1 Awofarisi pwo mo, Oyesu ya pya awogboso nwashika sho Oyohana kweyi oki ya yuwa obatisma, 2 Oyesu abiyinu pini ya yo obatisma lalo, awogboso pini ba ya la. 3 Ishini Oyesu pwoza ni aba ka ikweyi nu ni, osho ojudiya bita kweyi go Ogalili.

4 Owotiri danu ko bwagye ko Osamariya. 5 Owa gogya oye ipu ko Osamariya ni aba yo ogwu mo Osayika ni yo pee kpo okpagye ni Oyakubu doyi nu ki Isu ni. 6 Ibwu ko Oyakubu yebe ni, Oyesu nwa bwi iyawu, owa yagye ebe ki ibwu oni. Ishini eno weyi ni.

7 Ishini onya ko Osamariya wa ko shinyo ni, Oyesu ka danu mo, <<Dami inyo na gwa.>> 8 Awogboso gipu ogya ko ga roza rore.

9 Onya ko Osamariya oni ka danu mo, <<Awo wase ko Oyahuda ami wo onya ko Osamariya. Bwowe wonya ni oya dumoka ki inyo ko gwa? Koni Ase ko Oyahuda kpo Osamariya ba gbayi lo ni.>>

10 Oyesu ka danu mo, <<Owoni obigye eshi ko Owuso kpase ni ya doka kinyo mani, obi doka shini ona dawo inyo ko olayi.>> 11 Onya ni ka danu mo, <<Adole, oke gbidu kpogwa ko shinyo lo, ibwu mani libu. Ebenya ni oya pyinyo ko olayi mani? 12 Awo shosoku kaha ko Oyakubu, ni bwibwu mani daha kweyi anu kpayi nu gwa kpo obize nu kpa awogbeho ko obize ni la?>>

13 Oyesu kamo, <<Kpiri kase ni gwinyo mani igyini kiya ngmo, 14 ase ni ke gwinyo ni ami ya dase ni, igyini ya ngmo ebibye kelo. Inyo ni ami ya danu mani ya bwi ibwu ni yapo ko olayi ko gbogbo-gbogbo ni.>>

15 Onya mani ka danu mo, <<Adole, da ami inyo mani shini igyini naka ngmun kelo kweyi shini naka wa shinyo ebe ni kelo.>>

16 Oyesu ka danu mo, <<Ga byo obu wo wa.>>

17 Onya ni ka danu mo, <<Ngbo oba lo.>> Oyesu ka danu mo, <<Oko okwokwoshi ni omo ogbo oba lo ni. 18 Oza ni oka ni wokwokwoshi la, ogbo oba eho, kwa ase ni oyo kpa anu byonabani wo oba wo lalo.>> 19 Onya ni kamo, <<Adole, omoma hin owi inobane la. 20 Awosoku ka aha geyagye do Owuso ikweyi kefu mani, ala Ase ko Oyahuda ke ba kamo ebe ni ashu ko geyagye do Owuso ni wo Ojerusele.>> 21 Oyesu ka danu mo, <<Onya kyogwu kpa ami, ishi yawa ba ni ala ba geyagye da Ada ikweyi kefu mani kwo Ojerusele kelo. 22 Ala Osamariya ba geyagye doza ni ala gye lo ni, aha ke ba geyagye doza ni aha gye ni, koni inongmase bwebe ka Ase ko Oyahuda la. 23 Ishi ke yawa ba, kweyi owa wa ni awo geyagye ko okwokwoshi ba geyagye da Ada ipu ko Omaku kpo okwokwoshi, ikweyi koni awedo kawo geyagye ni Ada ya yimu ni. 24 Owuso wo Omaku, kweyi owotiri shini ana geyagye danu ipu ko Omaku kpo okwokwoshi.>>

25 Onya ni kamo, <<Ngye mo Omezaya ni aba yogwu mo Okristi ya wa ba. Ishini owa, oya owa gwi ikweyi ko ojoji daha.>>

26 Ebeni Oyesu ka danu mo, <<Ini ko kela kpa awo mani, pini wo Omezaya la.>>

27 Ishini awogboso kwikye bwipu ogya wa ni, igbashi yuwa kwu kotata koni awa tanu ya kela kpo onya ni. Ashishe ke doka mo, <<Oji ni oya yimu? Kwe ojiya ni oya kela kpanu?>>

28 Ebeni onya mani sheyi kinyo nu bita, kweyi okwikye gogya ga ka dase kpiri mo, 29 <<Ala wa mo ongo ni koza ni nyya ni kpiri. Kwe anu pini wo Omezaya la?>> 30 Ananoho shipu ko ogya bita kweyi bose gebe ko mo Oyesu.

