1 Oyesu ka da awogboso mo, <<Oza ni ba ya ase ba yo ozalabi ni bawa gbodagye, owe yo kpase ni ke yuwa gbodagye ni. 2 Oya shoshi she shini ana ye ego ko gboza nyakwu gbo bo oko kweyi yo ta gi ishu nyakwu sho oni oya yo oye ipu ka ayi leke mani ya yo ozalabi ni. 3 Ni olemani oni, ala gbera.

<<Owoni oyene wo yo ozalabi, kela kpa anu, kweyi owoni oshagbotu, yo ozalabi nu na. 4 Owoni oyo ozalabi igba ahapa eno oye kponu kweyi owa ta awo igba ahapa mo, <N shagbotu,> yo ozalabi nu yigbo.>>

5 Ayikoko ka da Adole mo, <<Yo otuse ka na loshu!>>

6 Adole kamo, <<Owoni ala gbo otuse titi byi ikpo ko omusta, ala ba gege ba ka de efu nyakwu mani mo, <Shu ga hagye ipu ki ishu nyakwu,> kweyi oya pwela kala.

7 <<Ana ma ashe ipu kala gbo oyole ni ya sheho da anu kwe ya gbeho ko otukpo da anu. Ishini okwikye bwi ipashi wo ole, oya ka da anu mo, <Na wa yagye na oroza>? 8 Oza ni oya ka ni yo na lo, <Ga yo ozarore ko onose dami, kyi iyo tu gbeyi hin, na re na gwa, ome shini awo re ki gwa.> 9 Oya shotunehe kpo oyole mani ikweyi koni oyo oza ni oka da anu ni? 10 Mamani ala, ishini ala yo oza ni aka da ala mo ala ya ni, ala kamo, <Aha wa ayole kin la, aha ba yo oko ni aka daha ni kin la.>>>

11 Eno oye Oyesu ya go Ojerusele, obwe eji ko Osamariya kpo Ogalili. 12 Ni oya gipu ko ogya leke ni, ango igwo ni gbo ose ki iyiwa ni ga tanu ebe lenu 13 kweyi ashogwu yo kpo oko nyakwu mo, <<Adole, Oyesu, miyinyinyi ka aha!>>

14 Ishini oziyi iso muwa ni, okamo, <<Ala ga shini awosapa na ma ala.>> Kweyi ishini aba ga ni apyo ogege wa.

15 Ashe oye ipu wa, ishini oma mo anu pyo ogege ni, okwikye wa sho Owuso iye kpo oko nyakwu. 16 Okwagye obutu ko Oyesu kweyi yi iyi lagye kweyi shotunehe da anu. Ongo oni wa ase ko Osamariya la.

17 Oyesu do oka mo, <<Ala wa ase igwo pini pyo ogege lalo? Ashishini kase ahane bi ini? 18 Ashishe ipu wa kwikye wa sho Owuso iye lo, so ogboga mani?>> 19 Ebeni oka da anu mo, <<Nyiso shini oga, otuse wo da awo ogege.>>

20 Eno oye Awofarisi do Oyesu oka mo, ishi nya ni obula ko Owuso ya wa? Oyesu kyogwu mo, <<Obula ko Owuso ya wa byoni ala kpi iyi shagye ni lalo, 21 oke wo oza ni aba mo, <Oyoma,> kwe <Oya anoni oma> lalo, <ikweyi koni obula ko Owuso yo kpa ala.>>

22 Ebeni oka da awogboso mo, <<Eno ya wa ba ni ala ba yimu ko mo Oyi ka Asuse, ala ke ba ma lo. 23 Ase ba kadala mo, <Oyoma!> Kwe <Oyo oma!> Ala ka nyinya ka awa lo. 24 Koni eno ko owowa ko Oyi ka Asuse ya le byo oyoyu ko ola ka akpula ni ya yu okpowuso bwa agbabo oye ga agbabo oye ni la. 25 Ikyikyo oke ya mowe nwashika kweyi ase ki ishi mani ba tela nu.

26 <<Byoni ogbodagye ishi ko Onuhu ni, mamani oya gbodagye ishi ko owowa ko Oyi ka Asuse. 27 Ase ba re, ba gwa, aba gba anya kweyi ba bya anya go oda oba gbi ishini eno ni Onuhu gipu ko owu ni. Ebeni inyo wa yuwa re kpiri.

28 <<Mamani ishi ko Olotu. Ase ba re, ba gwa, aba riyo ba kyanu ra, aba to oza aba mo ole. 29 Enoni Olotu ke sho Osodom bita ni, ola wa bwi iso kpo onwa ki igbe wa yuwa re kpiri.

30 <<Oya lemani eno ko owowa ko Oyi ka Asuse. 31 Enoni ase ni yi iso ki inu kole nu naka sa wo okpagye wa zo ojije ipu kole lo. Mamani ase ni yi ipashi naka kwikye ga kpo oshiye nu lo. 32 Rela ko onya ko Olotu! 33 Kpiri kase ni takirikwu ko yo olayi nu gbo, oya yi tonu, kweyi ase ni yo olayi nu tonu, oya pye. 34 Nyya kadala, ipu ko otu oni ase epa ba gwutagye ikweyi ko ogwudu oye; aba yo oye ya bize kweyi ba sho oye bita. 35 Anya epa ba bi ikweyi ke ego ba gboza dudu; aba yo oye bize kweyi sho oye bita. 36 Ango epa ba bi ipu ke eho ba sheho, aba yo oye bize kweyi sho oye bita.

37 Ado oka mo, <<Ebenya Adole?>>

Okyogwu mo, <<Ebeni okwu tagye ni pini ayikyefu ba sa anu la.>>