1 Agbo ongo ko Ofarisi oye iyenu wo Onikodemus, owo oye ipu kawoteyi konongbo ka Ase ko Oyahuda. 2 Owebe ko Oyesu otu kweyi kamo, <<Adole, agye mo owinofoza ni bwebe ko Owuso ni la. Koni ashishe ya gege ya yoza kigbashi ni oya ya mani lo, owoni Owuso yo kpanu la lo.>>

3 Oyesu ka danu mo, <<Nyya ka dawokwokwoshi, ashishe ya gobula ko Owuso lo, owoni akyanuma lalo.>>

4 Onikodemus dooka mo, <<Owe wonya ni aki ba kyase ni sawukye ni ma? Kwe oya kwikye ya gipu kinanu shini ana kyanuma komwepa la?>>

5 Oyesu kyogwu mo, <<Nyya ka dawo kwokwoshi, ashishe ya gipu ko obula ko Owuso lo, owoni akyanu ma kpinyo kpo Omaku lo. 6 Omoma kikpiye wikpiye la, omoma ko Omaku ke wo Omaku la. 7 Ona ka woza kigbashi dawo koni nkamo, <Owotiri shini ana kyawoma ni lo.> 8 Owu ya ta gebe ni shootu ni. Ala ba pweya nu, ala ke ba gyebe ni obwanu wa kwebe ni oya ga ni lo. Oya lemani kpananoho ni amoo ipu ko Omaku ni.>>

9 Onikodemus dooka mo, <<Omani ya gbodagye moji?>>

10 Oyesu kamo, <<Owi inofoza ki Izrayila la, kweyi awo gyawoza mani lo?>> 11 Nyya ka dawo okwokwoshi, aha koza ni agye ni, kweyi aha ba yolobene koza ni aha ma ni, kwikyikyeni ala ke kyogwu kpolobene kaha lo. 12 Nkela dala ikweyi koza kese mani kweyi ala kyogwu lo; ala ba yamoji ba kyogwu owoni nkela koza ni yiso ni? 13 Ashishe giso ebyibye wa lo, so Oyi ka Asuse ni bwi iso wa ni. 14 Byoni Omusa zegwa iso ipu kododa ni, mamani oya wotiri shini ana zo Oyi ka Asuse iso, 15 ikweyi koni kpiri kase ni kyogwu kpanu oya pyolayi ko gbogbo-gbogbo.

16 <<Koni Owuso yimu kese ni, otoleho kpo Oyi nu oye kpokponu, kpiri kase ni totuso Oyi nu oya gekwu lo, oke ya yiyi ko gbogbo-gbogbo. 17 Owuso to Oyi nu oleho wese mani ko yese yishi la lo, pa shini ona ngmese bwebe nu la. 18 Kpiri kase ni kyogwu kpanu aba kweepwo lo, ase ni ke kyogwu kpanu lo akwobonu kweepwo ikweyi koni okyogwu kpiye ko Owuso kpo Oyi nu fufunu lo. 19 Epwo koka ya lema: Oyoyu wese mani, ase ke ba yimu kebedibu shoyoyu, ikweyi koni oko wa woza bibi ni. 20 Kpiri kase ni ya yoza bibi ya tela kebe yoyu, kweyi ya webeyoyu lo, mani oni aba sha bebeyoyu lo, oya yoshi koni otu nu ya tese ni. 21 Kpiri kase ni ke ya yo kwokwoshi ya webe yoyu, shini ana ma ese kyaa koni oza ni oya kpiri ni yobutu ko Owuso la.>>

22 Itikpi koni, Oyesu kpa awogboso bose gagye ko Ojudiya, ebeni oyagye kpawa kishi gbayayi kweyi ya yase obatisma. 23 Ishi oni Oyohana ya yo obatisma mamani ogya ka Ayinon ni yo pee kpo Osalimu ni, kweyi inyo nwashika ebe ni, kweyi ase ba wa shini ana yuwo obatisma. 24 Oza mani gbodagye ome ayo Oyohana kwu toruduru la. 25 Ebeni awashu loshu nyiso obepa kawogboso Oyohana kpase ko Oyahuda oye ikweyi ko odu kikpiye nona. 26 Awebe ko Oyohana kweyi wa ka danu mo, <<Inofoza, ongo ni yo kpawo agbabo ki ishu ko Ojoda, anu ni okela ikweyi nu oni, oya yase obatisma, kweyi ase nwashika ba gebe nu.>>

27 Oyohana kyogwu mo, <<Ashishe ya gege ya yojije lo soza ni adanu bwiso ni. 28 Ala abiyikala wolobene hin ni nka mo, <Ami wo Omezaya lalo, ake tumoleho yohobu nu la.> 29 Onyape wakoba konyape la. Oya koba konyape ya gbeyi nu kweyi ya pwela nu, kweyi otu nu ya sha nwashika ishini opwoko koba konyape. Otu shosha mani wakakahin la, kweyi nabani ogya wa. 30 Owotiri shini anu na gye gohobu, ami na kwikye itikpi.>>

31 <<Anu ni wa bwi iso ni shananoho; ase ni yese wa kese la, oki ya kela byase kese. Ase ni wa bwiso ni shananoho kpiri. 32 Oyolobene ko oza ni oma kpo oza ni opwo ni, ashishe ke kyogwu kpolobene nu lo. 33 Awase ni zela nu kyogwu mo Owuso wokwokwoshi. 34 Ase ni Owuso toleho ya kela ko Owuso, koni Owuso danu Omaku ni gbo okweyi lo ni. 35 Ada yimu ko Oyi nu kweyi oyo ojoji yi danu abo. 36 Kpiri kawase ni kyogwu kpo Oyi ko Owuso, aba pyo olayi ko gbogbo-gbogbo. Kpiri kase ni ke tela ko Oyi ko Owuso aba pyo olayi lo, koni anya ko Owuso yikweyi wa.>>