As 10 parábolas mais importantes de Jesus

3 Kweyi okelase ikweyi koza nwashika dawa, kamo, <<Osheho gebe ko myizire eho nu; 4 Ishini oya myizire ni, ashishini kizire shonu okoka kowe, ebeni ano wayi kpore. 5 Ashishini shonu ebeni gbo okpo ni, ebeni gbagye nwashika lo ni obwu papa, koni agye nwashika lo ni. 6 Ishini eno bose ni osizire, koni ogbawa pya agye neshi lo ni, angmongmo. 7 Ashishini kizire shonu ipu kigye, kweyi igye gye yuwa bya. 8 Ashishini shonu ipu ka agye neshi, gye kweyi mizire, ashishini ma asa ni gbi ikpo ogbogbo oye, ashishini wa awehiri, kpa aweta ko oza ni otu ni. 9 Ase ni gba akpaha ko pwela na pwo.>>

Elase ikweyi ko ongo ko Osamariya ni gbi iyinyinyi ni

25 Ishi oye, inofono oye nyiso hagye iso ko mo Oyesu ma. Odo oka mo, <<Inofoza, ojini nyyaya shina pyo olayi ko gbogbo-gbogbo?>>

26 Okyogwu mo, <<Oji ni ata ipu ko okpa ko ono? Oma moji ipu ni?>>

27 Okamo <<<Yimu ka Adole Owuso wo kpo otu wo kpiri, kpo omaku wo kpiri, kpo oshu wo kpiri, ki kpo ogyogye wo kpiri> kweyi, <Yimu ko oya ko oyagye wo byoni oyimu ki iyo ni.>>>

28 Oyesu ka da anu mo, <<Okela gyogye, ya mani oya pyo olayi.>>

29 Anu ke ya yimu ko shiyo Oyesu mo anu gbo ozalabi lo, odo oka mo, <<Anoho wo oya ko oyagye hin?>> 30 Oyesu kyogwu mo, <<Ongo oye bwo Ojerusele wa go Ojeriko, owa ga abo ka awowiyi. Ayo oshiye ke, agwo gbi ishini osheku kweyi aga wa. 31 Osapa oye wa shigbo bwo owe ni, ishini omo ongo mani ni, obwo okoka kweyi ganu. 32 Mamani ongo oye bwi ipwoma ko Olawi, obwe ebeni kweyi omo, obwo okoka kweyi ganu. 33 Ongo ko Osamariya oye ke wa shigbo, obwe ebeni ongo mani gwutagye ni, omi iyinyinyi nu. 34 Oge ebe nu, ga bo oza ipi, kweyi sha ano kpi inyi anu. Ebeni oyo ongo mani yi ti ikweyi ko odagyi nu kweyi byo go ole ka awogboga kweyi yi iyi kwo. 35 Ni ebe nya ni oda ase ni ya yi iyi kwe ebeni ni opami epa kweyi kamo, <Yi iyi kwo, ishini nkwikye wa, nyya da awo oza ni ongmo ikweyi ko ikwiri ni ndawo mani.>

36 Oyesu do oka mo, <<Anoho ipu kase eta mani ni oma mo owo oya ko oyagye ko ongo ni awowi gwo mani?>>

37 Inofono kyogwu mo, <<Ase ni mi iyinyinyi nu ni.>> Oyesu ka da anu mo,

<<Awo, gaya mamani.>>

4 <<Owoni ashe ipu kala gbo otukpo ogbogbo oye kweyi oye ipu wa gebi, oya gege ko sha awahane ayahane bita ikpokyi kweyi ga labo ko oye ni gebi ni lo? 5 Owoni opyo, oya shotunehe kweyi yayo ya so oko 6 kweyi ya go ole. Ebeni oya ya awoya nu kpa awase ni bagye kwo ni ogwu wa bagye kweyi oya ka da awa mo, <Ala shotunehe kpami, npyo otukpo hin ni gebi ni.> 7 Nyya kadala mo mamani ase ba shotunehe ole kiso ikweyi ki inozalabi oye ni shagbotu ni sha ase awahane ayahane ni wa aseneshi ni gbo shagbotu ke lo ni.

Elase Ikweyi ko Oyi ni Gebi ni

11 Oyesu kamo, <<Ongo oye gba ayi epa. 12 Oyi leke ka da ada nu mo, <Ada, da ami ogwu hin.> Ebeni oyo ogwu nu yiko we epa da awa.

