1 Itikpi koni, Oyesu ki bose dayole nu okwunu ki Ishu nyakwu ko Otiberiya agye ko Galili. Owe ni obose dawa ni yoma: 2 Awase ni bebeni wo, Osimo Obitrus kpo Otoma ni aba yogwu ma Apule ni, kpo Onataniye bwo Okana ka agye ko Ogalili, oyi ko Ozebedi, kpa ayole nu epa. 3 Osimo Obitrus ka da awa mo, <<Nyya ga tinyi,>> aka danu mo, <<Aha ba ga kpawo.>> Ebeni abose ga gipu ko owu kinyo, ipu kotu oni akwojije lo.

4 Ototukpokyi, Oyesu wa hagye ega ki ishu, ayole nu ke gye mo Oyesu pi hagye lalo.

5 Oyesu yuwogwu mo, <<Ayene hin, ala kwe ebinyi oyoye lo?>>

Akamo, <<Aayi.>>

6 Oyesu ka dawa mo, <<Ala sheya kala abore ko owu ala ba kwe ebinyi.>> Ni aya mani, agege ko pyeya lo ikweyi koni ebe nwashika ipu keya ni.

7 Ebeni oye ipu kayole ko Oyesu ni oya yimu ni ka do Obitrus mo, <<Adole la!>> Ni Osimo Obitrus pwo ya kamo, <<Adole la,>> ni, okpo oshiye nu kese shoko kweyi shibi gipu kinyo. 8 Ashini kayole gboso ipu ko owu kega ki ishu, kweyi apyeya nwonwu kpe ebinyi, koni alenu kpega ki ishu lo ni. Enu wa kpega ki ishu lema byikpo ogbogbo eta kin la. 9 Ishini abose shipu ki ishu wo okpagye ni, eha kola yebe ni kpe ebinyi yikweyi nu, kpikyoga.

10 Oyesu ka dawa mo, <<Ala bye ebinyi ni ala kwu ni gbayayi wa.>>

11 Ebeni Osimo Obitrus toshi gipu ko owu kweyi pyeya go okwunu kega. Eya kwebinyi nyakwu-nyakwu ogbogbo oye saweho ayeta, koni ebinyi nwashika ipu nu ni, eya ke sha lo. 12 Oyesu ka dawa mo, <<Ala wa shan roza kotukpokyi.>> Ipu kayole nu ashishe gege ko doka mo, <<Awo wanoho?>> lo. Agye mowa Adole la. 13 Oyesu wa zikyoga kweyi odawa, oki dawe ebinyi mamani. 14 Omani wo bose komweta ni Oyesu bose dayole nu itikpi ni onyiso amiri ni oma.

15 Ishini aroza kweyi ni, Oyesu ka do Osimo Obitrus mo, <<Osimo oyi ko Oyohana, oya yimu hin shashini kala mani?>>

Okamo, <<Adole, ogye mo, nyya yimu wo.>>

Oyesu ka danu mo, <<Dayi ko otukpo hin ozarore.>>

16 Oyesu ki kamo, <<Osimo oyi ko Oyohana, oya yimu hin ko okwokwoshi?>>

Okamo, <<Adole, ogye mo, nyya yimu wo.>>

Oyesu kamo, <<Yiyi kwo otukpo hin.>>

17 Oki doka komweta mo, <<Osimo oyi ko Oyohana, oya yimu hin?>>

Otu ko Obitrus bya ikweyi koka ni Oyesu do komweta ni mo, <<Oya yimu hin?>> Okamo, <<Adole, ogyojoji kpiri; ogye mo, nyya yimu wo.>>

Oyesu ka danu mo, <<Yiyi kwo otukpo hin.>> 18 Nyya ka dawokwokwoshi, ishini owisongo, oya gwagya kweyi ya gebe ni oya yimu ni; ishini oke sawukye, oya nata kabo wo kweyi ashe hoha ya shoshiye kweyi ya pyabo gebe ni oyimu ko ga lo ni.>> 19 Oyesu ka mani shini ona sayi kedo kikwu ni Obitrus ya wa ga ni shini Owuso na pyi igyashi. Ebeni oka do Obitrus mo, <<Gbosun!>>

20 Obitrus pyiyi kweyi omoye ipu kayole ko Oyesu ni oya yimu ni ya gbosuwa. Ase ni yagye kpo Oyesu ishini aba roza ki Imya ko Sheyi ni doka mo, <<Adole, anoho wa yo ra?>> ni. 21 Ishini Obitrus mo ni, odo Oyesu oka mo, <<Adole, ongo mani ke?>>

22 Oyesu kyogwu mo, <<Owoni nyyimu nu koyiyi gbishini nyya kwikye ya wa, onya wakaho? Gbosun!>> 23 Ela mani ge ebebenya ebe kawogboso Oyesu mo, oyole nu mani ya gekwu lo. Oyesu ke kamo oya gekwu lo lalo; okamo, <<Owoni nyyimu nu ko yiyi gbishini nyya kwikye ya wa, onya wakaho?>>

24 Oyole nu oni pi yolobene kawoza mani kweyi anu pi tenena mani la. Aha gye molobene nu wo kwokwoshi.

25 Oyesu ki yawoza shini nwashika. Owoni abi yi ta kpiri, Nyya ma mo oda oyoye ese mani ya gyawo okpa ni abi ba ta ni lo.