1 Ebeni kpiri ka awonongbo nyiso kweyi byo ge ebe ko Obilatus. 2 Kweyi akwotu ko kwe epwo mo, <<Ato ongo mani ya fa ase ko okpagye ka aha oza bibi. Oma ana ka zegba do Okesa lo kweyi oki manu wo Omezaya, ose.>>

3 Mani oni Obilatus do Oyesu oka mo, <<Awo pini wose ka Ase ko Oyahuda la?>>

Oyesu kyogwu mo, <<Byoni oka ni.>>

4 Ebeni Obilatus tono da awose kawo osapa kpe ewa ka asuse mo, <<Nkwo ongo mani kpe epwo oyoye lo.>>

5 Ake belela mo, <<Oya tela okpagye ko Ojudiya kpiri. Okwotu bwo Ogalili, anana mani owe ebebeni wa.>>

6 Ni opwe ela mani ni, Obilatus doka mo, <<Ongo mani bwo Ogalili la?>> 7 Ishini owa gye mo Oyesu bwo obula ko Ohiridus ni, osabo gebe ko Ohiridus ni yo Ojerusele ishi oni.

8 Ohiridus shotunehe nwashika koni omo Oyesu ni, ikweyi koni oyi iyinu zoze gbeji ya webe ko mo. Bwi ipu kela ni opwo ikweyi nu ni, oya yimu ko mo ya yo oza ki igbashi. 9 Odoka kela lewa, Oyesu ke ko ojije lo. 10 Awose ka awosapa kpa awofono hagye ebeni ba kwo Oyesu epwo kpe ela loshu loshu. 11 Ebeni Ohiridus kpa awadakare nu she enyo ki gbo owuru. Asho oshiye nyakwu kweyi akwikye anu ge ebe ko Obilatus. 12 Eno oni Ohiridus kpo Obilatus wo oya; gbikyikye awo omonyekwotu kiyiwa la.

13 Obilatus kpa awose ka awosapa, kpa awose kpase kpiri tukpa, 14 kweyi oka da awa mo, <<Ala byo ongo mani wa da ami mo oya gya ase egya. Nmoma obutu kala ebeni, nke kwo kpe epwo ni ala byi wa ni lo. 15 Mamani Ohiridus kwo kpe epwo lo, pini osabo kwikye wa daha ma; byoni ala ma ni, ongo mani yo ozalabi ni gye ko yo ngmo ni lo. 16 Ikweyi koni, nyya ya aboshi kweyi ya shobita.>> 17 Ishi ki Imya ko Osheyi kpiri Obilatus ya ngma ashe oye ipu ka awo bo oruduru.*

18 Ewa ka asuse sheha kpo oko oye kponu ba mo, <<Yo ngmo! Sho Obaraba bita daha!>> 19 Abyo Obaraba go oruduru ikweyi koni otonu ogya kweyi ngmase.

20 Obilatus ki duwo oka ikweyi koni oya yimu ko sho Oyesu bita. 21 Awa ke ba ngmegba mo, <<Yo poshi! Yo poshi!>>

22 Obilatus ki kela kpa awa ko omweta mo: <<Ojiya? Oji ni ongo mani ya? Nmojije ni oya ni aba kwe epwo ko yo ngmo ni lo. Ni olemani oni nyya ya aboshi kweyi ya shobita.>>

23 Awa ke ngmegba kpo oko nwa mo aba yimu shini ana yo poshi, kweyi egba ngmongmo wa yo yo da awa. 24 Obilatus kwepwo byoni aba yimu ni. 25 Osho Obaraba ni ngma ase ki tonu ogya ni ayo kwu to oruduru ni bita byoni adoka ni, kweyi oyo Oyesu da awa mo ana yo oza ni shuwo otu ni.

