1 Ebeni Oyesu kelase da awogboso ko shiya awa mo ana tinarigwu ipu ki ishi kpiri, ana ka gbotu lo. 2 Okamo, <<Ipu ko ogya oye, agbi ino kepwo ni ya yoshi ko Owuso lo, oki ya ma ase gyiyi lo. 3 Kweyi onyokwu oye yo ogya ni ya webe nu wa bo mo, <Kepwo ko okwokwoshi dami kpo oya kepwo hin.>

4 <<Ishi nwashika oya tanu. Ogwejeji oke ka diyinu mo, <Koni nyya yoshi ko Owuso lo nki ya mase gyiyi lo ni, 5 nyya hagye shini na ma mo onyokwu mani pyo okwokwoshi, ikweyi koni oya yuma apya ni!>>>

6 Kweyi Adole kamo, <<Ala moza ni ino kepwo ni gbo okwokwoshi lo ni ka ni. 7 Owuso ya gege ya dase nu ni oshu ni okwokwoshi koni aba kyegba danu kotu ke eno ni lo? Oya pyitikpi tuwa? 8 Nyya ka dala, so oma mo apyo okwokwoshi wa papa. Ni olemani, ishini Oyi ka Asuse wa, oya wa pya ase ni gbo otuse ese mani?>>

9 Oyesu ki kelase ikweyi kawase ni gbotu ipu koneshi wa kweyi ba mamo awa shashi sha shishini: 10 <<Ango epa gipu ko Ole ko Owuso ko ga tinarigwu, oye wo Ofarisi, omwepa wi ino zegba. 11 Ofarisi nyiso kweyi tinarigwu ikweyi ki iyinu mo: <Owuso, nkeshi wo koni nlema byase shishini lo ni; nyya wiyi lo, nyya yo ozalabi lo, nyya beba lo, nke le byi inozegba mani lo. 12 Nyya kwokwunu igbe epa ipu ko obize. Kweyi nyya zo oye ipu ki igwo ko oza ni ngbo ni kpiri.>

13 <<Inozegba ke hagye ebe lenu. Ogege ziyi mi iso lo, okwagye ya shagye mo, <Owuso mi iyinyinyi hin, inozalabi.>

14 <<Nyya kadala, inozegba go ole kpo ozalabi lo ebe ko Owuso, ole bya ashe oni lo. Koni ase ni zi iyinu iso, aba zo wo ojije lo, ase ni ke yikweyi bagye, aba zo iso.>>

15 Ebeni abya ayi leke wa do Oyesu shini ona suwa abo ikweyi shini na ki tuwi inarigwu. Ishini awogboso ma mani ni, agba awase ni byuwa wa ni apwo mo ana hagye. 16 Oyesu ke ya ayi oni ogwu webe nu kweyi kamo, <<Ala shayi leke bita na webe hin, ala ka wuwobi lo, obula ko Owuso wa akakawa la.>> 17 Nyya kadala okwokwoshi, ase ni zo obula ko Owuso byo oyi leke lo, oya gipu nu lo.>>

18 Oteyi oye wa do Oyesu okamo, <<Inofoza neshi, oji ni nyyaya shini na pyo olayi ko gbogbo-gbogbo?

19 Oyesu kyogwu mo, <<Ojiya ni oya yumo ogwu mo ase neshi? Ashishe wo oneshi lo so Owuso fufu nu. 20 Ogyo ono, <Ka beba lo, ka ngmase lo, ka wiyi lo, ka ba ase ela lo, geyagye da ada wo kpe ene wo.>>>

21 Okamo, <<Kpiri ka awo oza mani nyya ishini nwwo oyi leke ni.>>

22 Ishini Oyesu pwe ela mani ni, oka da anu mo, <<Osho kpo oje. Ga yo oza ni ogbo ni kpiri yi ra shini oyi ikwiri yi da awoleha, kweyi oya gbo odu iso. Ome shini owa gbosun.>>

23 Ishini opwo mani ni, otu nu bya kotata, ikweyi koni owase ni gbo odu nwashika ni. 24 Oyesu tiyi mo kweyi kamo, <<Oya lono do olodu ko go obula ko Owuso! 25 Nki ya kadala, oya le kwee do onyakwimi ko bwo owu ko onya, sho olodu ko go obula ko Owuso.>>

26 Awase ni pwela mani do okamo, <<Owoni olemani, anoho ni aba ngma anu?>>

27 Oyesu kyogwu mo, <<Ebe kasuse oya lemani lo, ebe ko Owuso ke kpiri ko oza oya gege ko ya.>>

28 Obitrus ka da anu mo, <<Aha shojoji ka aha bita kweyi gboso!>>

29 Oyesu ka dawa mo, <<Nyya ka dala okwokwoshi, kpiri kase ni sho ole nu bita kwe onyanu kwe ayinanu nongo, kwe inanu kpa ada nu kwe ayinu ikweyi ko obula ko Owuso 30 oya pyo oza nwashika ni sha awo ni ipu kishi mani kpishi ni ya wa ni kpo olayi ko gbogbo-gbogbo.>>

31 Oyesu ya awogboso igwepa ogwu go okoka kweyi ka dawa mo, <<Aha ba go Ojerusele, kweyi kpiri koza ni awobane ta ikweyi ko Oyi ka Asuse ya gya. 32 Aba yo ya nabo da awase ni wo Ase ko Oyahuda lo ni. Aba gbowuru, aba sesa, aba tehe sho, aba ya aboshi kweyi yo ngmo. 33 Eno ko omweta oki ya nyiso bwa amiri.>>

34 Awogboso gyo oza ni oya ka ni lo. Ayikweyi kela yi teba da awa, kweyi awa gyoza ni oya kela ikweyi nu ni lo.

35 Ni Oyesu yo pee kpo Ojeriko ni, ofiyi oye yagye okoka ko owe ya boza. 36 Ishini opwoko kewa ba shigbo ni, odoka mo oji ya gbodagye. 37 Aka danu mo, <<Oyesu ko Onazareti pini ya shigbo la.>>

38 Oka mo, <<Oyesu, Oyi ko Odawuda, miyinyinyi hin!>>

39 Awase ni bohobu ni gbapwo kweyi kamo ona sha, anu ke ya zoko iso mo, <<Oyi ko Odawuda miyinyinyi hin!>>

40 Oyesu hagye kweyi ka dawa mo ana byo ongo oni wa danu. Ishini abyo wobutu nu ni, Oyesu do oka mo, 41 <<Oji ni oya yimu shini na ya dawo?>>

Okyogwu mo, <<Adole, nyya yimu ko mebe.>>

42 Oyesu ka danu mo, <<Gwiyi shini omebe, otuse wo dawo ogege.>> 43 Ebebeni omebe kweyi gboso Oyesu, ya sho Owuso iye. Ishini kpiri kase ni bebeni ma mani ni, awa ki sho Owuso iye.