1 Ase lewa kwobonu gbigwu koza ni gbodagye ipu kaha, 2 byoni ashibita daha bwebe kawase ni yolobene nu bwikyikyo kweyi tono kela ko Owuso ni. 3 Mani oni, ami abiyun kikpo kela kpiri bwikyikyo, kweyi nma mo oshoshi na toza ni nggye neneshi dawo ada kagye Otiyofilo, 4 shini ogyo kwokwoshi koza ni afuwa ni.

5 Ishini Ohiridus wose ko Ojudiya ni, agbosapa oye, iyenu wo Ozakariya, oyipu kikpo ka Abija. Aruna wokyikyi konya nu Elizabe. 6 Kpiri wa wase neshi ebe ko Owuso. Aba yawu ipu kono ka Adole neneshi. 7 Awa ke mayi lo, ikweyi koni Elizabe wodoma ni; kweyi kpiri wa sawukye.

8 Enoye Ozakariya ya yoko nu ko Osapa ipu kole ko Owuso koni oko kwikpo wa koya ni. 9 Aweba ome asho shini nayoko ko Osapa ole ko Owuso byoni owodu kawosapa shini ana yola koturare* ni. 10 Nishi ko yola koturare yani, ase lewa bese ba tinarigwu.

11 Oyoleho ka Adole bose danu kweyi hagye abore ko okpe koza kpehe. 12 Ishini Ozakariya yiyi shoni, otu nu gbo, oshi yokwu. 13 Oyoleho ke kadanu mo, <<Ka yoshi lo Ozakariya, Owuso pwinarigwu wo. Onya wo Elizabe ya moyi nongo, oya tiye mo Oyohana. 14 Oya wo otunehe kpo otushosha dawo, kweyi ase nwashika ba shotunehe kpo omoma nu. 15 Oya wase nyakwu ebe ka Adole. Oyawa gwinyi ni ya yase ni lo. Omaku ko Owuso yayo kpanu bwipu kinanu. 16 Oyawa kwikye ayi ki Izrayila nwashika gebe ka Adole Owuso wa. 17 Kweyi oyawa yawu obutu ka Adole ipu ko Omaku kpo oshu kinobane Iliya, oya pyotu kawada gebe kayi wa oki ya pyotu kawase ni lagbiti ni gebe ko ziyi kawase neshi, ko kyasuse tu da Adole.>>

18 Ozakariya doyoleho oka mo, <<Nyya yamoji ya kyogwu kpela mani nami kponya hin ke sawukye mani?>>

19 Ebeni oyoleho kyogwu mo, <<Iye hin wo Ojibiri. Nyya agye obutu ko Owuso; anu pini tumoleho shini na kela dawo kweyi ki koshu neshi mani dawo la. 20 Bwishi mani okwunu wo ya gwu, oya gege kokela lo gbishini oza mani ya gbodagye, ikweyi koni otela ko kyogwu kpela hin ni yawa gbodagye ipu kishi nu ni.>>

21 Kweyi ewa kasuse bese ba gbeyi kowowa ko Ozakariya, aba ka ipu kotu wa mo ojiyo ga gbeji ipu kole ko Owuso mani? 22 Ishini obose wese ni, ogege ko kela kpawa lo. Agye mo agwaniyi moje ole ko Owuso, ikweyi koni oya myabo kin gbela koka lo.

23 Nishi koko nu kweyi ni, okwikye gole. 24 Itikpi kishi gbayayi onya nu Elizabe bipu kweyi oyiyinu teba oda koya eho. 25 Okamo, <<Ogwejeji Adole miyinyinyi hin, ongmami shipu kiweyi.>>

26 Ishini ipu ke Elizabe gyoya ihiri ni, Owuso toyoleho nu Ojibiri oleho go Onazareti agye ko Ogalili, 27 ebe kisonya oye ni gyo ngo lo ni ayo kongo oye ni iyenu wi Isu bwipwoma ko Odawuda kodoka nu. Iye kisonya mani wo Omeremu. 28 Oyoleho gebe nu ga kamo, <<Nngmagye omeremu! Awo ni Owuso ya yimu wo ni! Adole yo kpawo.>>

29 Omeremu byotu kotata kpo gbogba koyoleho mani, kweyi igbashi yokwu, okamo edo ko gbogba koji lemani? 30 Oyoleho ke kadanu mo, <<Ka yoshi lo Omeremu, oneshi ko Owuso yo kpa wo. 31 Oya bipu, kweyi ya moyi nongo, oya daniye mo Oyesu. 32 Oya wase neneshi, aba yogwu mo Oyi ka Ada ini koshu kpiri. Adole Owuso ya danu obe kadanu Odawuda. 33 Kweyi oyawa wose kole ko Oyakubu ko gbogbo-gbogbo; obula nu ya kweyi lo.>>

34 Omeremu doyoleho oka mo, <<Omani ya gbodagye moji ni ngyongo walo mani?>>

35 Oyoleho kyogwu mo, <<Omaku ko Owuso yawa, kweyi Oshu ka Ada Nyakwu yawa sa dawo. Ase sere ni aba mo ni aba yogwu mo Oyi ko Owuso. 36 Nyya yimu shini ogye moyene wo ke Elizabe ni amo wodoma ni bipu, oya ihiri yoma. 37 Ojije ya sho Owuso oshu ko ya lo.>>

