1 Oyesu bwishu ko Ojoda wa nwu, kpo Omaku ko Owuso, kweyi sho Otarakoniti bita, kweyi Omaku byo gipu ko ododa, 2 oyebeni keno awene, ibiri ya moma. Orojije lo ipu kishi oni, ogwejeji emye ya ngmo.

3 Ibiri ka danu mo, <<Owoni owo Oyi ko Owuso, yikyikpo mani pya wikyoga.>>

4 Oyesu kadanu mo, <<Ayitota ipu kokpa ko Owuso mo: <Ikyoga kin pini ya yase ya gbo layi la lo.>>>

5 Ibiri byo giso ebelenu kweyi ga shiyanu obula kese ipu kishi gbayayi. 6 Kweyi okadanu mo, <<Nyya dawo oshu kese kposhinu kpiri, koni kpiri koza mani ayi dami ni, kweyi ami ki gboshu ko dananoho ni nyyimu ko danu ni. 7 Owoni ogeyagye dami, kpiri koza mani ya wakakawo.>>

8 Oyesu kadanu mo, <<Ayitota ipu kokpa ko Owuso mo: <Geyagye da Adole Owuso wo, anu fufunu pini oya yoko danu la.>*

9 Ibiri byo go Ojerusele kweyi ga hagye iso ebelenu ikweyi kole ko Owuso. Okadanu mo, <<Owoni owo Oyi ko Owuso, shibi bwebeni gokpagye. 10 Koni ayitota ipu kokpa ko Owuso mo, <Owuso ya kada ayoleho nu shini anagbeho wo.> 11 Akyi kamo, <Aba wa yabo byo iso, shini oka yikpo gwakyo lo.>>>

12 Oyesu kadanu mo, <<Okpa ko Owuso kamo: <Ka ma Adole Owuso wo ma lo.>>>

13 Ishini ibiri moma kweyi ni, oshobita gbishi oye.

14 Oyesu kwikye go Ogalili, ipu koshu ko Omaku ko Owuso, kweyi oshu ikweyi nu ge ebebenya agbabo kokpagye ni. 15 Oya foza ipu kekpa, kweyi ananoho ba kanu.

16 Okwikye go Onazareti ebeni abyo gye ni, kweyi Eno ko Minyo ogipu kekpa wa byoni owodu nu ni. Kweyi onyiso ko mokpa. 17 Ayo okpa kinobane Ishaya nabo danu. Ogwanu kweyi omebe ni ata mo:

18 <<Omaku ka Adole yo kpami, ikweyi koni osumabo ikweyi ko tono koshu neshi dawoleha. Otumoleho ebe kase ni ayuwa shetu ni shini ana shuwa bita, ko gwofiyi iyi, ko ngmawase ni aba buwikpo ni, 19 kweyi na ka dase mo omani wishayi ni Adole ya yase oneshi ni la.>> *

20 Ebeni oyo okpa yi la, kweyi oyi dase ni ya yoko ipu kekpa ni kweyi oga yagye. Ananoho ni bipu kekpa ni kpiyi kwo. 21 Kweyi okwotu ko kadawa mo, <<Ikyeni oza ni okpa ko Owuso ka ni ala pwo akpaha kala.>>

22 Kpiri wa koneshi nu kweyi igbashi yuwa kwu ikweyi kela neshi ni ya bose bwokwunu nu ni. Adiyiwa oka mo, <<Omani woyi ki Isu yona lo?>>

23 Oyesu ka dawa mo, <<Nggye mala basasuse mani kpami mo, <Oloboshi, ngmiyo! Yoza ni aha pwo moya Okapanahu ni daha ipu ko ogya wo.

24 Oki ka dawa mo, <<Nyya ka dala okwokwoshi, aba kyogwu kpinobane ipu ko ogya nu lo. 25 Ami ke ya kadala okwokwoshi, ishi ki Iliya agba anyokwu nwashika ipu ki Izrayila, ishini owuso tela koyiwo kishayi eta kpoya ihiri kweyi emye ngmase kotata ebebe nya okpagye ni. 26 Ati Iliya oleho gebe kashishe wa lo, ke so onyokwu oye ipu ko Ozerefa ka agbabo ko Osido. 27 Aki agbawine kiyiwa nwashika ipu ki Izrayila ishi kinobane Elisha, kweyi oyoye ipu wa pyogege lo, ke so Onahama ni wase ko Osiriya ni.>>

28 Ishini apwela mani ni, otu kase kpiri ni bipu kekpa ni bya. 29 Anyiso kweyi nenya bose shogya, kweyi abyo gikweyi kikpokyi ni yogya wa ni shini ana to bwebeni gokpagye. 30 Oke yawu bwo otutehe wa kweyi kwowe ganu.

31 Ebeni ogo Okapanahu, ogya ko Ogalili, Eno ko Minyo okwotu ko fasoza. 32 Igbashi yuwa kwu ikweyi kozafofu nu, koni ela nu gboshu ni.

33 Ipu kekpa, ongo oye gbo omaku bibi. Osheha kpoko nwa kamo, 34 <<Ojino oya yimu ebe kaha, Oyesu ko Onazareti? Owa ko wa yaha ngmo la? Ngyase ni owe ni, owase Sere ko Owuso la!>>

35 Oyesu kela mo, <<Sha! Bose shikpiye nu!>> Ebeni omaku bibi nwongo mani pyagye obutu wa kweyi onyiso kwikpiye nu ebyibye fa lo.

36 Igbashi yase kpiri kwu kweyi aba diyiwa oka mo, <<Ozafofu mani lemoji? Ogbo omaku bibi eha kpo oshu kweyi abose!>> 37 Kweyi oshu ikweyi nu gebebenya ipu ko ogya ni bagbabo ni.

38 Oyesu shekpa bita kweyi go ole ko Osimo. Oshu yene konya ko Osimo kwu, kweyi abo Oyesu mona danogege. 39 Oweyi kwagye obutu nu kweyi ka doshu mona shobita, kweyi oshu shobita. Ebebeni onyiso kweyi okwotu ko yozarore dawa.

40 Ishini eno shani, abyase ni gbedo ko ose gogo-gogo ni webe ko Oyesu, kweyi osuwabo oyoye kweyi kpiri wa pyogege. 41 Kweyi omaku bibi bose shikpiye kase nwashika basheha mo, <<Owo Oyi ko Owuso la!>> Oyesu ke kyaweha kweyi wuwobi ko kela, ikweyi koni agye mowo Okristi ni.

42 Ishini ebenya ni Oyesu shogya ni bita kweyi ga yebye fufunu. Ase ba tikpo nu kweyi ishini agebe ni oyanu ni, aba yimu shini ona ka shuwa bita lo. 43 Oke kadawa mo, <<Owotiri shini na tono koshu neshi ko obula ko Owuso gogya shishini mamani, ikweyi koni oza ni ya ni atumoleho ni oma.>> 44 Kweyi ogohobu kpono totu ipu ka awekpa kokpagye ko Ojudiya.