1 Eno kikyikyo ko obize, ogwogwutogwu, Omeremu bwagye ko Omagadali bose ga amiri kweyi oma ayo okpo ja gokoka. 2 Ebeni okwikye kpenya ga to Osimo Obitrus kpo oyole oye ni Oyesu ya yimu ni kweyi kamo, <<Aya Adole yi bize sha amiri, aha gye ebe ni ayo ta anu ni lo!>>

3 Ebeni Obitrus kpo oyole oye oni bose gebe ka amiri. 4 Kpiri wa bose kpenya, oyole oye ni nyinya gwo Obitrus ta kweyi fa amiri kwobonu danu. 5 Oweyi kweyi shoko, omo opa shagye, oke gipu lo. 6 Ebeni Obitrus ni yitikpi ni wa kweyi wa gipu ka amiri. Omo opa ngmongma shagye, 7 ki kpiyo ni ayi lokwu ko Oyesu ikweyi ni. Iyo ni kyokye abiyinu shagye gogo kpo opa. 8 Ogwejeji nu, oyole ni kwobonu do Obitrus gebe ka amiri ni, wa gipu mamani. Oma kweyi ototu so. 9 Kwikyikyeni agyikweyi koza ni okpa ka mo Oyesu ya nyiso amiri ni lo.

10 Ebeni ayole ko Oyesu mani kwikye gole wa, 11 Omeremu ke hagye ese ka amiri ya kyegba. Ni oya kyegba ni, oweyi kwagye ya shoko ma amiri, 12 oma ayoleho epa shoshiye nehe bagye ebe ni okwu ko Oyesu yanu ni, oye yagye ebe kikweyi nu, oye yagye ebe kikpo nu.

13 Ado oka mo, <<Onya, oji yo ya kyegba?>>

Okamo, <<Ayo okwu ka Adole hin yi bize, kweyi nggyebe ni ayo tanu ni lo.>> 14 Ebebeni opyiyi kweyi omo Oyesu hagye, oke gye mowo Oyesu lo.

15 Okamo, <<Onya, oji yo ya kyegba? Anoho ni oya tikpo?>>

Oya ma byawino yiyi kweho la, kweyi okamo, <<Adole, owoni awo pi yo bize la, ka dami ebe ni oyo tanu ni, shini na ga zo.>>

16 Oyesu yogwu mo, <<Omeremu!>> Ebeni opyiyi kweyi ngmegba okwunu ki Ibru mo, <<Oraboni>> asenu wo <<Inofoza!>>

17 Oyesu kamo, <<Ka byun lo, koni nkwikye gebe ka Ada wa lo. Gebe ka ayole hin ga ka dawa mo, <<Nyya kwikye gebe ka Ada hin, Ada kala; Owuso hin, Owuso kala.>>

18 Omeremu ko Omagadali kwikye ga koshu oni dayole mo: <<Ami ma Adole!>> Kweyi oka dawa mo okawela mani danu.

19 Onose ke eno kikyikyo ko obize, ishini ayole nu wa gbayi ni, ayofunu gwu ikweyi koni aba yoshi ka Ase ko Oyahuda ni, Oyesu wa hagye obutu wa kweyi kamo, <<Omene na yo kpala!>> 20 Ishini okela mani kweyi ni oshawa abo kpashikwu nu. Otu kawogboso sha kotata ishini ama Adole ni.

21 Oyesu ki ka dawa mo, <<Omene na yo kpala! Byoni Ada tumoleho ni, ami ki ya tala oleho.>> 22 Ni oka mani, ogbo olayi tuwa kweyi kamo, <<Ala nyo Omaku ko Owuso. 23 Owoni ala yase ozalabi wa na, ayi na oma; owoni ala yuwo ozalabi na lo, ayi na lo.>>

24 Oye ipu kawi Igwepa, Otoma (ni aba yo ma Apule ni), yo kpayole ishini Oyesu wa ni lo. 25 Mani oni ashini kayole ka danu mo, <<Aha ma Adole!>>

Otoma ka dawa mo, <<Owoni nmoyi kabo nu ni bwu ni agwaba kweyi yayabo hin goyi kofo ni ayo ni ki gabo ashikwu nu lalo, nyya kyogwu lo.>>

26 Obize oye shigbo, ayole ko Oyesu kpiri bipu kole, kweyi Otoma yo kpawa. Koni ofunu boba ni, Oyesu wa kweyi wa hagye ipu wa kweyi kamo, <<Omene na yo kpala!>> 27 Ebeni oka do Otoma mo, <<Yayi kabo wo lebe ni; mabo hin. Nabo wo ta shini ogabo ashikwu hin. Ka kotu lo, totu sun.>>

28 Otoma ka danu mo, <<Adole hin kpo Owuso hin!>>

29 Ebeni Oyesu ka danu mo, <<Koni omun ni pini ototu sun la; aboneshi yo kpawase ni mun lo kwikyikyeni ake totu sun.>>

30 Oyesu yoza kigbashi nwashika obutu kawogboso ni ayita ipu ko okpa mani lo ni. 31 Ake yomani ta shini ala totuse mo Oyesu wo Okristi, Oyi ko Owuso, kweyi owoni ala totuso ala ba pyo olayi ipu kiye nu.