38 Omeremu kyogwu mo, <<Ami woyole ka Adole la; Nalemani byoni oka ni.>> Ebeni oyoleho shobita.

39 Ipu kishi oni Omeremu kyiyinu tu kweyi nyiso papa gipu ko ogya oye ipu kikpokyi kagye ko Ojuda, 40 ebeni ogipu kole ko Ozakariya kweyi ote Elizabe ogbogba. 41 Ishini Elizabe pwogbogba ko Omeremu ni, oyi meme ni yipu nuni pya, kweyi Elizabe nwu kpo Omaku ko Owuso. 42 Ozoko iso mo: <<Otunehe yo kpawo ipu ka anya kpiri, aboneshi wo oyi kipu wo. 43 Ojiya ome ni oza neshi wa tami ikyeni, ni ene ka Adole hin webe hin ikyeni? 44 Ishini npwogbogba wo ni, oyi ni yipu hin ni pya kpotu nehe. 45 Otunehe yo kpase ni kyogwu kpoza ni Adole shokoyi ni.>>

46 Omeremu zoko iso mo:

<<Otu hin sha Adole iye,

47 kweyi nshotunehe do Owuso inongmami,

48 koni oyela hin oyole nu ni,

koni nnyonye ni.

Bwanani gohobu, kpiri kase bawa yumogwu mo,

aboneshi, 49 koni Ada nyakwu yoza neshi dami, kweyi iyenu wase sere. 50 Iyinyinyi nu yikweyi kawase ni ba yoshi nu gbomeyi lo bwo oyi oye goyi oye. 51 Onabo nu nyakwu ta;

oyawo zikweyi iso kya kpoza ni aba ya ipu kotu wa ni.

52 Oyawose saa shobe wa,

kweyi ongawase ni wojije lo ni iso.

53 Odawino ngmemye oza neneshi,

kweyi onawolodu enya abo yeye.

54 Otoyole nu Izrayila abo,

kweyi oya yela kiyinyinyi nu ikweyi kase nu,

55 byoni oshokoyi dawada kaha ni;

di Ibirayi kpayi nu, ko gbogbo-gbogbo.>>

56 Omeremu yagye kpe Elizabe goya eta ome okwikye gole.

57 Ishi fu koni Elizabe ya moyi ni, omoyi nongo. 58 Awoya kobagye kpayinanu pwo mo Adole miyinyinyi nu, ashotu nehe kpanu.

59 Eno komahata awa ko shoyi mani ofu, aba yimu ko tiye kadanu Ozakariya, 60 ene koyi ke kadawa mo, <<Aayi! Iyenu wo Oyohana!>>

61 Aka danu mo, <<Ashishe bwipwoma kala riye mani lo.>>

62 Ebeni ashada koyi ekwu, shini ona dawiye koyi. 63 Omyabo dawa shini ana danoza ko tenena kweyi ota mo, <<Iye nu wo Oyohana.>> Ebeni igbashi kwananoho! 64 Ebebeni Ozakariya gege gwokwunu kela, kweyi sho Owuso iye. 65 Oshi yawoya ko yagye nu kwu, ebebenya ipu kikpokyi kagye ko Ojudiya ase ba kela koza ni gbodagye ni. 66 Kpiri kase ni pwela mani ba diyiwa oka mo, <<Oyi mani yawa lemoji ome?>> Abo ka Adole yo kpanu.

67 Adanu Ozakariya nwu kpo Omaku ko Owuso kweyi obane mo:

68 <<Ahan sha Adole iye, Owuso ki Izrayila,

ikweyi koni owa wa ngmase ni wakakanu ni.

69 Odaha inongmese ni gboshu ni

bwole ko oyole nu Odawuda,

70 byoni oshokoyi nekye-nekye bwokwunu kawinobane sere ni,

71 ana ngmaha shabo kawo monyekwotu kaha

kpawase ni ba yimu ka aha lo ni,

72 ona ki miyinyinyi kawada kaha,

kweyi ona yela ko okoyi sere nu,

73 ene ni ogwa kpada kaha Ibirayi ni:

74 shini ona ngmaha shabo kawo monyekwotu kaha,

shini ahan meshe danu gboshi yoya lo

75 ipu ko osere kponeshi obutu nu kurutu.

76 <<Kweyi awoyi hin aba yogwu minobane ka Ada Nyakwu ni yiso,

koni oya kwobonu da Adole ko ga kyowe tu danu,

77 shini oka dase nu ozagyogye ko ngmawa

bwebe ko nase ozalabi wa,

78 ikweyi kiyinyinyi nwashika ko Owuso kaha,

eno ya yu daha bwiso,

79 shini na yu dawase ni bebe dibu

ipu kobowu kikwu,

ona ki shiyaha owe kotu mene.>>

80 Kweyi Oyohana gye ki loshu ipu ko Omaku, kweyi oyagye ipu kimweshi gbishini obose ododa agye ki Izrayila.