1 Ipu kishayi igweho ni Okesa Otiberiyu wose ni, Opontu Obilatus woteyi ko Ojudiya, Ohiridus woteyi ko Ogalili. Oyadanu Ofilibus woteyi ki Ituriya kpo Otarakoniti, Olisaniya wa ka Abiliya. 2 Ipu kishini Anas kpo Okayafas wosapa nyakwu ni, Owuso kela kpo Oyohana oyi ko Ozakariya ipu kododa. 3 Ogipu kawogya ni kwishu ko Ojoda ni ya tono kweyi ki ya yo Obatisma shini ase na shagbotu shozalabi wa. 4 Byoni ayitota ipu ko kpa kinobane Ishaya ni mo,

<<Oko yo ododa ya tono mo,

<Ala kyowetu gbeyi kowowa ka Adole!

Kyowe tiriri danu!

5 Aba yogowu kpiri ya yi gwu, aba yefu kpikpokyi kpiri yayi sa.

Aba yowe ni tokoka ya nata tiriri, owe ni gbogo aba kyanu ya.

6 Kpiri kasuse ba mino ngmese bwebe ko Owuso!>>>

7 Ishini ewa kasuse ba webe ko Oyohana shini ona yuwo obatisma ni, okadawa mo, <<Alayi kifufulegboji! Anaho pyala akpaha mo ala bose shipu kanya ko Owuso ni yawa ni? 8 Ala yoza ni ya sayi ase mo ala shagbotu shozalabi kala ni. Ala kaka diyi kala mo, <Aha wayi ki Ibirayi lo.> Nyya kadala, Owuso ya gege ya pyakyo mani ya wa ayi ki Ibirayi. 9 Byonabani ayokwunu ka aga kwotu kefu wa, Efu ni gwa neshi lo aba yogo kweyi yi kpo shola.>>

10 Ewa kasuse doka mo, <<Oji naha ba ya?>>

11 Oyohana kyogwu mo, <<Kpiri kase ni gbo oshiye epa, ona yoye dase ni gbo lo ni. Ase ni gbozarore, na ya mamani.>>

12 Awozegba ki wa shini ana yuwo obatisma kweyi adoka mo, <<Inofoza, ojini aha ba ya?>>

13 Okadawa mo, <<Ala ka zegba shoni ono kokpagye ka ni lo.>>

14 Ebeni ashishini kawadakare doka mo, <<Aha ba ya moji?>>

Oyohana kyogwu mo, <<Ala ka basela kweyi zikwiri koshu abo wa lo. Ala shotunehe kpoza ni aba salore ni.>>

15 Ase kpiyi showe ba gbeyi kinongmese, kweyi aba diyiwa oka ipu kotu mo kwe Oyohana pini wo Okristi la. 16 Oyohana nyuwagbo mo, <<Nyya lo obatisma kpinyawo, ashe ni shun ni yawa ba ni ami gye ko yo okpabawu kikpo nu ngma lo ni. Anu ya wa yalo obatisma kpo Omaku ko Owuso kpo ola. 17 Oya wa kpo oda abo nu wa towu kizire, oya yikpo kizire neshi ya sho owuya, omutu ke oya yi yola ni gbo omyomyi lo ni.>> 18 Oyohana kela nwashika dase, oki tono koshu neshi ko Owuso dawa.

19 Oyohana ke gbo Ohiridus oteyi apwo ikweyi koni odoka konya ko oyinanu Ohirodiya kpozabibi kpiri ni oya ni, 20 Ohiridus yoza ni shozabibi nu kpiri ni, oyo Oyohana kwu toruduru.

21 Ishini ase nwashika wa yobatisma ni, Oyesu ki wa yo obatisma. Ishini oya tinarigwu ni, okpowuso gwa, 22 kweyi Omaku ko Owuso sa byo otitiribi ikpiye nu. Oko bwipu kiso ya kamo, <<Awo wo oyi hin ni nyya yimu ni; otu hin yasha kpawo.>>

23 Oyesu kwotu koko nu ishini owishayi aweta ni. Ase ba kamo owoyi ki Isu, oyi ko Oheli,

24 Oheli woyi ko Omatat, Omatat woyi ko Olawi, Olawi woyi ko Omeliki, Omeliki woyi ko Ojanayi, Ojanayi woyi ki Isu, 25 Isu woyi ko Omatatiya, Omatatiya woyi ke Emosi, Emosi woyi ko Onahu, Onahu woyi ke Esili, Esili woyi ko Onageyi, 26 Onageyi woyi ko Omatu, Omatu woyi ko Omatatiya, Omatatiya woyi ko Osameni, Osameni woyi ko Ojoseki, Ojoseki woyi ko Ojoda; 27 Ojoda woyi ko Ojowana, Ojowana woyi ko Oresa, Oresa woyi ko Ozerubabe, Ozerubabe woyi ko Oshetiya, Oshetiya woyi ko Oniri 28 Oniri woyi ko Omeliki, Omeliki woyi ka Adi, Adi woyi ko Okosama, Okosama woyi ke Elimada, Elimada woyi ke Eri, 29 Eri woyi ko Ojoshuwa, Ojoshuwa woyi ke Eliyaza, Eliyaza woyi ko Ojorimu, Ojorim woyi ko Omatat, Omatat woyi ko Olawi, 30 Olawi woyi ko Osimo, Osimo woyi ko Oyahuda, Oyahuda woyi ki Isu, Isu woyi ko Ojonamu, Ojonamu woyi ke Eliyakim, 31 Eliyakim woyi ko Omeleya, Omeleya woyi ko Omena, Omena woyi ko Omatata, Omatata woyi ko Onata, Onata woyi ko Odawuda, 32 Odawuda woyi ko Ojese, Ojese woyi ko Obedi, Obedi woyi ko Obowaz, Obowaz woyi ko Osalimo, Osalimo woyi ko Onasho, 33 Onasho woyi ka Aminada, Aminada woyi ka Aram, Aram woyi ko Ohezero, Ohezero woyi ko Operez, Operez woyi ko Oyahuda, 34 Oyahuda woyi ko Oyakubu, Oyakubu woyi ki Ishakwu, Ishakwu woyi ki Ibirayi, Ibirayi woyi ko Otera, Otera woyi ko Onaho, 35 Onaho woyi ko Oseru, Oseru woyi ko Oreyu, Oreyu woyi ko Opele, Opele woyi ke Eba, Eba woyi ko Oshela, 36 Oshela woyi ko Okena, Okena woyi ka Arfakzad, Arfakzad woyi ko Oshem, Oshem woyi ko Onuhu, Onuhu woyi ko Olame, 37 Olame woyi ko Ometusela, Ometusela woyi ke Enoki, Enoki woyi ko Oyare, Oyare woyi ko Omahalale, Omahalale woyi ko Okena, 38 Okena woyi ke Enoshi, Enoshi woyi ko Oseti, Oseti woyi ka Adomu, Adomu woyi ko Owuso.