13 <<Gbeji lo, oyi leke kpo oza ni ogbo ni, kweyi go okpagye ni lenu ni ga yebe ni yo oza ni ogbo ni ngmo owe ni shoshi lo ni. 14 Ishini oyi ikwiri nu ngmo kweyi ni, emye kotota go okpagye ni kweyi ogbo ojije ko re lo. 15 Ebeni oga zo oko ki ikwiri ebe kase ko okpagye ni yo ga da aruma nu oza rore eho ni. 16 Oya tikpo ka akya ni aruma ba ha ni shini anu na ha, ashishe ke da anu lo.

17 <<Ishini okwikye wi iyinu ni, okamo, <Awoyoko da ada hin we ema ni aba roza ba shibita, ami ke ye ebeni ya gekwu kpe emye! 18 Ami ya kwikye ya ge ebe ka ada hin kweyi ga ka da anu mo: Ada, nyyo ozalabi obutu ko Owuso kpo obutu wo. 19 Nshu koni oya yumo ogwu mo nwwo oyi wo lo, yun na lema byo oye ipu ka awoyoko wo.> 20 Ebeni onyiso kweyi ge ebe ka ada nu.

<<Ni oke tayayo ye ebe lenu ni, ada nu mo kweyi iyinyinyi yo kwu, kweyi onyinya ge ebe ko oyi nu kweyi kwo botu ki gwo okwunu.

21 Oyi nu ka do anu mo, <Ada, nyyo ozalabi obutu ko Owuso ki iso kpa awo, nshu koni oya yumo ogwu mo nwwo oyi wo lo.>

22 Ada nu ke ka da ayole nu mo, <<Ala nyinya papa ga kpo obagidi neshi bwo oda wa sho oko. Ala la arika abo kpo okpabawu ikpo. 23 Ala ga ngme ena nyakwu, shini ahan yi imya kpo otunehe. 24 Ikweyi koni oyin mani gekwu onabani oke onyiso, ogebi ayo pye.> Ebeni akwotu ko shotunehe.

25 <<Ipu ki ishi oni, oyi nu anyakwase ye eho ya yoko. Ishini oyo pee kpo ole ni, opwo aba gwodu kweyi ba gyoba. 26 Ebeni oyo oye ipu ka ayole ogwu kweyi do oka mo oji ya gbodagye. 27 Okyogwu mo, <Oyene wo wa, kweyi ada kala ngme ena nyakwu ikweyi koni okwikye wa neshi kpo oshu ni.>

28 <<Otu ko oyi nu anyakwase bya kweyi otanu ko gipu ole. Ebeni ada nu bose kweyi wa shagye da anu. 29 Anu ke ka da ada nu mo, <Ma! Ishayi nwashika ni shigbo ni, nyyoko dawo byoshe ni, nggwakpaha dawo lo. Kwo oyi ki ikpowu oda ami shini na shotunehe kpa awoya hin lo. 30 Ishini oyi wo ni ke kpo odu wo kweyi ga yi ngmo kpa awagbaza ni kwikye wo ole, ongme ena nyakwu da anu!>

31 Ada nu kamo, <<<Oyin,> oyo kpa ami ishi kpiri, kweyi oza ni ngbo kpiri wa akakoho la. 32 Aha ke shu ko shotunehe kotata, ikweyi koni oyene wo gekwu, onyiso, ogebi kweyi ayo pye.>>

45 <<Mamani, ayikoko ko Oyesu ki iso lema bya awo yo otoyu ni ba labo ki ikikpo yoyu ko ra. 46 Ishini opyo olamu ni shoshi ki gbo ikwiri ni, ebeni oga ya awo oza ni ogbo kpiri ni yikpo ra, kweyi oga ro oni.

Elase Ikweyi ko Ofarisi kpi Inozegba

9 Oyesu ki kelase ikweyi kawase ni gbotu ipu koneshi wa kweyi ba mamo awa shashi sha shishini: 10 <<Ango epa gipu ko Ole ko Owuso ko ga tinarigwu, oye wo Ofarisi, omwepa wi ino zegba. 11 Ofarisi nyiso kweyi tinarigwu ikweyi ki iyinu mo: <Owuso, nkeshi wo koni nlema byase shishini lo ni; nyya wiyi lo, nyya yo ozalabi lo, nyya beba lo, nke le byi inozegba mani lo. 12 Nyya kwokwunu igbe epa ipu ko obize. Kweyi nyya zo oye ipu ki igwo ko oza ni ngbo ni kpiri.>

