1 Oyesu gikweyi ke Efu ko Ozetu.

2 Otukpokyi okwikye go ole ko Owuso. Kpiri kase wa gbayi obutu nu, kweyi oyagye ya fuwoza. 3 Awofono kpa Awofarisi byo onya oye ni akwo ya beba ni wa. Abyo wa hagye otutehe kewa. 4 Kweyi aka do Oyesu mo, <<Inofoza, aha kwo onya mani ya beba. 5 Ishini Omusa daha ono mani oka daha mo onya ni akwo ya yoza mani, ana takyo gbi ishini ona gekwu. Nabani awo kamoji?>> 6 Oka doda mani weda pini aba ze do Oyesu la shini ana pyowe ko kwepwo.

Oyesu ke yikweyi lagye kweyi ya tenena okpagye kpayabo nu byoya pwuwa lo ni. 7 Ishini abipu koka ba do ni, Oyesu zikweyi iso kweyi ka dawa mo, <<Owoni ashishe ipu kala gbozalabi ebibye lo nawa kikyikyo ko tonya mani akyo.>> 8 Okyikweyi nu lagye kweyi ya tenena.

9 Bwebe ni awase ni pwela mani ni kwotu ko shebe ni bita bwa anyakwase wa ayeke, gbishini asho Oyesu kpo onya ni bita hagye ebe ni. 10 Oyesu zikweyi iso kweyi doka mo, <<Onya, abebenya? Ashishe wa kwepwo lo?>>

11 Okamo, <<Ashishe lo.>>

Oyesu ka danu mo, <<Ami ki ya kwepwo lo. Gawo, ka yozalabi kelo.>>

12 Ishini Oyesu ki kela dase ni okamo, <<Ami wo oyoyu kese la. Ase ni gbosun oya yawu ipu kebe dibu lo, ke ya gbo oyoyu ipu ko olayi nu.>>

13 Ebeni Awofarisi ka danu mo, <<Awo ya yolobene abiyo, olobene ni oya ya ni wa ko kwokwoshi lalo.>>

14 Oyesu ka dawa mo, <<Owoni nyyo olobene abiyun, olobene hin wa ko kwokwoshi la, koni ngye ebe ni nbwanu wa ni, nki gyebe ni nyya ga ni. Ala ke gyebe ni nbwanu wa ni lo kwe ebe ni nyya ga ni lo. 15 Ala ba kepwo kiyi kasuse la, ami ke ya kwa ashishe epwo lo. 16 Owoni nke kwase epwo, epwo hin wa ko kwokwoshi la, ikweyi koni ami yo fufun lalo. Ada hin ni tumoleho ni yo kpami. 17 Ipu ko ono kala ayi tota mo owoni ase epa koje kponu, owotiri shini ana kyogwu kpolobene wa. 18 Ami ya yolobene ikweyi kiyun, koni olobene hin komwepa pini wa Ada ni tumoleho la.>>

19 Ebeni adoka mo, <<Ada wo yebe nya?>>

Oyesu kyogwu mo, <<Ala gyun kwe Ada hin lo. Owoni ala bi gyun, ala bi ba gya Ada hin.>> 20 Oyesu kela mani ishini oya foza ipu kole ko Owuso, pee kpebe ko odudu kotu kyokye ni. Ashishe ke yo kwu lo ikweyi koni ishi nu gye wa lo ni.

21 Oyesu ki ka dawa mo, <<Nyya ga hin, kweyi ala ba tikpo hin, kweyi ala ba gekwu ipu ko ozalabi kala. Ebeni nyya ga ni, ala ba gege ko ga lo.>>

22 Ela mani ya Ase ko Oyahuda doka mo, Oya yiyinu ngmo la? Oza ni ya ni oya kamo, <<Ebeni nyya ga ni, ala ba gege ko ga lo ni ona?>>

23 Anu ke gohobu kpela koka mo, <<Ala bweye, ami ke bwi iso. Ala wa kese mani la, ami wa kese mani lalo. 24 Nka dala mo ala ba gekwu ipu ko ozalabi kala, owoni ala kyogwu mami pini wanu lalo, ala ke ba gekwu ipu ko ozalabi kala.>>

25 Adoka mo, <<Owa anoho?>> Oyesu kyogwu mo, <<Ami wase ni nka dala mo nwwe bwikyikyo ni.>> 26 <<Ngbela nwashika ko ka ni nyya kwala epwo ni. Ami ke ya ka dase oza ni npwo bwebe kase ni tumoleho mona ka dase kese ni okwokwoshi.>>

27 Awa ke gyoza ni oya ka dawa ikweyi ka Ada nu ni lo. 28 Ebeni Oyesu ka dawa mo, <<Ishini ala ngo Oyi ka Asuse iso, ishi oni ala ba gye mo owa ami la. Nyya gege ko yojije ami fufun lo, nke ya koza ni Ada fun ni. 29 Ase ni tumoleho ni yo kpami, oshun bita fufun lo, koni nyya yoza ni otu nu yasha ni.>> 30 Ishini Oyesu ya kela mani ni, ase nwashika kyogwu kpanu.

