1 Oyesu gogya-gogya ipu ko Ogalili kweyi otela ko ga agye ko Oyahuda ikweyi koni Ase ko ojudiya ba yimu koyo ngmo. 2 Ishini Imya ka Ase ko Oyahuda ka Adaba ke yo pee ni, 3 ayene ko Oyesu ka danu mo, <<Oshu ko she ebe ni bita shini ogo ojudiya, shini awogboso na mawoza kigbashi ni oya ya ni. 4 Ase ni ya yimu ko woteyi naka yoza teba lo. Owoni oya yoza mani, shiyo dase kese.>> 5 Ayinanu kipu nu kyogwu kpanu lo.

6 Ni olemani oni, Oyesu ka dawa mo, <<Ishi hin gye wa lo, ebe kala ishi kpiri wo gyogye. 7 Ese ba yanya kala lalo, ake ba yanya hin la ikweyi koni nyyo olobene moko kese kpiri wo obibi. 8 Ala ba gebe kimya. Ami ke ya gebe kimya mani lo, ikweyi koni ishi hin gye wa lo.>> 9 Ni oka mani dawa ni, oyagye Ogalili.

10 Ishini ayinanu nyiso gebe kimya ni, anu gbosuwa, obose ese shini ana mo lo, oke ga teba. 11 Awoyahuda ba tikpo nu ebe kimya kweyi aba da ase okamo, <<Oyini?>>

12 Ase lewa bagye ba kakyose ikweyi nu. Ashishini kase kamo, <<Ongo mani wase neshi.>>

Ashishini kamo, <<Oya gyase egya la.>> 13 Ashishe ke gege ko kela nu shese lo koni aba yoshi ka Ase ko Oyahuda ni.

14 Ishini arimya go otutehe ni Oyesu nyiso gole ko Owuso kweyi okwotu ko foza. 15 Igbashi ya Ase ko Oyahuda kwu kweyi adoka mo, <<Ebenya ni ongo mani pyawoza gyogye mani bwanu, oke yi inokpa lo?>>

16 Oyesu kyogwu mo, <<Oza ni nyya fu mani bwebe kase ni tumoleho ni la. Ami kwiyun ya fu lalo. 17 Ase ni kyogwu kweyi yoza ni Owuso ya yimu ni, oya gye kwe ozafofu mani bwebe ko Owuso kwe nkwiyun pini ya fu la. 18 Ase ni ya foza kpo oshu kiyinu oya tikpo ko igyashi diyinu. Ase ni ke yoko kase ni toleho ni owase ko kwokwoshi, kweyi ela meme yipu nu lo. 19 Omusa dala ono lo? Kwikyikyeni ashishe kala gboso ono ni lo. Ojiya ni ala ba tikpo ko yun ngmo?>>

20 Ase lewa kamo, <<Ogbo owu bibi ipu wo! Anoho ya tikpo koyo ngmo?>>

21 Oyesu ka dawa mo, <<Nyyoza kigbashi oye kweyi igbashi yala kwu kpiri. 22 Ikweyi koni Omusa kela ikweyi ko ofu shoshe, akwotu koni bwi ikweyi nu lalo, akwotu bwebe ka awokyikyi kala, kweyi ala ba sha ayileke ofu Eno ko Minyo. 23 Owoni aba shoyi ofu Eno ko Minyo shini ono ko Omusa naka kyigbo lo, ojiya ni ala ba byotu kpa ami koni ndase ogege Eno ko Minyo ni? 24 Ala shepwo koka kiyi bita, kweyi ala kepwo kokwokwoshi.>>

25 Ebeni ase ko Ojerusele kwotu ko doka mo, <<Ongo mani pini aba yimu koyo ngmo lalo? 26 Mo hagye ebe ni ya kela ese gboshi lo, kweyi agege ko yoje lo. Kwe awoteyi kyogwu manu wo Okristi la? 27 Aha ke gye ebe ni ongo mani bwanu wa ni, ishini Okristi wa, ashishe ya gye ebe ni oya bwanu ni lo.>>