13 <<Inozegba ke hagye ebe lenu. Ogege ziyi mi iso lo, okwagye ya shagye mo, <Owuso mi iyinyinyi hin, inozalabi.>

14 <<Nyya kadala, inozegba go ole kpo ozalabi lo ebe ko Owuso, ole bya ashe oni lo. Koni ase ni zi iyinu iso, aba zo wo ojije lo, ase ni ke yikweyi bagye, aba zo iso.>>

Elase ikweyi ka Ayole Eta

14 <<Mamani, obula ko Owuso ya lema bya Adole oye ni ya giyawu ni, oya awoyole nu ogwu, kweyi oyodu dawa abo. 15 Ashe odanu ozinariya okpakwu eho, ashe ozinariya okpakwu epa, ashe ozinariya okpakwu oye, ananoho wa odanu gyogye kpo oshu nu. Bwebe ni oganu giyawu. 16 Oyole ni zo ozinariya okpakwu eho ni, ga yo otoyu kpa nu, opyo okpakwu eho manu. 17 Mamani oyole ni zo ozinariya okpakwu epa ni ga yo otoyu kpa nu, opyo okpakwu epa manu. 18 Oyole ni ke zo ozinariya okpakwu oye ni ga bwogo yo okpakwu oye ka Adole nu yi teba anu.

19 <<Ipu kishi gbeji, adole ka ayole mani kwikye bwiyawu nu wani, oyuwogu shini ana wa koza ni aya kpikwiri ni odawa ni. 20 Oyole ni zo ozinariya okpakwu eho ni wa kwagye obutu nu kweyi kamo, <Adole, odami ozinariya okpakwu eho ko yo otoyu. Ma, nki pyo okpakwu eho manu.>

21 <<Adole nu kamo, <Nngmagye, oyole neshi kpo otuse! Oyoza ko otuse kpo oza gbayayi; nyya yo ya wo oteyi koza nwashika. Wa shini an shotunehe dudu!>

22 <<Oyole ni zo ozinariya okpakwu epa ni wa kwagye obutu ka adole nu kweyi kamo, <Adole, odami ozinariya okpaku epa ko yo otoyu. Ma, nki pyo okpakwu epa manu.>

23 <<Adole nu kamo, <Nngmagye, oyole neshi kpo otuse! Oyoza ko otuse kpo oza gbayayi; nyya yo ya wo oteyi koza nwashika. Wa shini an shotunehe dudu!>

24 <<Oyole ni odanu ozinariya okpakwu oye ni wa kwagye kweyi kamo, <Adole, ngyo kpo otu labi, oya kyi izire ebeni otu lo ni, oya kpi izire ebeni omyi lo ni. 25 Nyyo oshi, ela koni ikwiri wo ya gebi ni, nyyi teba okpagye. Ma, ozinariya wo yoma.>

26 <<Adole nu kamo, <Owo oyole bibi kpa ayaga! Ogye mo nyya kyi izire ebeni ntu lo ni, ya kpi izire ebeni nmyi lo ni. 27 Obi yi ikwiri ni to olashiko, koni ishini nwwa, nbi ya wa zi ikwiri hin kpi inyigwiye.>

28 <<<Ikweyi koni ala zo ozinariya okpaku oye mani yi bize shabo nu kweyi yi dine ko ozinariya okpaku igwo oni. 29 Koni kpiri kase ni gboza aba fumanu danu, kweyi oya gbo nwashika. Ase ni gbojije lo, ko gbayayi ni agbo ni, aba yi kpo shabo. 30 Ala yo oyole yeye mani ta gese ipu kebe dibu, ebe ni oya mowe kweyi ya shabo ahanu ni.>>>

Ongo ni Gbo Odu ni kpo Olazarus

19 <<Olodu oye ni ya sho oshiye neshi kweyi ki yo ole neshi ki ya roza neshi ishi kpiri. 20 Ongo oye iye nu wo Olazarus ya yagye owo ofunu kole nu, ikpiye nu kpiri wi ipi, 21 kweyi oya labo ko ro ozarore ni shonu okpagye obutu ko olodu mani. Iwo ki ba wa pi ipi ki ikpiye nu.

