1 Yesu kasonga kulonga nao kwa mifano, kawalongela, "Munhu imwe kahanda mizabibu mumgunda wake. Kazenga lwigo kuzunguluka mgunda, mgati kahimba hanhu hakukamila zabibu, kezenga lingo da kwamilila. Kakodisha mgunda wake kwa walimi, amala kagoga mwanza kuita isi imwenga. 2 Mulao vuuvikile, mwenye mgunda kagala mtumwa wake kwa wao walimi ili wamgolele fungu jake da zabibu mwa izo ziwahulule mumgunda. 3 Mbali waja walimi wamwamha ija mtumwa na wamtoa na wamuwinga kabwela bule. 4 Amala ija mwenye mgunda kalagiza mtumwa wake imwenga kumwao, waja walimi wamtoa mditwi iyo nayo na kumtendela mbuli za chinyala. 5 Amala kalagiza mtumwa imwenga, ino wamkoma. Kalagiza watumwa wamwenga wengi, wamwenga watoigwa na waja walimi na wamwenga wawakoma. 6 Mwenye mgunda kasigala na munhu imwe tu, iyo mwanage yaiyeka yeli na wende nayo. Amala kamlagiza kalonga, ‘Kwiza womtegeleza kwavija mwanangu.’ 7 Mbali waja walimi viwamonile yokwiza wailongela wenyego, ‘Ino iyo muhazi wa mgunda uno, izoni chimkome, na mgunda uno wokua uhazi wetu.’ 8 Ivo wamwamha, wamkoma na kuwasa mtufi wake kunze mwa mgunda wa zabibu.

9 Baho Yesu kawauza, "Ivo movimanya ija mwenye mgunda kowatenda choni wao walimi? Kokwiza kuwakoma wao walimi, amala koweng'ha wamwenga mgunda uo wa zabibu. 10 Mweye hamsomile mayandiko ga Mulungu?"

‘Dibwe dija dilemigwe na wazengaji

dihinduka kua dibwe kulu da kutumanila kubita mabwe gose ga kuzengela.

11 Dino ijo diyatendile Mndewa,

najo dauzonza mmeso getu!’ "

12 Viwavimanyile mfano uja uwaloza wao Mafalisayo, Wakulu wa nhambiko na wafunda ndagizi za Musa walonda kumgoga, mbali wadumba bumbila da wangu wamemile. Ivo wamleka na wahalawa.

13 Amala walongozi wa Wayahudi wawalagiza Mafalisayo wamwenga na wajalusona wa Helode ili weze kumgeza Yesu kwagaja gayalonga. 14 Wamwizila, wamlongela, "Mfundaji, chivimanya gweye munhu yalibule dihile na kolonga kweli. Gweye hugazigwa na wanhu, kwavija hugesa kua wao china nani. Mbali gweye kofunda Usenga wa Mulungu vija viilondeka na kweli. Ivo, yofaya kumliha Kaisali kodi hebu haifaya?

15 Mbali Yesu kavimanya ng'hani ubilikizi wao. Yesu kawauza, "Habali mogeza kunhega? Ngalileni iyo sente niilole."

16 Wamgalila iyo sente. Nayo kawauza wajalusona wa Helode, "Chihanga chino na zina dino danani?"

Wamwidika, "Va Kaisali."

17 Baho Yesu kawalongela, "Mwing'heni Kaisali galigake, na ga Mulungu mwing'heni Mulungu."

Nao wakanganyika ng'hani kwa gaja gayalongile Yesu.

18 Amala Masadukayo, waja wolonga kua habule kuzilibuka wamwizila Yesu, 19 wamuuza, "Mfundaji, Musa kachandikila kua kama munhu yahadanganika na kumleka mwehe wake kabule mwana, baho ndugu yake komsola ija mgane ili yamlelele wana ndugu yake ija yadanganike. 20 Hakala na ndugu saba. Mwanamkulu kasola na kadanganika bila kulela mwana yoyose. 21 Ndugu yake wa kaidi nayo kamsola ija mgane, mbali nayo kadanganika bila kuleka mwana yoyose. Ikala ivo na kwa ndugu wa kadatu. 22 Igendelela ivo kwa waja wose ndugu saba habule yalekile mwana. Hachikomelezo ija mgane nayo kadanganika. 23 Muuzilibuko, iyo kokua mwehe wa yelihi kwavija kakala yasoligwe na ndugu wose saba?"

