1 Imya ko Sheyi sheno ihiri, Oyesu go Obetani, ebe ni Olazarus ni Oyesu yo nyiso ikwu ni. 2 Ebeni ayozarore ko onose do Oyesu. Omata kozarore dawa, kweyi Olazarus yipu kawase ni bagye oka ko roza kpanu ni. 3 Ebeni Omeremu zogya ka ano kpeye ni gbakwekye ni, osho Oyesu ikpo kweyi yikpo wa kpinyeyi kikweyi nu. Ebebenya ole ni kpeye kpano.

4 Ashe ipu kawogboso Oyesu ni aba yogwu mo Oyahuda Iskariyoti ni wa yo ra ni kamo, 5 <<Ojiya ni oya ya ano mani yishi? Abi yano mani ra kweyi yikwiri yi dawoleha. Ikwiri kano oni ya go odinari ogbogbo eta.*>> 6 Okela mani ikweyi koni owowi ni la, oya byotu ikweyi kawoleha lalo, anu pini ya byikwiri la, oka mani ikweyi koni oya tiyinu abo kpoza ni aba tipu kolashiko ni.

7 Oyesu kamo, <<Ala shobita, ona shanoni bita gbeyi ke eno ni aba yun nyi ni. 8 Oleha baba kpala ishi kpiri, ami ke ya yo kpala ishi kpiri lo.>>

9 Awoyahuda nwashika pwo mo Oyesu yo Obetani, aga ko ga mo ki kpo Olazarus ni nyiso ikwu ni. 10 Ebeni oteyi kawosapa ya tikpo ko yo Olazarus ngmo mamani, 11 koni ikweyi nu pyi Ase ko Oyahuda nwashika ba gebe ko Oyesu kweyi aba kyogwu kpanu la.

12 Gbebenya, ogbayi kewa ni wi Imya ko Sheyi ni pwo mo Oyesu yowe ko go Ojerusele. 13 Agokwari kweyi bose ko ga gbayi kpanu, ba sheha mo,

<<Osanna!>>

<<Otunehe yo kpase ni yawa ipu kiye ka Adole ni!>>

<<Otunehe yo kpo Ose ki Izrayila!>>

14 Oyesu pyo oyi kodagyi oye kweyi oyagye ikweyi nu byoni ayitota ni mo,

1 15 <<Ala ka yoshi kojije lo, Ayi nonya ko Osiyona;

Ala ma, ose kala yawa oma,

Oyagye ikweyi ko oyi ko odagyi!>>

16 Ikyikyo awogboso gyawoza mani lo. Ishini azo Oyesu ipu ko igyashi nu ome agye mawoza mani ayitota ikweyi nu kweyi ayawoza mani danu.

17 Ishini ewa kasuse ni bebeni ishini oyo Olazarus ogwu bwa amiri kweyi nyiso ni agohobu ko koshu mani ebebe nya. 18 Ase lewa, ikweyi koza kigbashi ni apwo moya ni, abose gese ga gbayi kpanu. 19 Awofarisi ka diyiwa mo, <<Ala ma! Aha ngmeyi koza ni aha bose ko ga ya ni wa lo. Ala ma ni ese kpiri ba kanu ni!>>

20 Ishi oni ashini ko Ogirik bipu kawase kwagye ishi ki Imya ko Sheyi ni. 21 Awebe ko Ofilibus, anu ni wase ko Obetseda ipu ka agye ko Ogalili ni, awa bo mo, <<Adole, aba yimu ko mo Oyesu.>> 22 Ofilibus ga kado Andru; Andru kpo Ofilibus ga kado Oyesu.

23 Oyesu kyogwu mo, <<Ishi gye wa ni aba do Oyi ka Asuse igyashi ni. 24 Nyya ka dala okwokwoshi, owoni ikpo ke ewo gbo okpagye kweyi gekwu lalo, oya wikpo oye kin la. Owoni oke gekwu, oya mikpo nwashika. 25 Ase ni yimu ko olayi nu oya yi tonu, ase ni ke tela ko olayi nu ese mani oyi tagye ko gbogbo-gbogbo. 26 Ase ni ya yimu ko yoko dami, owotiri danu ko gbosun. Kweyi ebe ni nyyanu ni, oyole hin ya yebe ni mamani. Kweyi Ada hin ya dayole hin kpiri abokpa.

