1 Agbo ongo oye iyenu wo Olazarus ya gbere. Obwogya leke ko Obetani, ogya ko Omeremu kpo oyinanu Omata. 2 Omeremu ni oyinanu wo Olazarus ya gbere ni, anu pini nyo Oyesu ano kpeye ikpo kweyi wikpo kpinyeyi kikweyi nu la. 3 Ayene nonya mani toleho ebe ko Oyesu mo, <<Adole, oyawo moshi ya gbere.>>

4 Ishini Oyesu pwela mani okamo, <<Ere mani ya wa kikwu lo. Aayi owa ko byi igyashi wa do Owuso shini Oyi ko Owuso na pyo igyashi bwebe kere mani.>> 5 Oyesu yimu ko Omata kpo oyinanu Omeremu kpo Olazarus. 6 Koni opwo mo Olazarus ya gbere ni, okwikpo hebe ni oyanu ni kenepa, 7 bwebe ni oka dawogboso mo, <<Ahan kwikye go Ojudiya.>>

8 Awogboso kamo, <<Inofoza, ipu kishi gbayayi ni shigbo ni, Ase ko Oyahuda takirikwu ko takyo, kwikyikyeni oki ya kwikye ya gebe ni?>>

9 Oyesu kyogwu mo, <<Agbo ogye igwepa ipu ke enoye la lo? Ase ni ya yawu isheno ya shikawu lo, ikweyi koni oya mebe bwebe koyoyu kese mani. 10 Owoni ase ya yawu otu oya shikawu, ikweyi koni ebe yoyu yaba danu lo ni.>>

11 Ni Oyesu kela mani kweyi ni, ogohobu ko kela dawa mo, <<Oya ka aha ko Olazarus gbola, nke ya gebe ni koga shiyi.>>

12 Awogboso kyogwu mo, <<Adole, owoni oya gbola, oya pyo ogege.>> 13 Oyesu ya kela ikweyi kikwu nu, awogboso ke ba ma byo oya kela kola ni agye ni la.

14 Ebeni Oyesu ka dawa mo, <<Olazarus gekwu, 15 kweyi ikweyi kala nshotunehe koni nyyebe ni lo ni, shini ala kyogwu. Ahan gebe nu.>>

16 Ebeni Otoma ni aba yogwu mo ayapule ni ka dashini kawogboso mo, <<Ahan ga, shini an ga gekwu kpanu mamani.>>

17 Owowa nu, Oyesu pwo mo Olazarus kwobonu yeno ene amiri wa. 18 Enu ko Obetani kpo Ojerusele fomeli epa lo, 19 kweyi Ase ko Oyahuda nwashika webe ko Omata kpo Omeremu kowa kawotu agye kikwu koyinawa. 20 Ishini Omata pwo mo Oyesu ya wa ni, oga gbayi kpanu owe, Omeremu ke yagye ole.

21 Omata ka do Oyesu mo, <<Adole,>> Obi yebe ni, oyene hin bi ya gekwu lo. 22 Nke gye mo koni aba kela mani Owuso ya dawo ojoji ni odoka.>>

23 Oyesu ka danu mo, <<Oyene wo kiya shiyi.>>

24 Omata kyogwu mo, <<Nggye moya shiyi ishi ko nyiso ka amiri eno kokweyi.>>

25 Oyesu ka danu mo, <<Ami wonyiso ikwu kpo olayi la. Ase ni kyogwu kpami, ko ogekwu, oya gbo olayi, 26 kweyi ase ni yiyi kweyi ki kyogwu kpami oya gekwu goga lo. Okyogwu mani?>> 27 Okadanu mo, <<Nkyogwu, Adole, mawo wo Okristi, Oyi ko Owuso ni ya wipu kese mani ni.>>

28 Ishini okela mani kweyi ni, okwikye ga yo oyinanu Omeremu ogwu gokoka. Okadanu mo, <<Inofoza wa, oya doka wo.>> 29 Ishini Omeremu pwo mani, onyiso papa ga tanu. 30 Ishi oni Oyesu fipu ko ogya wa lo, otayayo yebeni Omata ga tanu ni. 31 Ishini Ase ko Oyahuda ni bo ole kpo Omeremu ba kanotu agye ni ma ni onyiso papa gese ni, agboso, aba ma byoya ga amiri ko ga kyegba la.

