1 Ishini ewa ka asuse nwashika gbayi kweyi akwotu ko bi iyiwa ikpo, Oyesu ko kela da awogboso ikyikyo kamo, <<Ala gbera kpo oyisi ka Awofarisi ni wa awoyoziyi ni. 2 Ojoji ni ayi teba ni aba yi fu tese, kwe oza ni aya ipu ke ebe dibu kpiri aba yi fu tese. 3 Oza ni ala ka otu, aba pwo eno, kweyi oza ni ala ka kyo ipu ko oda, aba yi ka nwa ese da ase na pwo.

4 <<Nyya kadala, awoya hin, ala ka yoshi kawase ni ba ngmi ikpiye kweyi, itikpi nu aba gege ko yo ojije lo. 5 Ami ke ya shiya ala ase ni ala shu ko yoshi nu ni. Ala yoshi kase ni gbo oshu ko yi ikpiye ngmo ki gbo oshu ko yota go ole ko ola. Ko kwokwoshi, yoshi nu. 6 Aba yi igbano eho yi ra ikweyi ki ikwiri epa lalo? Ni olemani oni, oyoye ipu wa Owuso nwanyi kpa anu lo. 7 Ko okwokwoshi, inyeyi ki ikweyi kala, ayi koka la. Ala ka yoshi lo; ala shi igbano nwashika.

8 <<Nyya kadala, kpiri kase ni hagye kweyi kyogwu manu wa akakan obutu ka asuse, Oyi ka Asuse yaya mamani da anu obutu ka ayoleho ko Owuso. 9 Ase ni ke te elan obutu ka asuse, aba te ela nu obutu ka ayoleho ko Owuso. 10 Kweyi kpiri kase ni kela bibi ikweyi ko Oyi ka Asuse aba yo na, ase ni ke kela karigbetu ikweyi ko Omaku ko Owuso aba yo na lo.

11 <<Ishini abyo ga awekpa, kwe ebe ka awoteyi kpo ogoneti, ka byotu ikweyi ko oza ni oya ya ko ngmiyo kwo oza ni oya ka ni lo, 12 koni Omaku ko Owuso ya fo oza ni oya ka ipu ki ishi oni.>>

13 Ebeni ashe ipu ke ewa ka da anu mo, <<Inofoza, ka do oyenen na yo ogwu ko kpa ami.>>

14 Oyesu kyogwu mo, <<Ongo, anoho zun wine ko kepwo kwe ino kyela kala gwo?>> 15 Ebeni oka da awa mo, <<Ala gbera! Ala kyiyi kala tu she edo kimu kiyi kala kpiri, olayi ka asuse ye ebe ko oza nwashika ni ogbo ni lalo.>>

16 Kweyi okelase mani da awa mo, <<Eho ko olodu oye yi izire neshi. 17 Oka di iyinu mo, <Nyya ya moji? Nggbebe ko kpi izire hin sho lo.>

18 <<Ebeni okamo, <Oza ni nyyaya ni yoma. Nyya yo owuya hin ya kye, shina mo nyakwu oye, kweyi nyya kpi izire kpi iyo hin kpiri ya sho. 19 Kweyi nyya ka diyun mo, <Ngbo oza neshi nwashika ni ya bagye ki ishayi nwashika. Yagye shino ore, gwa ki minyo.>>

20 <<Owuso ke ka da anu mo, <Awo ikyo! Otu mani aba yo olayi wo ya bize sho. Anoho ya zo oza ni okyanu ya di iyo mani?>

21 <<Omani ya gbodagye kpase ni kpo oza shagye di iyinu kpiri ni, anu ke gbo odu ebe ko Owuso lo.>>

22 Ebeni Oyesu ka da awogboso mo, <<Mani oni, nyya kadala mo, ala ka byotu ikweyi ko olayi, ela ko ozarore kwe ikweyi ki ikpiye kala kpe oza ni ala ba shoko ni lo. 23 Owushoshu kala shoshi sho oza rore kweyi ikpiye shoshi sho oshiye. 24 Ala ma awigbano, aba toza kwe aba kyi izire lo, agbo oda ko shi iyo kwe owuya lo, Owuso ke ya dawoza ko rore. Ala ke shoshi sha awigbano mani ebe nu! 25 Anoho ipu kala no otu byobya nu ya gege ya fi ishi gbayayi mo olayi nu? 26 Ni ala ba gege ko yo oza gbayayi mani lo, ojiya ni ala ba byotu ikweyi ka ashishini.

27 <<Ala ma awo oshefu ni ba bwu ni, aba yoko kwe aba to oshiye abiyiwa lo. Kwikyikyeni, nyya kadala mo, kwo ose Osolomo kpo odu nu, oshiye nu shoshi shaka awo oshefu ki ikyashi lo. 28 Kweyi owoni olemani pini Owuso ya sha akyashi iyo la, ala muwa ikyeni kweyi ayo ola kwuwa okyi akyala, ala ba ma byo oya sha ala oshiye lo? Ala awine ko otuse gbayayi! 29 Ala ka yo otu kala so oza ni ala ba re kwe ba gwa lo; ala ka byotu ikweyi nu lo. 30 Awopeka kese ba labo ka awozamani kpiri, ada kala gye mo ala ba yimu ka awozamani mamani. 31 Ala ke tikpo ko obula ko Owuso ikyikyo oza mani kpiri aba yi da ala.

