1 Ishini Oyesu tinarigwu kweyi ni, anu kpa Awogboso sheyi kokpa ko Okidiro. Ashikwu nu eho kiyo kobobo yebe ni, kweyi Oyesu kpayole nu gipu nu.

2 Oyahuda ine ko yo ra gyebe ni, ikweyi koni Oyesu kpa ayole nu ba gbayi ebe ni ishi kpiri. 3 Ebeni Oyahuda weho kiyo kobobo anu kpikpo kawadakare kpashini kayikoko ko Oyesu bwebe kawo oteyi kawosapa kpa Awofarisi. Abye emu, kpi ikwomu kpiyo kefu.

4 Oyesu kwobonu gyoza kpiri ni ya wa gbodagye kpanu ni, osha gohobu ga duwoka mo, <<Anoho ni ala ba doka?>>

5 Akamo, <<Oyesu ko Onazareti.>>

Oyesu kamo, <<Ami Wanu la.>> Oyahuda ni yo ra ni hagye ebe ni kpawa. 6 Ishini Oyesu kamo, <<Ami wanu la,>> ni, akwikye itikpi kweyi ga gbo okpagye.

7 Oki duwoka mo, <<Anoho ni ala ba doka?>>

Akamo, <<Oyesu ko Onazareti.>>

8 Oyesu kyogwu mo, <<Nka dala mo Ami Wanu la, owoni ala ba tikpo hin la, ala yango mani na gawa.>> 9 Omani gbodagye shini oza ni okpa ka ni na gya mo: <<Ashishe ipu kawase ni odami ni gebi lo.>>

10 Ebeni Osimo Obitrus ni gbewakpa ni ngmanu kweyi yo oshe ko osapa nyakwu akpaha kabore shigbo. Iye ko oshe oni wo Omalshu.

11 Oyesu ka do Obitrus mo, <<Kwikye ewakpa wo lape! Abwa ni Ada dami ni, naka gwa lo?>>

12 Ebeni oteyi ka adakare ko Oroma kponongbo ka Ase ko Oyahuda yo Oyesu kwu. Ayo gbo 13 kweyi byo ikyikyo gobutu ka Anas ada ko Nya ko Okayafa, ni wosapa nyakwu ishayi oni. 14 Okayafa pini dawoteyi Kase ko Oyahuda ela moya shoshi she shini ase oye na gekwu ikweyi kasuse kpiri la.

15 Osimo Obitrus kpoyole oye ba gboso Oyesu. Osapa nyakwu gyoyole oye oni neneshi, mani oni ogboso Oyesu gipu kikpakyo kole ko osapa nyakwu, 16 Obitrus ke hagye ya gbeyi ese okwunu kofunu. Oyole oye ni osapa nyakwu gyo ni wa kela kpo oyinonya ni ya gbeho kofunu ni, kweyi obyo Obitrus gipu.

17 Ebeni oyinonya ni ya gbeho kofunu ni do Obitrus oka mo, <<Awo woye ipu kayole nu lalo?>>

Obitrus kyogwu mo, <<Aayi, nwwe lo.>>

18 Oshu yaya, mani oni ayole kpawonongbo hagye ba gyola shini ikpiye wa na gbone. Obitrus hagye kpawa ya gyola mamani.

19 Ebeni osapa nyakwu do Oyesu oka kela ikweyi kawogboso kpozafofu nu.

20 Oyesu ka danu mo, <<Nkela kyaa dananoho pwo, ishi kpiri nyya foza ipu ke ekpa kpo ole ko Owuso, ebe ni Ase ko Oyahuda kpiri ba gbayi ni. Nkojije teba lo. 21 Ojiya ni oya dumoka? Dawase ni pwela hin ni oka. Kwokwoshi agyoza ni nka ni.>>

22 Ishini Oyesu ka mani ni, ashe ipu ka awonongbo labo akpaha. Okamo, <<Owe ni oshu ko kela do osapa nyakwu ni ona?>>

23 Oyesu kyogwu mo, <<Owoni nkela bibi, kashini ananoho napwo. Owoni nke kokwokwoshi la, ojiya ni olumabo akpaha?>> 24 Ebeni Anas yuwa byo gebe ko Okayafa osapa nyakwu byoni ayo gbo ni.

25 Ni Osimo Obitrus hagye ya gyola ni, awashe ki doka mo, <<Awo woye ipu kayole nu lalo?>>

Obitrus ke tawashu mo, <<Aayi, nwwe lo.>>

26 Oshe ko osapa nyakwu oye ni wema kase ni Obitrus yakpaha shigbo ni kamo, <<Ami mo kpanu ipu keho kiyo kobobo lo?>> 27 Obitrus ki tawashu mo, <Aayi> ebebeni obogwu oye tono.

28 Ebeni awoteyi ko Oyahuda byo Oyesu bwo ole ko Okayafa go ole ko oteyi ko Oroma. Ishi oni ke witikpokyi, kweyi awoteyi ko Oyahuda tela ko gipu kole, amo awa ba kyinyi owoni agipu kole; shini ana shu ko roza ki Imya ko Sheyi. 29 Ebeni Obilatus bose wa duwo oka mo, <<Ala kwo ongo mani kpepwo labi wonya?>>

30 Akyogwu mo, <<Owoni aha bi kwo ongo mani kpepwo labi lalo, abi ba byo webe wo lo.>>

31 Obilatus kamo, <<Ala byo ga kepwo kpanu abiyikala byoni ono kala ka ni.>>

Awoyahuda kyogwu mo, <<Aha gboshu oyoye ko kwepwo labi lo. 32 Omani gbodagye shini ela ni Oyesu ka ikweyi kedo kikwu nu ni na gbodagye.

33 Ebeni Obilatus kwikye gipu ole ko ose nu, oyo Oyesu ogwu kweyi doka mo, <<Awo pi wose ka Ase ko Oyahuda la?>>

34 Oyesu kyogwu mo, <<Oka doda wo mani, awo abiyo piya dumoka la kwe ashe hoha pi ka dawo mo dumoka la?>>

35 Obilatus kyogwu mo, <<Ami wo Oyahuda la? Ase wo kpo awosapa nyakwu kala pi yo nabo dami la. Oji ni oya?>>

36 Oyesu kamo, <<Obula hin wa kese mani lalo. Owoni obi wa kese mani la, ayole hin biya wa Ase ko Oyahuda obi ko yun kwu. Nabani ke obula hin wa kese mani lalo.>>

37 ko Obilatus kamo, <<Awo wose la?>>

Oyesu kamo, <<Awo pi kamo nwwose la. Kokwokwoshi, ikweyi ko omani pini amun la, kweyi nwwese ko yolobene ko okwokwoshi. Kpiri kase kese ni yagbabo kokwokwoshi ya yakpaha tagye dami.>>

38 Obilatus doka mo, <<Oji wokwokwoshi?>> Bwebe kela mani okwikye gese ebe ka Ase ko Oyahuda ga ka dawa mo, <<Nmo kpozalabi oyoye ko kwepwo lo.

39 Oke wodu kala shini na shashe ni yoruduru bita dala ishi ki Imya ko Sheyi. Ala ba yimu shini na sho <<ose ka Ase ko Oyahuda bita?>>

40 Azoko iso mo, <<Aayi! Sho Obaraba bita daha!>> Obaraba woye ipu kawo nyoza-oshu.