22 Ishini inoboza mani gekwu ni ayoleho wa zo gebe ni Ibirayi yanu ni. Olodu mani ki gekwu kweyi ayo nyi. 23 Oyo ole ko ola ya mowe, oziyi iso kweyi omi Ibirayi ebe lenu kpo Olazarus ashikwu nu. 24 Ebeni osho gwu yo mo, <Ada Ibirayi, miyinyinyi hin kweyi oto Olazarus oleho shini na yo oyi ka abo nu linyo na tumi igbenu shi na sha, ikweyi koni nyya mowe ipu ko ola.>

25 <<Ibirayi ke kyogwu mo, <Oyi, rela ki ishini oya gbo olayi ese ni, ogbo oza neshi kpiri ni oya yimu ni, Olazarus ke ya mebi ishi oni, ishi mani ke oya minyo ebeni kweyi awo ya mowe. 26 Itikpi ko oni ke, otutehe ka aha kpa awo gbo ogo nyakwu shini ase ni ye ebe ni naka gege ge ebe wo lo, kweyi ase ni ye ebe wo naka gege we ebe ka lo.>

27 <<Oka da anu mo, <Ni olemani, nyya bo ada, to Olazarus oleho na go ole ka ada hin, 28 ngba ayene nongo eho ona ga pyuwa akpaha, shini ana ka wi ipu ko owe mani lo.>

29 <<Ibirayi kyogwu mo, <Agbo okpa ko Omusa kpa akawo bane, ana ya akpaha tagye shini ana pwo.>

30 Okamo, <<<Aayi, ada Ibirayi, owoni ashe ke nyiso amiri ge ebe wa, aba shagbotu.>

31 <<Oka da anu mo, <Owoni aya akpaha tagye do okpa ko Omusa kpa akawo bane lalo, kwa ashe nyiso amiri, aba kyogwu kpa anu lo.>>

Elase ikweyi ki ikyashi ipu keho

24 Oyesu kada ase elase oye mo: <<Obula ki iso lema bya ase ni ti izire neshi ipu ke eho nu. 25 Ishini ase kpiri ba gbola ni, oyakonu wa ti ikpo ka akyashi ipu ki izire nu kweyi ganu. 26 Ishini izire gye kweyi gbi ikpo ni, ebe ni akyashi gye lalo.

27 <<Ebeni ayole ga ta adole wa, kweyi doka mo, <Adole, izire neshi pi otu eho la lo? Ojiya ome ni ikyashi bwu ipu nu nwashika?>

28 <<Okyogwu mo, <Omonyekwotu pini yo oza ni oma.> Oyole nu do okamo, <Oya yimu shini ahan ga yawi ikyashi shu shonu?

29 Okyogwu dawa mo, <Aayi, owoni ala ga ko sha akyashi, alaba yi izire shu kpa akyashi dudu. 30 Ala shuwa bita na gye dudu gbishi ko kyi izire. Ishi oni nyya ka da awokyi izire: Ikikyo ala yi ikyashi gwu tukpa ebye kponu kweyi yo ola kwo; kweyi ala kpi izire shi ipu ko owuya hin.>>>

Elase ikweyi ki Isonya igwo

1 <<Ishi oni obula ki iso ya lema byo isonya igwo ni bya awikwomu wa kweyi ba yimu ko ga mo oba ko onyape ni. 2 Ase eho ipu wa wo ogbowuru kweyi ase eho ziyi. 3 Ishini ase eho ni wo ogbowuru mani za awikwomu wa ni abya ano ko de sho lo. 4 Awino ziyi mani bya ano nwashika ipu ko ogya kpa awikwomu wa. 5 Oba ko onyape bose papa lo, kpiri wa ba yola, kweyi agbola.

6 <<Otutehe kotu ashuwa iyi kpo oga tota mo: <Oba ko onyape yoma! Ala bose wa ta nu!>

7 <<Ebeni kpiri ki isonya igwo mani nyiso kweyi kya awikwomu wa tu. 8 Awase ni wo ogbowuru mani ka da awino Ziyi mo, <Ala baha ano kala, awikwomu ka aha ba gebi.>

9 <<Awino ziyi ke kyogwu mo, <Aha gba ano nwashika ko gyaha kpiri ka aha lo. Ala gipishi shini ala ga mya.>

10 <<Ishini aba ga ko ga mya ano ni, oba ko onyape wa. Awa ni bebeni ni gboso oba ko onyape gipu kole ebe ki imya. Kweyi ayofunu kole yi ba.

11 <<Gbeji lo, isonya eho mani kwikye wa hagye ese ba yogu mo, <Adole! Adole! Gwofunu daha!>

12 <<Oke kamo, <Nyya ka dala okwokwoshi, ngya ala lo!>

13 <<Ikweyi koni, ala bagye kpera! Ala gyeno kwi ishi lo.