1 Bwikyikyo Ela yaba, Ela mani yo kpo Owuso, kweyi Ela mani wo Owuso. 2 Oyo kpo Owuso bwikyikyo.

3 Bwebe nu ayojoji kpiri, bwebe nu lalo abiba yojije lo. 4 Olayi yipu nu, kweyi olayi mani webe yoyu kasuse. 5 Ola mani yayu ipu kebe dibu, ebedibu ke gege yogwu lo.

6 Ongo oye ni Owuso toleho ni wa, iye nu wo Oyohana. 7 Owa ko wa yolobene kebeyoyu, shini bwebe nu asuse kpiri na kyogwu kpanu. 8 Anu abiyinu pini webeyoyu lalo; owa kin kowa yolobene kebeyoyu la. 9 Ebeyoyu ko kwokwoshi wa yu dase kpiri ni bipu kese ni.

10 Oyipu kese, kweyi bwebe nu pini ayese la, ase kese ke gyo lo. 11 Owebe kase nu, ake tela ko zo. 12 Kwikyikyeni kpiri kase ni zo ki kyogwu kpiye nu ni, odawoshu ko wayi ko Owuso. 13 Awayi moma kasuse kwe akimu kotu kasuse lalo, ke womoma ko Owuso la.

14 Ela mani wa wasuse kweyi yagye ipu kaha. Aha migyashi nu, igyashi koni anu fufunu wo Oyi ka Ada ni, oki nwonwu kponeshi kpokwokwoshi.

15 Oyohana yolobene ikweyi nu. Okela kpoko nyakwu kamo, <<Anu mani pini wase ni nkela ikweyi nu ni la, <Anu ni yawa itikpi hin ni shun, ikweyi koni oyaba kwobonu dami.>>> 16 Bwebe ko oneshi nu pini kpiri ka aha pya aboneshi ni gbo kweyi lo ni. 17 Owuso daha ono bwebe ko Omusa; oneshi kpo okwokwoshi bwebe ko Oyesu Okristi. 18 Ashishe mo Owuso ebyibye lo, Oyi nu fufunu pini mo la, ni woye kponu kpa Ada ni, oyase gyo.

19 Omani wolobene ko Oyohana ishini awoteyi ko Oyahuda ko Ojerusele tawosapa kpayi ko Olawi oleho shini ana doka kase ni owe ni. 20 Oyohana ke tawashu lo, okyogwu mo, <<Ami wo Omezaya lalo.>>

21 Adooka mo, <<Awo wanoho? Owi Iliya la?>>

Okamo, <<Ami lalo.>>

<<Owi Inobane la?>>

Okamo, <<Aayi.>>

22 Ogwejeji akamo, <<Awo wa anoho? Ka daha shini ahan ga ka dawase ni taha oleho ni. Oji ni oka ikweyi kiyo?>>

23 Oyohana kyogwu bwipu kela kinobane Ishaya mo, <<Ami woko ni ya yogwu ipu kododa ni ya kamo, <Kyowe tiriri da Adole.>>>*

24 Bwebe ni Awofarisi ni atuwoleho ni 25 doka mo, <<Ojiya ni oyase obatisma owoni owo Omezaya kwi Iliya kwinobane lalo?>>

26 Oyohana kamo, <<Nyya yo obatisma kpinyo, ashe ke hagye ipu kala ni ala gyo lo ni. 27 Anu pini ya wa itikpi hin la, ni ogwa kokpabawu nu, nggye ko yiyi lo.>>

28 Kpiri koza mani gbodagye Obetani agbabo kishu ko Ojoda, ebe ni Oyohana ya yase obatisma ni.

29 Gbebenya Oyohana mo Oyesu ya webe nu kweyi okamo, <<Ala mo Oyi ko Otukpo ko Owuso, anu ni ya wa zozalabi kese ni! 30 Anu pini wase ni nyya kela ikweyi nu mo, <Ase ni yawa itikpi hin ni shun, ikweyi koni oyaba kwobonu dami.> 31 Ami abiyun gyoo lo, oza ni ya ni nke ya yobatisma kpinyo ni oma shini ana yo shiyase ki Izrayila.>>

32 Ebeni Oyohana yolobene mo, <<Nmo Omaku sa bwiso wokpagye byo otitiribi ni kweyi wa kwikpiye nu. 33 Ami gye mo owanu lo, ase ni tumoleho ko yo obatisma kpinyo ni pini ka dami mo, <Ase ni omo Omaku sa ikweyi nu, anu pini yawa yo obatisma kpo Omaku ko Owuso la.> 34 Nma kweyi nkyogwu mo Oyi ko Owuso pini yoma.>>

35 Gbebenya, Oyohana kpa awogboso epa hagye. 36 Ishini omo Oyesu ya shigbo ni, okamo, <<Ala mo Oyi ko Otukpo ko Owuso!>>

37 Awogboso epa mani pwoza ni oka ni kweyi agboso Oyesu. 38 Oyesu pyiyi kweyi omuwa ba gboso, kweyi oduwoka mo, <<Oji ni ala ba yimu?>>

Akamo, <<Inofoza, ebenya ni oyo?>>

39 Okyogwu mo, <<Ala wa, ala ba ma.>>

Aga kweyi aga mebe ni oya nu ni, abo kogye ene konose kweyi abagye kpanu dudu eno ni.

40 Andru, oyene ko Osimo Obitrus woye ipu kawogboso Oyohana epa ni pwela ni Oyohana ka kweyi gboso Oyesu ni. 41 Oza kikyikyo ni Andru ya ni, oga tikpo ko oyinanu Osimo kweyi ka danu mo, <<Aha pyo Omezaya, Okristi.>> 42 Obyo gebe ko Oyesu.

Oyesu tiyi mo kweyi okamo, <<Awo wo Osimo, oyi ko Oyohana. Aba yogwu mo Okefas. Ni woye kponu kpo Obitrus ni, ikweyi nu wo <<okpo.>>

43 Gbebenya Oyesu go Ogalili. Kweyi ogebe ni Ofilibus yanu ni oka danu mo, <<Gbosun.>>

44 Ofilibus kpa Andru kpo Obitrus wase kogya ko Obetseda. 45 Ofilibus mo Onataniye, kweyi oka danu mo, <<Aha mase ni Omusa kela ikweyi nu ipu kokpa ko Ono, kpa kawo bane ni mo, Oyesu ko Onazareti, oyi ki Isu.>>

46 Onataniye dooka mo, <<Oje neshi ya bose bwo Onazareti?>>

Ofilibus kamo, <<Wa shini oga ma.>>

47 Ishini Oyesu mo Onataniye ya webe nu ni, oka danu mo, <<Ala mase ki Izrayila ko okwokwoshi, ni ya gyashishe egya lo ni.>>

48 Onataniye dooka mo, <<Oyamoji gyun?>>

Oyesu kyogwu mo, <<Ome Ofilibus na yoogwu, nmoo yotu kefu ko Ofigi.>>

49 Onataniye ka danu mo, <<Inofoza, awo wo Oyi ko Owuso la; Ose ki Izrayila.>>

50 Oyesu kamo, <<Okyogwu ikweyi koni nka dawo mun moo yagye otu kefu ko Ofigi ni? Oya wa mawoza nwashika ni shomani ni.>> 51 Ebeni okamo, <<Nyya ka dala okwokwoshi, ala ba miso gwogwa, kweyi ayoleho ko Owuso ba toshi ba sa ikweyi ko Oyi ka Asuse.>>