32 <<Ala ka yoshi lo, ala ase gbayayi ki ikpo hin, ikweyi koni owi imu ko otu ka Ada ko da ala obula. 33 Ala yo oza ni ala gbo ni yi ra shini ala yi ikwiri yi ko do oleha. Ala kpo oshu kala shi iso ebe ni aba sawukye lo ni, odu ki iso ni ya kweyi lo ni. Ebeni owi oyoye ya shabo lo, kweyi eha ba ganu lo ni. 34 Ebeni odu kala yanu, anu pini otu kala ya ba banu la.

35 <<Ala sokugba ko meshe kweyi ikwomu kala na kwokwu, 36 byoni ango ba gbabo ka adole wa na kwikye bwe ebe ki imya ko onyape ni. Ishini owa gwofunu, ebebeni aba gwofunu da anu. 37 Oya shoshi do oyole ni kyi iyinu tu kweyi ya gbabo ko owowa ka adole nu. Nyya ko okwokwoshi da ala, oya wa sokugba kweyi ya da awo oka kweyi ya meshe da awa ishini aba gye ko roza ni. 38 Oya shoshi da ayole neshi ni adole wa wa ta awa kyiyiwa tu, otutehe ko otu kwi otukpokyi. 39 Nke ya yimu sha ala gye mo: Owoni adole gyi ishi ni owi ya wo ole nu, obi ya sho owi bita ya fofunu kweyi ya gipu kole nu lo. 40 Ala ki bagye kpe era, ikweyi koni Oyi ka Asuse ya wa ishini ala yo otutagye lo ni.>>

41 Obitrus do oka mo, <<Adole, oya kelase mani kpa aha la, kwe kpa ananoho?>>

42 Adole kyogwu mo, <<Anoho wo oyole ni gbo otusose ki ziyi ni, ase ni adole nu ya yo otuso kweyi ki sho ole nu bita da anu kweyi kamo na da ashishini ka ayole oza rore ipu ki ishi neshi. 43 Oya shoshi owoni adole ko oyole mani wa ta anu yo oko nu neshi ishini okwikye wa. 44 Nyya kadala okwokwoshi, oya yo oza ni ogbo ni kpiri yi da anu abo. 45 Obi ke wo oyole bibi la, obi ya ka ipu ko otu nu mo, <Adole hin ya ga gbeji,> Kweyi ya kwotu ko gwa ashishini ko oyole nongo kpa anya kweyi bi ya roza ya gwinyi kpa ayi ki inyi. 46 Adole ko oyole mani ya wa eno ni ototuse lo kweyi oya wa ishini ogye lo ni. Adole ko oyole mani wa yo shigbo wuruwuru kweyi yayo tagye kpa awase ni gyo Owuso lo ni.

47 <<Oyole ni gyo oza ni adole nu ya yimu ni kweyi yagye kyi iyi nu tu lo, kwe yo oza ni adole nu ya yimu ni lo, aba gwize kotata. 48 Oyole ni ke gyo oza ni adole nu ya yimu lo kweyi yo oza ni ashu ko da anu owe ni, aba gwize gbayayi. Ase ni ada anu nwa, aba yimu ko oza nwa ebe nu. Ase ni ayo oza nwa da anu abo, aba doka ko oza nwashika ebe nu.

49 <<Ola pini nbi we ese la, obi shababo hin obi kye wa! 50 Ngbo Obatisma ni aba yun ni, nze ipu ko otu hin sa ayun! 51 Ala ba ma mo nbyo omene we ese mani la? Aayi! Nyya kadala, ke wo okoko la. 52 Bwi ishi mani go ohobu, ase eho ipu ki ipwoma oye ba yi iyiwa ko, ase eta ba wo omonyekwotu kase epa kweyi ase epa ba wo omonyekwotu kase eta. 53 Aba yi iyiwa ya ko: ada ya wo omonyekwotu ko oyi, oyi ya wo omonyekwotu ka ada, ene ya wo omonyekwotu ko oyi nu nonya, oyi nonya ya wo omonyekwotu ki inanu, inoba ya wo omonyekwotu ko onya ko oyi nu, onya ko oyi ya wo omonyekwotu ki inobunu.>>

54 Oyesu ka de ewa ka asuse mo, <<Ishini ala mo Owuso tobi bwe eye, ebebeni ala ka mo, <Owuso ya yimu kowa.> Kweyi oya wa. 55 Ishini owu ta bwo onose, ala ka mo, <Ebe yawa dola.> Kweyi ebe ke wa dola. 56 Ala awoyoziyi! Ala gyishi ko gwi ikweyi kese kpo okpowuso, ojiya ni ala gege ko gwi ikweyi ki ishi mani lo?

57 <<Ojiya ni ala abiyikala ba roza neshi ko ya lo? 58 Yela gwo kpo omonyekwotu wo papa ishini oya byo goda ko kepwo ni, yela gwo kpa anu ishini ala tayayo bo owe ni, lalo oya byo go obutu ki ino ke epwo, ino kepwo yayo nabo di ino sha ase tu shini ana yo to oda. 59 Nyya ka da awo, oya bose lo so sore ki ikwiri kpiri.