31 Awoyahuda ni kyogwu kpanu ni, Oyesu ka dawa mo, <<Owoni ala byoza ni nfu ni, ala wa awogbosun ko kwokwoshi la. 32 Ebeni ala ba gyo okwokwoshi kweyi okwokwoshi ya ngma ala.>>

33 Aka danu mo, <<Aha wayi kayi ki Ibirayi la, aha wo oshe kashishe ebibye wa lo. Oyamoji ya kamo aba wa shaha eshe?>>

34 Oyesu kyogwu mo, <<Nyya ka dala okwokwoshi, kpiri kase ni yo ozalabi owo oshe ko ozalabi. 35 Nabani oshe gbebe kiyinu ipu kipwoma lo, oyi ke yipu nu gbogbo-gbogbo. 36 Ni olemani, owoni Oyi ko Owuso shawo eshe, ashawo eshe kwokwoshi. 37 Ami gye mi Ibirayi wokyikyi kala la. Kwikyikyeni ala ba yimu ko yun ngmo, ikweyi koni ela hin gboyagye ipu kotu ka lo. 38 Nyya ka dala oza ni nma ebe ka Ada ni, kweyi ala yoza ni ala pwo ebe ka ada kala ni.>>

39 Aka mo, <<Aayi, Ibirayi pini wada ka aha la.>>

Oyesu kamo, <<Owoni ala wayi kayi ki Ibirayi la, ala bi ba yawoza ni Ibirayi ya ni. 40 Byoni ala ba yimu ko ngmun ni, ami wase ni ya ka dala okwokwoshi ko oza ni npwo bwebe ko Owuso ni la. Ibirayi ya gege ya ya awoza mani lo. 41 Ala ba yawoza ni awada kala ya ni la.>>

Awoyahuda ke ba kamo, <<Aha wase ni amuwa kagya ni lalo, aha gba Ada wo Owuso.>>

42 Oyesu ka dawa mo, <<Owoni Owuso wa Ada kala, ala bya yimu hin, ikweyi koni nwebe kala bwebe ko Owuso la. Nbyiyun kin pini webe mani lalo, anu pini ke tumo oleho la. 43 Ojiya ni ala gyoza ni nyya ka ni lo? Ikweyi koni ala ya akpaha tagye do ozafofu hin lo ni! 44 Ala ada kala wi ibiri la, ala ki ba yimu ko yoza bibi ni oya yimu ni. Owino ngmase bwikyikyo. Kpiri kishi oya yanya kokwokwoshi, ikweyi koni ojije wokwokwoshi yipu nu lo. Kpiri kishini oya kokame, oya shiya ase otu nu la, ikweyi koni owino kokame ki wa ada ko okame. 45 Ikweyi koni nkokwokwoshi, ala kyogwu kpo oza ni nka ni lo! 46 Anoho ipu kala ya yolobene ni shiya ase mo nyyo ozalabi hagye? Owoni okwokwoshi pini nyya ka la, ojiya ni ala kyogwu lo? 47 Ase ni wa ko Owuso oya pwoza ni Owuso ya ka ni. Oza ni ya ni ala pwo lo ni wa koni ala wako Owuso lalo.>>

48 Awoyahuda ka danu mo, <<Aha ka gyogye lo, owoni aha kamo owase ko Osamariya, oki gbo omaku bibi?>>

49 Oyesu ka dawa mo, <<Ngbo omaku bibi lo, ami geyagye da Ada hin ala ke mun nye. 50 Ami ya tikpo shini ase na shamiye lalo, ashe ke yaba ni ya tikpo ni, anu wino kepwo. 51 Nyya ka dala okwokwoshi, kpiri kase ni yoza ni nfo mona ya ni, oya gekwu lo.>>

52 Ikweyi kela mani, Oyahuda kamo, <<Kokwokwoshi agye kamo ogbo omaku bibi! Ibirayi kpa awobane gekwu, kwikyikyeni, okamo kpiri kase ni yoza ni ofu ni oya gekwu lo. 53 Oya ziyo byo osha ada ka aha Ibirayi la? Anu gekwu, mamani awobane ki gekwu. Awo miyo wa anoho?>>

54 Oyesu kyogwu mo, <<Owoni nbi ziyun iso, ziyun iso hin bi ya wojije lo. Ada hin ni ala mo owo Owuso kala ni ya ngami iso. 55 Ala gyo lo, ami ke gyo. Owoni nkamo ngyo lo, nyya wino okame bya ala, nke gyo kweyi nyya geyagye dela nu. 56 Ada kala Ibirayi shotunehe ko moyi hin, oma kweyi otu nu sha.>>

57 Awoyahuda ka do Oyesu mo, <<Awo fishayi aweho wa lo, oya kamo omi Ibirayi?>>

58 Oyesu kamo, <<Nyya ka dala okwokwoshi, ome ana mi Ibirayi nyya ba!>> 59 Ni Oyesu ka mani ni, akpakyo koto, Oyesu ke teba kweyi osho ole ko Owuso bita.