31 Bawipaw nynh a hopaw tuh: Israel phin te Judah phin hae ryte byakinnaw thawpaw kae rae ccyh tuh solei yn thua cih.✝✝ 32 Tuh-e tuh mih minpaaw hae kha Izip ram kyate mih kuih te suete ka poukhae lya hae ze, ka raepaw byakinnaw te lokuh lan khyh. Mih vawpaw hawte ka la thua zemah, minmin nynh tuh-e byakinnaw kha a ro hae, cite Bawipaw nynh a ci. 33 Tuh-e nin hae koute Israel phin kya ka rae lanpaw byakinnaw tuh hynhte nynh athua: Ka phunglang kha mih lungkhu kya ka nung cih zah, mih thinlung kya ka zei cih; te kae tuh mih Pachia ka thua cih zah, minmin tuh ka ccungccaw hae athua cih hae.✝ 34 Minmin nynh, "Bawipaw kha nytua," cite lu kheit te lu kheit ccangpyakute hopakuh vae lan khyh hae, pawccecize adih huaccepaw kyate ale huaccepaw kyacia mih balynte kae kha yn nyh vae cih hae; mih hoyleinaw kha ka ngaethya cih hae zah, mih seinaw kha ka liathui vae lan khyh, cite Bawipaw nynh a ci.✝

6 Thuasalama Jesu tuh ahoy huapaw byakinpyakunaw kya thadynsah thua zah ahoy huapaw byakinnaw kya-e hopiatu mah athua keiccuze atu aning tuh ahoy huaccepaw ryalaw kha phe a mue vae. 7 Pawccecize masaty e byakinnaw tuh seimenaw a la um khyh lanze, vaeningnaw byakinnaw kha ccung la thua vae lan khyh.

13 "Byakin Thawpaw" a cipaw kya masaty byakinnaw kha arynpaw lang a tangsah vae. Ryn zah apuepaw uccaw tuh aro mawze azo cih.

22 Tuh-e byakinkunaw liate Jesu tuh ahoy huapaw byakinnaw kya-e aamahkhan lang yn tang.

20 Tuhawte zerya a ae kou hae te, banang kha mah lah zah, "E banang tuh nanning hanlan ka laepaw ka chiise kya ka tynsahpaw byakin thawpaw nynh thua.✝

27 Tukoute banang kha lah zah lungtuabya a ho koute minmin kha pya hae zah, "Nae balynte e hynh neih oh; 28 pawccecize e tuh ccungccaw patae seingaethyanaw hanlan ka laepaw, byakin thawpaw te asekuhpaw ka chiise nynh thua.✝

14 zungzae tynpaw Muisaw liate Pachia kya ccaenaw um leipaw, amaw te amaw a pyakuhpaw, Khri chii nynh a chihpaw ryalaw kyate a hiinpaw Pachia ryalawpya khylan naemaw nykunaw thinlung kha pawcihmou houh a thyaasah kho cih!

15 Tukeiccuze Khri tuh byakinnaw thawpaw kya-e hopiatu nynh thua, tuhteze nynh Pachia nynh a ko hae paw tuh bya a kinpyaku hae paw zungzae tynpaw rho uccaw kha a ccou kho cih hae, pawccecize masaty byakinnaw zakaw kya cyiseimenaw kha shawkhaw khylan Khri tuh chinaw a ing vae.

16 Rhohuinaw kong hynh ho lanze rhohuitu a chih koute rou nynh zui lanpaw athua. 17 Pawccecize rhohuitupaw a chih koute nynh rhohuinaw tuh cyi khonaw a hoi, rhohuitu phang a hiin lya tuh rhohuinaw nynh kharouh kaw hoi kho khyh. 18 Tukeiccuze masaty byakinnaw kha heize chii leite tynsah thua khyh. 19 Pawccecize Moses nynh kawbya ccauh kya-e kawbya miakaw kha ccungccaw hae balyn kalan a hopah kou hae te, tui pykuhpaw vaetuataw chii te miaa chii kha lah zah sekakungpaw tuuming te hyssop khate ccauh te ccungccaw hae balyn kha thei hae zah,✝ 20 "Hynh-e tuh Pachia nynh nanning ae pya oh paw byakinnaw kya-e chii nynh thua," a ci.

