1 Eno ko omweta ayonyape ogya ko Okana ipu ko Ogalili. Kweyi ene ko Oyesu yebeni, 2 kweyi apo Oyesu kpawogboso ebe konyape. 3 Ishini inyi kweyi ni, ene ko Oyesu ga ka danu mo, <<Agbinyi kelo.>>

4 Kweyi Oyesu ka danu mo, <<Ene, onya wakakahin? Ishi hin gye wa lo.>>

5 Inanu ka dayole mo, <<Oza ni oka kpiri ala ya.>>

6 Ebeni epwo kinyo ihiri ni ama kpa akyo hagye ebe ni, ko yodu kikpiye nona ka Ase ko Oyahuda, ibwu kepwo mani ya gogya awepa kwe aweta.

7 Oyesu ka dayole mo, <<Ala shinyo nwawepwo mani.>> Kweyi ashi nwuwa sururu.

8 Ebeni oka dawa mo, <<Ala shi ga dorogwu koka kimya.>>

Aya mani, 9 kweyi orogwu koka kimya gwinyo ni ayi pya winyi mani. Ogyebe ni abyinyi mani bwanu wa ni lo, ayole ni byinyi wa ni pini gye la. Ebeni, oyoba konyape ogwu gokoka, 10 kweyi okamo, <<Aba dase inyi neshi ba gwa ikyikyo ome la, kweyi ishini awogboga kwobonu gwa nwashika ome aba byoni shoshi fakikyikyo lo ni ya wese. Awo ke yinyi neneshi yi teba wishi mani ome obi wese.>>

11 Omani pini woza kigbashi kikyikyo ni Oyesu ya Okana ko Ogalili ni la. Bwebe ni oyigyashi nu yi tese, kweyi awogboso kyogwu kpanu.

12 Bwebeni Oyesu gogya ko Okapanahu kpinanu, ayinanu kpa awogboso, kweyi aga bebeni keno gbayayi. 13 Ni ishi ki Imya ko Sheyi ka Ase ko Oyahuda yo pee ni, Oyesu go Ojerusele. 14 Ipu ko Ole ko Owuso omase ba tora kena, kpikpowu kpo otitiribi, kpa ashishini kase boka ba pyikwiri. 15 Ongogwa kaboshi kweyi onuwenya shipu ko Ole ko Owuso, kpikpowu kpena. Oki sawoka kawo pyikwiri abo, oki yuwikwiri yi myonu. 16 Oka da awotora ko otitiribi mo, <<Ala yawoza mani kpo shebe ni! Ala ka yo Ole ka Ada hin yi pya wipishi lo.>>

17 Awogboso ra ipu kotu wa mo akwobonu yi tota mo, <<Imu ni nggbo do Ole wo ni ya yun byo ola ni.>>

18 Ebeni Ase ko Oyahuda doka mo, <<Oyi koji ni oya shiyaha shini an gye mogboshu ko yoza kpiri?>>

19 Oyesu kyogwu mo, <<Ala yo Ole ko Owuso mani yi kye, nyya kyanu ya ma eno eta.>>

20 Awoyahuda kyogwu mo, <<Ozaha ishayi awene ayihiri ome aha mo Ole ko Owuso mani la, kweyi omo oya kyanu ya ma ipu keno eta?>> 21 Ole ko Owuso ni Oyesu ya kela ikweyi nu ni wikpiye nu la. 22 Ishini onyiso amiri ni, awogboso rela koza ni oka ni. Ebeni akyogwu kpoza ni Okpa ka ni, kpela ni Oyesu kwobonu ka ni.

23 Ishini oyogya ko Ojerusele ebe ki Imya ko Sheyi ni, ase nwashika mawoza kigbashi ni oya ni aki kyogwu kpanu. 24 Oyesu ke ziyinu dawa abo lo, koni ogyoza ni kpiri wa we ni. 25 Oya doka shini ashishe na koza ni awe ni danu lo, ikweyi koni anu abiyinu gyoza ni yotu wa ni.