27 <<Nabani otu hin bya, kweyi nyya kamoji? Na kamo, <<Ada ngmami shipu kishi mani?>> Aayi, ikweyi kishi mani pini wa la.>> 28 Ada, ziye wo iso!>>

Ebeni oko bwipu ki iso ya kamo, <<Nkwobonu zo iso wa, nki ya zo iso.>> 29 Ewa kasuse ni bebeni pwo mani akamo akpula gbo, ashini wa mo oyoleho kela danu.

30 Oyesu kamo, <<Oko mani kela ikweyi koneshi kala la, kaka hin lalo. 31 Ishi mani wishi ko kepwo kese mani, anani aba nose kese mani enya. 32 Kweyi ami, ishi ni angmami bwamiri, nyya pyase kpiri webe hin.>> 33 Oka mani shini ase na gyedo kikwu ni oya wa ga ni.

34 Ewa kasuse ka danu mo, <<Aha pwo ipu ko ono ka aha mo Okristi wa yo kpaha ko gbogbo-gbogbo, bwowe wonya ni oya kamo, <<Owotiri shini ana ngmo Oyi ka Asuse bwamiri>>? Anoho wo <<Oyi ka Asuse mani?>>

35 Ebeni Oyesu kadawa mo, <<Oyoyu mani tayayo kpala kishi gbayayi kin la. Ala yawu anani ni ola yaba ni, shini ebe dibu naka tala lo. Ase ni ya yawu ipu kebe dibu oya gyebe ni oya ga ni lo. 36 Ala kyogwu oyoyu anani ni oyoyu yaba ni, shini ala wayi kebe yoyu.>> Ishini okela kweyi ni, Oyesu shuwa bita kweyi ga teba nu.

37 Ko ni Oyesu yawoza kigbashi mani kpiri obutu wa ni, akyogwu kpanu lo. 38 Omani kpiri gbodagye shini oza ni inobane Ishaya ka ni na gya, okamo:

<<Adole, anoho ya kyogwu kposhu kaha kweyi awanoho ni ashawo oshu ka Adole?>> *

39 Ozani ya ni aba kyogwu lo ni oma, ikweyi koni, byoni Ishaya ki ka ebye ni mo:

40 <<Owuso yuwa wo ofiyi, kweyi yuwotu gbo shini anaka ma kpiyi wa lo, anaka gyikweyi nu ipu kotu wa lo, ake naka kwikye webe hin shini na dawogege lo.>> * 41 Inobane Ishaya ka mani ikweyi koni omigyashi ko Oyesu kweyi okela ikweyi nu.

42 Kwikyikyeni ipu kishi oni ase nwashika kpa ashini kawoteyi ko Oyahuda kyogwu kpanu. Ikweyi ka wo Ofarisi ake ka shese lo koni aba yoshi mo aba yuwa ngma shekpa ni, 43 ikweyi koni aba yimu mo asuse na shawiye shiye shosha bwebe ko Owuso.

44 Ebeni Oyesu ka kpoko nwa mo, <<Ase ni kyogwu kpami, okyogwu kpami kin lalo, oke kyogwu kpase ni tumoleho ni. 45 Ase ni tiyi mun, oya mase ni tumoleho ni. 46 Nwwipu kese byoyoyu, shini kpiri kase ni kyogwu kpami naka yagye ipu kebe dibu lo.

47 Kpiri kase ni ke pwela hin kweyi yoko kpanu lo, nyya kwepwo lo. Ikweyi koni nwwa ko kwe ese epwo lalo, nke wa ko ngmese la. 48 Inokepwo oye yaba dase kpiri ni tela hin kweyi kyogwu kpe ela hin lo ni, ela ni nka ni ya kuwepwo eno ko kweyi. 49 Ikweyi koni ela ni nyya ka ni bwebe hin lalo, Ada ni tumoleho ni ke kadami oza kpiri ni nyya ka ni. 50 Koni ngye mela nu ya dase olayi ko gbogbo-gbogbo. Mani oni ojoji ni nka ni woza ni Ada kadami mo na ka ni kin la.>>