1 Ome Imya ko osheyi nawa, Oyesu gye mishi gye koni oya shese bita ya gebe ka Ada ni. Oya yimu kase nu ni bese ni, oshawa imu nu sheyi gagye.

2 Oyesu kpayole nu ba roza ko onose kweyi ibiri gipu kotu ko Oyahuda Iskariyoti, oyi ko Osimo koyo Oyesu ra. 3 Oyesu gye mo Ada yoshu kojoji danu abo, oki gye manu bwebe ko Owuso, oki ya kwikye gebe ko Owuso, 4 ebe ni ongma abo shozarore, oyo oshiye nu kese yi ngma, kweyi oya ayiki gbo ogbeyi. 5 Oshinyo sho obatu kweyi kwotu ko nayole nu ikpo, kweyi okpayiki ni ogbogbeyi ni ya wuwikpo.

6 Owebe ko Obitrus, Obitrus ka danu mo, <<Adole, oya numikpo ona?>>

7 Oyesu kyogwu mo, <<Oya gyoza ni nyya ya mani wa lo, ishi yawa ba ni oya wa gye ni.>>

8 Obitrus kamo, <<Aayi, oya numikpo Ishi oyoye lo.>>

Oyesu kyogwu mo, <<Owoni nnikpo lo, oyipu hin lo.>>

9 Ebeni Obitrus kamo, <<Adole, ikpo hin kin pini oya na lalo, kabo kpikweyi hin kpiri!>>

10 Oyesu kyogwu mo, <<Ase ni kwobonu gwiye, oya yimu ko nikpo kin la, koni oyikpiye nu kpiri yi na sere ni. Kpiri kala gbinyi lo, ashe kponu pi gbinyi la.>> 11 Ogyase ni wa yo ra ni, oza ni ya ni okamo kpiri wa pini le sere lalo ni oma.

12 Ishini onuwikpo kweyi ni, okyo oshiye nu kese kpo shoko kweyi kwikye ga yagye. Oduwoka mo, <<Ala gyoza ni nyyala mani?>> 13 Ala ba yumogwu mo <Inofoza> kpa, <Adole,> Kokwokwoshi, oza ni nwwe ni oma. 14 Nabani ami Adole kala kpi Inofaloza nalikpo, ala niyikala ikpo mamani. 15 Nyya mani shini ala gbami la, ala ya byoni nyyala ni. 16 Nyya kadala okwokwoshi, oyole oyoye ya sha adole nu lo, oyoleho oyoye ya shase ni toleho ni lo. 17 Nabani nala gyoza mani kpiri ni, owoni ala yuwa, aba sala aboneshi.

18 <<Nyya kela kpala kpiri lalo, nggyawase ni nshu ni. Omani ke wako yoza ni okpa ka ni na gbodagye mo, <Ase ni ya roza owatu oye kponu kpami ni pini womonyekwotu hin la.>*

19 <<Nyya kadala nabani ome onawa gbodagye, ishini owa gbodagye, ala ba kyogwu mo Nwwase ni Nwwe ni. 20 Nyya kadala okwokwoshi, ase ni zase ni ntoleho ni ozun pi yoma, kweyi ase ni zun ozase ni tumoleho ni.>>

21 Ishini Oyesu kela mani kweyi ni, ozani domaku nu ose kotata kweyi oyolobene mo, <<Nyya kadala okwokwoshi, ashe ipu kala ya yun ra.>>

22 Ebeni awogboso kwotu ko tiyi miyiwa ikweyi koni agyase ni oya kela ikweyi nu ni lo. 23 Ashe ipu wa, oyole ni Oyesu ya yimu kotata ni yagye kwo. 24 Osimo Obitrus shase ni yagye kwo Oyesu mani ekwu kweyi kamo, <<Doka mo anoho ni oya kela ikweyi nu.>>

25 Anu ke bagye so kweyi doka mo, <<Adole, anoho ome la?>>

26 Oyesu kyogwu mo, <<Ase ni nyyo ofofa kikyoga kwipu kowatu kweyi danu, anu oma.>> Ebeni oyo fofa kikyoga kwipu kowatu, oyi do Oyahuda Iskariyoti, oyi ko Osimo. 27 Ni Oyahuda ya zikyoga ni, ebebeni Ibiri gipu kotu nu.

Oyesu kadanu mo, <<Oza ni oya yimu ko ya, ya papa.>> 28 Ashishe ipu wa ni ke bebe kozarore ni gyoza ni ya ni Oyesu ya ka mani do Oyahuda ni lo. 29 Koni Oyahuda wino byikwiri ni, ashini kayole ba ma byo Oyesu ya kadanu mona ga roza ni aba ri Imya ni kwe ko dawoleha oza la. 30 Ni Oyahuda ya zikyoga ni, ebebeni obose gese. Ishi oni otu kwobonu bi.

31 Ishini oya ga ni, Oyesu kamo, <<Nabani ado Oyi ka Asuse abokpa kweyi aziye ko Owuso iso bwebe nu. 32 Owoni aziye ko Owuso iso bwebe nu, Owuso ya do Oyi abokpa ebe kiyinu, kweyi oya danu abokpa ebebeni.

33 <<Ayi hin, nyya yo kpala kishi gbayayi kin la. Ala ba wa tikpo hin, byoni nka dase ko Oyahuda ni, mamani nyya ka dala nabani. Ebeni nyya ga ni, ala ba gege ko ga lo.

34 <<Nyya dala ono pepe. Ala yimu kiyi kala. Byoni nyyimu kala ni, mamani owotiri shini ala yimu kiyi kala. 35 Bwebe ko mani ase bagye mala wayole hin, owoni ala yimu kiyikala.>>

36 Osimo Obitrus doka mo, <<Adole, ebenya ni oya ga?>>

Oyesu kyogwu mo, <<Ebeni nyya ga ni, ala ba gbosun anani lo, ala ke bawa gbosun ishi oye.>>

37 Obitrus doka mo, <<Adole, ojiya ni nyya gboso anani lo? Nyya gege ya gekwu dawo.>>

38 Ebeni Oyesu kyogwu mo, <<Oya gege ya gekwu dami? Nyya kadawokwokwoshi, ome obogwu na tono, oya tawashu hin igbeta!>>