31 Ebeni awogboso bo mo, <<Inofoza, zoza shini ore.>>

32 Anu ke ka da awa mo, <<Ngbo ozarore ni ala gye lo ni.>>

33 Awogboso diyiwa oka mo, <<Kwashe byo ozarore wa danu la?>>

34 Oyesu kamo, <<Ozarore hin wa ko yo oza kotu kase ni tumoleho ni, kweyi na yoko nu kweyi. 35 Ala gye mo, <Izire ya yo oya ene ome aba yi kye la lo>? Nyya kadala, ala tiyi meho! Izire ze ko kyokye wa. 36 Nabani Owuso ya dino kyizire abola nu, kweyi oya kyizire ko olayi ko gbogbo-gbogbo. Shini inototu kpino kyokye na shotunehe dudu. 37 Bwebe ni, asuse sosa ni kamo, <Ashe wo toza, ashe wo kyoza> ni wokwokwoshi la. 38 Nta ala oleho koga kyoza eho ni ala tu lo ni. Ashishini yoko ni lono ni, kweyi ala ga kyoza koko wa.>>

39 Ase ko Osamariya nwashika ni bogya ni kyogwu kpo Oyesu ikweyi koza ni onya ni ka ni mo, <<Oka dami ojoji ni nyya nekye-nekye ni.>> 40 Ishini ase ko Osamariya webe nu ni, abo mo ona yagye kpawa, kweyi oyeno epa kpawa. 41 Kweyi ase nwashika kyogwu kpo Oyesu bwebe kela ni oka ni.

42 Aka do onya ni mo, <<Aha kyogwu ikweyi ko oza ni oka ni kin lalo, anani aha pwo kpa akpaha ka aha, kweyi aha gye kamo ongo mani pini wi inongmese la.>>

43 Itikpi ke eno epa, oshe ebe ni bita go Ogalili. 44 Ebeni Oyesu abiyinu kadawa mo aba mi inobane gyiyi okpagye nu lo. 45 Ishini owo Ogalili ni, ase ko Ogalili yo omaba. Amo awoza kpiri ni oya ipu ko ogya ko Ojerusele ebe ki Imya ko Sheyi ni, ikweyi koni awa bebeni.

46 Oki kwikye gogya ko Okana ipu ko Ogalili, ogya ni oyinyo pya winyi ni. Kweyi anyakwase ka awonongbo oye ni oyi nu gutagye kere Okapanahu. 47 Ishini ongo mani pwo mo Oyesu kwikye bwo ojudiya wo Ogalili ni, ogebe nu ga bo mo ona wa doyi nu ni yokwunu kikwu ni ogege.

48 Oyesu kadawa mo, <<Owoni ala mo oyi kpoza kigbashi lalo ashishe kala ya kyogwu lo.>>

49 Anyakwase ko onongbo oni kamo, <<Adole, wa shini ahan ga papa lalo oyi hin ya gekwu.>>

50 Oyesu kyogwu mo, <<Ga, oyi wo ya pyo ogege.>>

Ongo oni kyogwu kpoza ni Oyesu ka ni kweyi oga nu. 51 Ishini otayayo yowe yaga ni, oyole nu byoshu wa danu mo, oyi nu pyo ogege. 52 Oduwoka mo ishi wonya ni oyi nu pyo ogege. Aka danu mo, <<Oshu shobita ogye oye kisheno kene.>>

53 Ebeni ada ko oyi mani ra mo abo kogye oye kisheno kene Oyesu ka danu mo, <<Oyi wo ya pyo ogege.>> Ebeni anu kpase kole nu kyogwu kpanu.

54 Omani woza kigbashi komwepa ni Oyesu ya ome ona go ojudiya agye ko Ogalili.