26 Ni abyo ba ga ni, agbayi kpo simo ni wa ase ko Osiriya ni, oya wa bwo ogya leke kweyi abyo ko oshu zo oshi ko Oyesu kweyi gboso itikpi. 27 Ogbayi kase nwashika gboso, kpa anya ni ba kyegba ba byotu ikweyi nu. 28 Oyesu pyiyi muwa kweyi kamo, <<Anya ko Ojerusele, ala ka kyegba ikweyin lo; ala kyegba ikweyi kiyi kala kpa ayi kala. 29 Koni ishi yawa ba ni ala ba kamo, <Otunehe yo kpa anya ni wo odoma ni, ipu ni moyi ebibye lo ni kpa ame ni ayi gwa ebibye lo ni!> 30 Ebeni

<<<aba ka de efu mo, <<Gbo saha!>>

Kweyi ikpokyi na, <<Yaha gwu!>>>*

31 Owoni aya kpe efu meme mani, oya lemoji koni owo ngmongmo?>>

32 Abya ango epa ni wa awiyi ni ga kpa anu ko yuwa ngmo. 33 Ishini afebe ni aba yogwu mo Okpokwu-ki-ikweyi ni, ebeni ayo poshi kpa awiyi epa, oye abore nu, oye aboshe nu. 34 Oyesu kamo, <<Ada, yo ozalabi wa na, koni agyo oza ni aba ya ni lo.>> Kweyi ayo oshiye nu yiko bwe ebe ke ekye tota.

35 Ase hagye ba mo kweyi awoteyi ba pyi igboro. Akamo, <<Ongma ashishini kase; ona ngmi iyinu owoni owo Omezaya ni Owuso Shu ni.>>

36 Awadakare ki pyi igboro. Ada anu inyi wowa 37 kweyi akamo, <<Owoni owo ose ka Ase ko Oyahuda, ngmi iyo.>>

38 Iso ki ikweyi nu atenena kamo: OMANI WO OSE KA AWOYAHUDA.

39 Oye ipu ka awiyi ni ayuwa poshi ni sesa mo: <<Awo wo Okristi lalo? Ngmiyo kpa aha la!>>

40 Omepa ko owi ke gbapwo mo, <<Oya yoshi ko Owuso lo, awo ni akwe epwo kpa anu gyogye ni? 41 Ada aha owe gyogye la, apya abola ko oza ni aya ni. Ongo mani ke yo ojije labi lo.>>

42 Ebeni okamo, <<Oyesu rela hin ishini ogipu ko obula wo.>>

43 Oyesu kyogwu mo, <<Nyya kadala okwokwoshi, ikyeni oya yo kpa ami ole ki iso.>>

44 Bwi isheno, ebebe nya dibu okpagye ni go ogye eta ko onose, 45 ni eno sha ni. Kweyi ayikyi kofunu ko Ole ko Owuso ko we epa. 46 Ebeni Oyesu kyegba kpo oko nwa mo, <<Ada nyyo omaku hin yi da awa abo.>> Ishini okela mani ni ogbo layi nu ki igbeji.

47 Ishini oteyi ka adakare mo oza ni gbodagye ni, osho Owuso iye kweyi kamo, <<Ko okwokwoshi ongo mani gbo ozalabi lo!>> 48 Ishini kpiri kawase ni gbayi ko yo olobene ko oza mani mo oza ni gbodagye ni, aya abo shipu kweyi aga wa kpo otu byobya. 49 Kpiri kawase ni gyo ni kpa anya ni gboso bwo Ogalili ni hagye ebe lenu ba me ebe.

50 Ebeni ongo oye iye nu wo Isu, Owo oye ipu konongbo ka Ase ko Oyahuda, owa aseneshi, 51 okyogwu kpo oza ni agbo ni lo. Obwo ogya ka Arimatiya okpagye ko Oyahuda kweyi oya gbeyi ko obula ko Owuso ko wa. 52 Oge ebe ko Obilatus ga doka ko okwu ko Oyesu. 53 Ebeni oyosa wo okpagye, oyo to opa kweyi yo ti ipu ka amiri na abwu ipu ko okpo ni anya ashishe ipu nu lo. 54 Owe eno ko kyatu kweyi Eno ko Minyo yo pee.

55 Anya ni wa kpo Oyesu bwo Ogalili gboso Isu kweyi ama amiri kpe ebe ni ayi ikpiye ko Oyesu ta anu ni. 56 Ebeni ago ole ga zo oturare kpa ano ko nyi ikpiye. Eno ko Minyo, awa ke minyo byoni owo odu wa ni.