24 Yesu kawedika, "Mweye mokwaga kwavija hammanyile mayandiko ga Mulungu hebu udaho wa Mulungu. 25 Wafile wahazilibuka, hawasola hebu kusoligwa, wokua kama watumigwa wa kuulanga kwa Mulungu. 26 Kwambuli ya kuzilibuka, Ivo, hamsomile mchitabu cha Musa vija Mulungu viyalongile na Musa kulawa mdibwilingu dija dikwaka moto kalonga, ‘Nie, iyo Mulungu wa Abulamu na Mulungu wa Isaka na Mulungu wa Yakobo.’ 27 Yesu kagendelela kulonga, "Mulungu hali Mulungu wa wafile, mbali ni Mulungu wa wagima. Kwaivo mwaga ng'hani."

28 Mfundaji imwe wa ndagizi za Musa keza kawategeleza viwailongela. Kaona vija Yesu viyalongila vinogile, nayo kamuuza Yesu, "Mzindagizi zose, ilihi ing'hulu kubita zose?"

29 Yesu kawedika, "Ndagizi ng'huliu iyo ino, ‘Tegelezeni mweye wanhu wa Izilaeli, Mndewa Mulungu wetu, Mndewa iyo imwe tu. 30 Mwing'he wende Mndewa Mulungu wako kwa moyo wako wose, na kwa muhe wako wose na kwa nzewele zako zose na kwa ludabwa lwako lwose.’ 31 Yakaidi iyo ino: ‘Mwing'he wende miago kama vuigesa mwenyego.’ Habule ndagizi imwenga ili ng'hulu kubita zino."

32 Ija mfundaji wa ndagizi za Musa kamuuza Yesu, "Mfundaji, kulonga goya kua Mulungu ni imwe na habule imwenga ila iyo. 33 Kumwing'ha wende Mulungu kwa moyo wose na kwa nzewele zose na kwa ludabwa wose na kumwing'ha wende miago kama vuiing'ha wende mwenyego mbuli iyo inoga ng'hani kubita kumlavila Mulungu nhosa na nhambiko."

34 Yesu viyaonile kamwidikila goya, kamlongela, "Gweye huli hatali kwingila Ufaume wa Mulungu."

Kulawa baho, habule munhu yoyose yagezile kumuuza kaidi mbuli Yesu.

35 Chipindi Yesu viyakalile yofunda hai ng'anda ya Mulungu, kawauza, "Yokuwaze wafunda ndagizi za Musa wolonga kua Kilisito Mwanage Daudi? 36 Kuno Daudi mwenyego kwakulongozigwa na Muhe wa Mulungu kalonga,

‘Mndewa Mulungu kamlongela Mndewa wangu,

"Kala mkono wangu wa kulume, hanhu ha nhogolwa na udaho

mbaka niwahume wahasanyi wako.’ 37 Kama Daudi mwenyego komkema Kilisito ‘Mndewa.’ Kodahaze Kilisito yawe mwanage?"

Bumbila kulu dikala domtegeleza Yesu kwa ndeng'helo. 38 Viyakalile yofunda, Yesu kalonga, "Itiganyeni na wofunda ndagizi za Musa. Wao wogenda kuno wavala makanzu matali na wonda walamsigwe kwa nhogolwa mmagulilo. 39 Ivija wao wolonda wakale mvigoda va ulongozi mzing'anda za kuiting'hanila Wayahudi na kwing'higwa nyafasi za nhogolwa mzisona. 40 Wao woboka vinhu va wagane na ili waoneke kua watenda goya wopula kwa chipindi chitali. Kwa mbuli iyo wokwiza kulamuligwa hakulu ng'hani."

41 Yesu kakala behi na chia chakulavila nhosa hai ng'anda ya Mulungu na kulola bumbila da wanhu viwakalile wolava sente zao mchia icho. Weli na uzenzi mkulu walava sente nyingi. 42 Mbali muke mgane imwe kalava sente mbili za shaba. 43 Yesu kawakema waluko wake kawalongela, "Kweli nomlongeleni, muke mgane ino kalava hakulu muichia chino kubita wamwenga wose. 44 Wamwenga walava kuilinga na vija visigale muuzenzi wao, mbali muke mgane ino yeli chikumbi muyega, kalava vose viyeli navo, mbaka kija chiyalondile kuja muugima wake."