1 Pawccecize kawbya tuh yn thua cih paw ahoypaw uccaw hae mynlyh thua zah uccaw hae muinsan ccaccing thua khyh, kum takyhte pyapaw alokuhpaw silawnaw liate amaw kalan a naekuh hae paw kha kharouh ccingsah kho khyh hae. 2 A ccingsah kho lanze, silawkunaw kha phe a la umtaw vae cih hae khaw? Pawccecize a beiktu hae tuh zungzae hanlan vaekheit te sei thyaasah athua hae ze, mih seinaw nykunaw thinlung hoi vae lan khyh hae. 3 Thuasalama tuh-e silawnaw kya tuh seinaw bua liathuinaw kum takyhte a um. 4 Pawccecize tangnuapaw hae te miaa hae chii nynh seinaw po lawpya lanpaw tuh thua kho khyh.

17 Tukeiccuze humhung zemah Khri kya a um lanze, aning tuh rae thawpaw ccungccaw nynh thua; arynpaw uccaw miakaw tuh marya zo zah, pawpaw balyn tuh athawpaw lang a tang vae. 18 E hae balyn tuh Pachia kyate nynh thua; Pachia nynh Khri liate aening kha amaw ryte bua oun ccawsakuthui zah, ccawkuthuinawpaw rya kha kaening oun pya; 19 tuh-e tuh, Pachia nynh laephi ccungccaw hae mih cyiseinaw kha ccuinpya vae leite, Khri liate minmin kha amaw te bua a ccawsakuthui hae, tuh-e ccawsakuthuinawpaw bya tuh kaening kya phe oun ap vae. 20 Tukeiccuze kaening tuh Khri hanlan locceihtu hae nynh kae thua; Pachia nynh kaening kha mangte ae hyy oh; nanning nynh Pachia te bua na ccawkuthui nawlan oh, kaening nynh Khri ccelang kae ngia oh. 21 Pawccecize Pachia nynh seinaw a hoi leipaw kha aening keiccuze seinaw a hoipaw lang a tangsah, tuhteze nynh aening tuh tuh-e paw kya Pachia miding lang ah tang kho cih oh.

4 Kaening tuh Khri liate Pachia malang khe tuhcihawpaw zynkunaw kae hoi. 5 Ccangkhakheit tuh kaening kyate nynh yn thua cite ho lan ciate kaemaw nynh kae cyi khopaw um khyh, kaening cyi khonaw tuh Pachia kyate nynh yn thua, 6 byakin thaw kya-e ryalahtu hae lang tang khylan Pachia nynh kaening kha cyi khonaw oun pya vae; tuh-e byakin thaw tuh zeipaw kawbya kya-e thua leite, Muisaw kya-e nynh thua; pawccecize zeipaw kawbya nynh tuh hiinnaw kha a chia, thuasalama Muisaw nynh tuh hiinnaw kha a pya.✝

11 Tukeiccuze pynsaw kya kuih te vingdungawkuh hae paw nynh "vingdungawkuh lei hae paw" cite ae la ko oh paw nanning tuh langmawlya pynsaw lante Zenta hae na la thua oh paw kha liathui oh. 12 Tuh ccyh lyaze nanning tuh Khri leite na la um oh paw, Israel ccazing kya umbua leite ramccang hae na thua oh paw, byakinpyakupaw byakinnaw te asekuh leipaw mikhia hae na la thua oh paw te ngaehoinaw hoi leite Pachia leite laephi kya na la um oh paw kha liathui oh. 13 Thuasalama langmawlya kou na la sawkuh oh paw nanning kha atu tuh Khri chiise liate Khri Jesu kya naesaku na thua vae oh.

10 Sungsakunaw cipaw tuh: Aening nynh Pachia kha ah sungsah oh cipaw thua leite, Pachia nynh aening kha oun sungsah zah a Ccapaw kha aening seinaw ngaethyanaw elang yn saw.