32 Ishini Omeremu febeni Oyesu yanu kweyi omo ni, ogbo obutu nu kweyi kamo, <<Adole, owoni obi yebeni, oyenen bi ya gekwu lo.>>

33 Ishini Oyesu mo ya kyegba kweyi Ase ko Oyahuda ni wa kpanu ni ba kyegba kpanu ni, oza ni domaku nu ose kotata kweyi otu nu bya. 34 Oduwoka mo, <<Ala yonyi ebenya?>>

Aka danu mo, <<Adole, wa ma.>>

35 Oyesu kyegba.

36 Ebeni Ase ko Oyahuda kamo, <<Medo ki imu ni ogbo danu ni!>>

37 Ashini wa ke kamo, <<Anu ni yofiyi mebe ni gege wobi kikwu ko ongo mani lo?>>

38 Otu ko Oyesu ki bya kotata kweyi ogebe ka amiri. Amiri ke yowu kokpo kweyi ayo okpo sokwunu ko owe. 39 Oyesu ka dawa mo, <<Ala yokpo oni bize.>>

Omata, oyene ko ongo ni gekwu mani ke kamo, <<Adole, anani oya kwipi wa, koni oyebe ni keno ene yoma.>>

40 Ebeni Oyesu kamo, <<Nka dawo mo owoni okyogwu oya mo igyashi ko Owuso lo?>>

41 Mani oni ayokpo ni bize. Ebeni Oyesu ziyi iso kweyi kamo, <<Ada, nshotunehe dawo ikweyi koni opwela hin ni. 42 Ngye mipu kishi kpiri oya pwela hin, npa ya ka mani wakoneshi kawase ni hagye mani, shini ana kyogwu mawo pini tumoleho la.>>

43 Ishini okela mani kweyi ni, Oyesu yogwu kpoko nyakwu mo, <<Olazarus, wese!>> 44 Ongo ni gekwu mani yawu wese, kweyi abo kpikpo nu lola kpo opa, kweyi ayiki kaheyi nu.

Oyesu ka dawa mo, <<Ala yoyi shini ala shobita na ganu.>>

45 Mani oni, Awoyahuda nwashika ni webe ko Omeremu, kweyi na moza ni Oyesu ya ni, akyogwu kpanu. 46 Ashini wa ke gebe ka Awofarisi ga ka dawoza ni Oyesu ya ni. 47 Ebeni awose kawosapa kpa Awofarisi yogwu kogbayi ko onongbo.

Adoka mo, <<Aha ba ya moji yoni? Ongo mani ya yoza kigbashi nwashika. 48 Owoni aha shobita ya gohobu mani, ananoho ba kyogwu kpanu, kweyi ase ko Oroma bawa yo Ole ko Owuso kpagye ka aha bize.>>

49 Ebeni ashe ipu wa iye nu wo Okayafa, ni wosapa nyakwu ishayi oni, kela mo, <<Ala gyojije lo kpiri-kpiri! 50 Ala gye moya shoshi dala shini ashe na gekwu ikweyi kasuse shoni ebi ya yo okpagye kpiri re ni lo?>>

51 Ela ni oka mani bwebe kiyinu lalo. Koni ishayi oni anu wosapa nyakwu la ni, obane mo Oyesu wa gekwu ikweyi ko okpagye kpiri, 52 kweyi wikweyi ko okpagye oni kin lalo, ke wikweyi kayi ko Owuso ni pasha ni, shini ana kpuwa gbayi kweyi yuwa wo oye kponu. 53 Mani oni bwishi oni gohobu aba gbela ko yo ngmo.

54 Ikweyi koni Oyesu yawu ese kyaa ipu kase ko Oyahuda kelo. Abishi koni okwikye ga agbabo ni yokwunu kinweshi ni, ogogya leke oye ni aba yogwu mo Ifuremu ni, oga yagye ebe ni kpa awogboso.

55 Nishi ki Imya ko Sheyi ko Oyahuda yo pee ni, ase nwashika sho okpagye wa bita go Ojerusele, koni owodu wa ko ga yiyiwa na sere ebe ko Owuso gbeyi ki Imya ko Sheyi ni. 56 Abipu ko tikpo ko Oyesu, ishini ahagye ebe ko Ole ko Owuso ni, aba diyiwa oka mo, <<Ala ma moji? Oya wi Imya mani lo?>> 57 Awose kawosapa kpa Awofarisi kwobonu zoko mo ase ni wa gyebe ni Oyesu yanu ni, ona ka shini ana yo kwu.