28 Oyesu tayayo ya foza ipu ko Ole ko Owuso, ozoko iso nwa mo, <<Ngye mo ala gyun, ala ki gye ebe ni nbwanu wa ni. Nwa kpo oshu kiyun lalo, ase ni ke tumoleho ni wokwokwoshi. Ala gyo lo, 29 ami ke gyo ikweyi koni nbwebe nu pini wa la, anu tumoleho la.>>

30 Ikweyi kela mani, aba nonu koyo kwu, ashishe ke yabo kwo lo, ikweyi koni ishi nu gye wa lo ni. 31 Ase nwashika kyogwu kpanu. Akamo, <<Ishini Okristi wa, oya yawoza kigbashi nwashika ni ki shomani ni la?>>

32 Ishini ashishini ka Awofarisi pwela ni ewa kase ba ka ikweyi nu ni. Ebeni ose kawosapa kpa Awofarisi ta awogbeho ko Ole ko Owuso oleho koyo kwu. 33 Oyesu ka dawa mo, <<Nyya yo kpa ala kishi gbayayi kin la, kweyi nki ya kwikye ya gebe kase ni tumoleho ni. 34 Ala ba tikpo hin, ala ke ba pyun lo, kweyi ebe ni nyyanu, ala ba gege baga lo.>>

35 Awoyahuda diyiwa oka mo, <<Ebenya ni ongo mani ya yimu koga ni aha ba pyo lo? Kwe oya gebe ka Ase ko Oyahuda ni pasha ipu ka Ogirik, kweyi na fuwoza ebe ni la? 36 Oji ni ogbo ipu kotu nu ni oya kamo, <Ala ba tikpo hin, ala ke ba pyun lo,> Kpo, <Ebe ni nyyanu, ala ba gege bawa lo?>>> 37 Eno ko kweyi kimya neneshi ke, Oyesu ya hagye kweyi ya kela kpo oko nwa ya kamo, <<Kpiri kase ni igyini ya ngmo, ona webe hin wa gwinyi. 38 Kpiri kase ni kyogwu kpami, byoni okpa ko Owuso ka ni, inyo kokpa ko olayi yape ipu nu.>> 39 Omani oya kela ikweyi ko Omaku, ni awase ni kyogwu kpanu bawa ze ni. Ishi oni ada ashishe Omaku wa lo, ikweyi koni ado Oyesu igyashi wa lo.

40 Ashishini kase apwela mani akamo, <<Kokwokwoshi ongo mani winobane la.>>

41 Ashishini kase kamo, <<Owo Okristi la.>>

Kwikyikyeni ashishini ba doka mo, <<Okristi ya bwo Ogalili moji? 42 Okpa ko Owuso kamo Okristi yawa bwi ipwoma ko Odawuda kpo Obetalami, ogya ni Odawuda yanu ni ona lo?>> 43 Ebeni okwunu kase kepa ikweyi nu. 44 Ashishini kase yimu koyo kwu, ashishe ke ga anu abo lo.

45 Ogwejeji awogbeho kole ko Owuso kwikye gebe ko ose ka awosapa kpa Awofarisi kweyi aduwa okamo, <<Ojiya ni ala byo wipu lo?>>

46 Awogbeho kole ko Owuso kamo, <<Ashishe ebyibye kela byoni ongo mani ka ni lo.>>

47 Awofarisi oni kamo, <<Ala ba ka daha mo ogya ala egya mamani ona?>> 48 <<Kwe ashe ipu ka awoteyi kwe Ofarisi kyogwu kpanu la? 49 Aayi! Ase kokpagye mani ke agyojije ikweyi ko ono lo, igbe na tuwa.>>

50 Onikodemus ni kwobonu gebe ko Oyesu otu ni, woye ipu wa kweyi doka mo, 51 <<Ono ka aha kyogwu mo aha kwase epwo, owoni aha pwela bwokwunu nu shini ahan gyoza ni oya ni ome lo?>>

52 Akyogwu mo, <<Awo bwo Ogalili mamani la? Owoni obi mokpa ko Owuso obi ya gye mo, inobane bwo Ogalili ebyibye lo.>> 53 Ebeni ananoho wa kwikye ganu gole.