1 Ototukpokyi eno kikyikyo ko obize, anya ni ga amiri kpa ano kyeye ni akyanutu ni. 2 Ati ikyikpo ko okwunu ka amiri ja go okoka, 3 ishini agipu ni ake mi ikpiye ka Adole Oyesu lo. 4 Abi ipu ko otu byobya, ango epa bose da awa, oshiye wa ba yu byo ola ka akpula ni. 5 Ipu ko oshi yoya, anya ni weyi kweyi yikweyi wa kwagye, ango oni ka da awa mo, <<Ojiya ni ala ba tikpo ki ino gbo olayi ipu kawase ni gekwu ni? 6 Oye ebe ni lo. Onyiso wa! Ala rela ko oza ni oka da ala ishini oyo kpa ala Ogalili ni. 7 Omo, <Aba yo Oyi ka Asuse ya nabo da awine ko ozalabi, aba yo poshi, eno ko omweta oki ya nyiso.>>> 8 Ebeni ara mo oka mani.

9 Ishini akwikye bwa amiri wa ni, akela mani kpiri da ayikoko ko Oyesu nu igwoye kpase shishini. 10 Anya ni byela mani waka dayole ni wo Omeremu bwagye ko Omagdalin kpo Oyowana kpo Omeremu ene ko Oyakubu kpa anya shishini ipu wa. 11 Ake kyogwu lo mela ka anya mani, ama mo ela ka anya yeye la. 12 Obitrus ke nyiso kweyi ge ebe ka amiri kpe enya. Oweyi kweyi oma ayiki yeye shagye, okwikye nu go ole kpi igbashi ko oza ni gbodagye ni.

13 Eno oni awogboso Oyesu ase epa bo owe ba gogya-leke oye ni aba yo mi Imawu ni, enu ko ogya ni kpo Ojerusele go oza ko omili ahapa. 14 Aba ko oka owe ikweyi ko oza kpiri ni gbodagye ni. 15 Ishini aba kela kpi iyiwa ni, Oyesu abiyinu wa yawu kpa awa. 16 Owuso ke gwa awiyi shini ana agyo lo.

17 Oyesu duwoka mo, <<Oka koji ni ala ba ka kpi iyi kala mani ikweyi ko owe?>>

Akwu hagye ba byotu. 18 Ashe wa ni iye nu wo Okiliyopas doka mo, <<Awo fufo pini wo ogboga Ojerusele ni ogyo oza ni gbodagye ebeni kwekwekwe mani lola?>>

19 Oduwoka mo, <<Ela koji?>> Amo, <<Ela ko Oyesu ko oNazareti. Owi inobane la, oloshu ipu kela kpo oko obutu ko Owuso kpa asuse kpiri. 20 Awose ka awosapa kpa awoteyi ka aha yo da awa mo ana kwe epwo ki ikwu, kweyi ayo poshi. 21 Aha ke yi iyitagye mo anu pini wi ine ko ngmi Izrayila la. Kweyi ikyeni we eno ko omweta ni oza mani gbodagye ni. 22 Ime, anya ka aha shishini ta aha igbashi. Aga amiri ototukpokyi mani 23 ake mi ikpiye nu lo. Awa ka daha mo ayoleho ko Owuso ka da awa mo oya gbo layi. 24 Ebeni ashishini ka aha ga amiri kweyi amo lo, byoni anya ni ka daha ni.>>

25 Oyesu ka da awa mo, <<Ma awikyo de, kwi ikyikye ni ala totuso oza ni awobane ka ni lo! 26 Oshu koni Omezaya na mo owe mani kpiri ime na wa gipu ko igyashi nu lalo?>> 27 Kweyi okyogwu ko oza ni awobane ka ipu ko okpa ko Owuso ikweyi nu ni, bwo okpa ko Omusa ge ena kawo bane kpiri.

28 Ishini ayo pee kpo ogya ni aba ga ni, Oyesu ya byo oya gwota ni. 29 Ake ka da anu mo, <<Wa kya kpa aha, eno sha wa.>> Ebeni okawa ga sa ebe wa. 30 Ishini abagye ko roza ni, ozo ikyoga, okeshi, oyi kyigbo kweyi da awa. 31 Ebeni iyi wa gwa, agyo kweyi ogebi shuwi iyi. 32 Adiyiwa oka mo, <<Ishini oya kela kpa aha owe kweyi gwo Okpa daha ni otu ka aha ka agye lo?>>

33 Ebebeni anyiso kweyi akwikye go Ojerusele. Ama ayikoko ko Oyesu nu igwoye kpa awase ni be ebeni kpa awa ni, kpi iyiwa tukpa 34 kweyi ba kamo, <<Ko okwokwoshi! Adole nyiso kweyi bose do oSimo.>> 35 Ebeni ase epa ni ko oza ni gbodagye owe ni da awa, aki kamo ishini owa yo ikyoga kyigbo ni pini awa gyo la.

36 Abi ipu ko kela mani ba ka tini amo Oyesu abiyinu hagye ipu wa kweyi ka da awa mo, <<Omene na yo kpa ala.>>

37 Oshi yuwa kwu, aba sode ki ikpiye, ba ma byo oyi pini ama la. 38 Oka da awa mo, <<Oji ya ala ba yoshi? Oji ya ala ba gbo otu? 39 Ala ma abo hin kpi ikpo hin. Ami da hin la! Ala gabo ami shini ala ma. Oyi ya gbe ebe kpo okpokwu lo, ami ke gbo, byoni ala ma ni.>>

40 Ishini okela mani kweyi ni, oshiya awa abo nu kpi ikpo nu. 41 Kwikyikyeni akyogwu lo ikweyi ko otunehe kpi igbashi ni yuwa kwu ni. Oduwoka mo, <<Ala gbo ozarore ebeni?>> 42 Ada nu ikyi ka ayibo, 43 oze kweyi ha obutu wa.

44 Ebeni oka da awa mo, <<Oza ni nka dala ishini nyyo kpa ala ni yoma: Oza kpiri ni ata ikweyin ipu ko ono ko Omusa kpe enena ka Awobane kpo Okpa ki Igye ni ba gbodagye.>>

45 Ebeni ogwawo otu kweyi agyo oza ni Okpa ya ka ni. 46 Oka da awa mo, <<Oza ni ata ni yoma: Omezaya ya mo owe kweyi ya nyiso bwi ipu kawase ni gekwu ni eno ko omweta. 47 Kweyi ipu ki iye nu aba ko oshu ko shagbotu kpo ozalabi ko nona da ase okpagye kpiri, aba kwotu bwo Ojerusele. 48 Ala wa awolobene ka awoza mani kpiri. 49 Nyya ga toleho ko oza ni ada hin shokoyi ni da ala; ala bi ipu ko ogya gbi ishini asha ala oshiye kpo oshu bwi iso ime.>>

50 Ishini obose kpa awa go Obetani ni, okpa abo nu iso kweyi suwa aboneshi. 51 Oyipu ko suwa aboneshi, oshu wa bita kweyi ayo bize gi iso. 52 Ebeni ageyagye da anu kweyi akwikye go Ojerusele kpo otunehe nwashika. 53 Kweyi kpiri ki ishi abi ipu ko Ole ko Owuso, ba sho Owuso iye.