wanhu wengi, ivo watamu wakala woisung'ha sung'ha wapate kumwamha ili wahonyigwe. 11 Mala zose wanhu wambule vinyamkela wahamwona, wogwa hasi mmagulu gake na kuguta nyangi wolonga, "Gweye iyo mwana wa Mulungu."

12 Mbali Yesu kawakomhokela seke wamlonge kwa wanhu kua iyo nani.

13 Amala Yesu kakwela kulugongo, kawakema waja yawasagule mwenyego, nawo wamuwinza. 14 Nayo kawasagula kumi na waidi wao ivija kawakema Wasenga,kawalongela, "Nimsaguleni mweye mkale na nie." Na ivija kawalongela, "Nomtumani ili mkaligule, 15 na kupata udaho wa kulava wanhu vinyamkela.

16 Mazina ga waja kumi na waidi wasaguligwe na Yesu ni Simoni, iyo yamkemile Petulo, 17 na Yakobo na Yohana wanage Zebedayo, yawakemile Bonalije, maana ya zina ijo wabwanga wa Mdumo, 18 na Andulea na Filipo na Batulomayo na Matayo na Tomasi na Yakobo mwanage Alfayo, na Tadayo na Simoni mgombela isi yake, 19 na Yuda munhu kulawa kae ya Kaliote ija amala keza kumhinduka Yesu.

20 Baho Yesu kabwela ukae. Wanhu wengi waiting'hana kaidi, nayo kakala yowasang'hanila mbaka yeye na waluko wake wapotigwa kuja ndia. 21 Ndugu zake viwahulike galawilile weza kumsola kwavija wanhu wakala wolonga, "Kengila kichala." 22 Wafunda ndagizi za Musa walawile Yelusalemu walonga, "Yesu kambula Belizebuli! Mkulu wa vinyamkela, iyo yomwing'ha udaho wa kuwalava wanhu vinyamkela."

23 Baho Yesu kawakema na kulonga nao kwa mifano, "Ivo Mwenembago kodahaze kuiwinga mwenyego? 24 Kama wanhu wa ufaume umwe wahagomba wenyengo, ufaume uo wogwa, 25 ivija wanhu wa kae imwe ihaigola yenyego kwa yenyego, kae iyo haima. 26 Nayo Mwenembago yahaihinduka mwenyego kwa kuigola, hadaha kwima mbali kovika muuhelelo.

27 Habule munhu yoyose yodaha kwingila mwikae ya munhu yeli na ludabwa mkulu na kumboka vinhu vake bila kumgela nzabi ija yeli na ludabwa, na yahamgela nzabi lekaivo yamboke vinhu vake. 28 Yesu kawalongela, kweli nowalongela, malozo gose gomsang'hana na kufukula kwenu, kolekesigwa. 29 Mbali yoyose yomfukula Muhe wa Mulungu halekeseligwa mbee, lozo ijo hadilekesigwa mazua gose galibule uhelelo." 30 Yesu kalonga ivo kwavija wanhu wakala wolonga, "Kambula mwenembago."

31 Walukolo wake na mamiyake Yesu weza na wema hanze, wamtumila usenga yalawe kuze. 32 Wanhu wengi wamema wamzunguluka kumtegeleza, msenga ija keza kalonga, "Mami yako na walukolo wako wahanze, wokulonda."

33 Yesu kawalongela, "Mami yangu na ndugu zangu iyo nani?" 34 Amala Yesu kawalola waja wanhu wakalile wamzunguluke ubanzi wose, kalonga, tegelezeni, "Mami yangu na walukolo wangu iyo wano wakalile hano! 35 Munhu yoyose yosang'hana goyolonda Mulungu, iyo iyo mkulu wangu, na lumbu jangu na mami yangu."