1 Ishini Oyesu kawela mani kweyi ni, ogo okpagye ko Okapanahu. 2 Ebeni oyole ko oteyi ka adakare na adole nu ya yimu nu ko otata ni loshu lo, oyo okwunu ki ikwu. 3 Oteyi ka adakare pwoshu ko Oyesu kweyi ota awanyakwase ka Ase ko Oyahuda oleho ebe nu, aga bo Oyesu shini nawa ngmo oshe nu. 4 Ishini awebe ko Oyesu ni, abo Oyesu ko otata kamo, <<Ongo mani ya yimu shini ongmo oyole nu, 5 ikweyi koni oya yimu ko okpagye ka aha oki me ekpa daha.>> 6 Ebeni Oyesu gbosuwa ga.

Ishini oyo pee kpo ole ni oteyi ka adakare mani ta awoya nu oleho ebe nu kamo, <<Adole, ka di iyo owe lo, koni nggye mo nnye koni oya winu kole hin ni. 7 Oza ni ya ni nmiyun mo nggye ko webe wo lo ni oma. Owoni okela kin, oyole hin ya pyo ogege. 8 Koni ami abiyun nyya abo kashe la, kpa adakare bo otu hin. Owoni nka da ashe wa mo, <Ga!> Oya ga; <Kwikye,> oya kwikye. Owoni nka do oyole hin mo, <Yoza mani,> oya ya.>>

9 Ishini Oyesu pwela mani ni, igbashi yo kwu, opyi me ewa ka asuse ni ba gboso ni, okamo, <<Nyya kadala ipu ki Izrayila nma ashishe ni gbo otuse loshu byo ongo mani lo.>> 10 Ebeni ango ni otuwo oleho ni kwikye go ole ga to oyole nu pyo ogege nu.

11 Ni Oyesu she ebeni bita ni, ogo ogya oye ni aba yogwu mo Onayi, awogboso kpe ewa ka asuse nwashika gboso. 12 Ni oyo pee kpofunu oba ko ogya ni, azo okwu ko ongo oye ni wa anu fufunu ebe ki inanu, kweyi inanu wo onyokwu. Ase nwashika bwo ogya ni gboso onya ni. 13 Ishini Adole mo onya mani ni, iyinyinyi nu yo kwu, kweyi okamo, <<Ka kyegba lo.>>

14 Ebeni oga gabo agba, kweyi awase ni hagye. Okamo, <<Isongo, nyiso!>> 15 Ongo ni gekwu mani nyiso yagye kweyi ya kela, kweyi Oyesu yo di inanu.

16 Kpiri wa oshi yuwa kwu kotata kweyi aba sho Owuso iye. Akamo, <<Inobane neshi wi ipu ka aha, Owuso wa ko wa ta awase nu abo.>> 17 Oshu ikweyi ko Oyesu ge ebebenya ipu ka okpagye ko Ojudiya kpa awogya ni yo kuwa ni.

18 Awogboso Oyohana ka da anu ojoji ni gbodagye ni. Oya ase epa ipu wa ogwu, 19 otuwo oleho ge ebe ka Adole mo, <<Awo pini wa ase ni ya wa ni la, kwe ahan gbeyi ka ashe hoha?>>

20 Ishini ango epa ni we ebe ko Oyesu ni, akamo, <<Oyohana ko yo Obatisma taha oleho ebe wo ma ahan do oka mo, <Awo pini wa ase ni yawa ni la, kwe ahan gbeyi ka ashe hoha?>>>

21 Ipu ki ishi oni Oyesu da ase nwashika ni loshu lo ni ogege kpa awine ko ose kpa awase ni gbo omaku bibi, kweyi gwo ofiyi nwashika iyi. 22 Ebeni okyogwu mo, <<Ala kwikye ga ka do Oyohana oza ni ala ma ni ki kpo oza ni ala pwo ni: Awopwiyi ba mebe, awokyikpo ba yawu; awogbose ki iyiwa pyo ogege, awodoho ba pwaha; awase ni gekwu ni ayuwa nyiso; kweyi awoleha ba pwo Oshu Neshi. 23 Otunehe yo kpase ni kwikye itikpi ikweyi kela hin lo ni.>>

24 Ni awogboso Oyohana ba she ebeni bita ni, Oyesu kwotu ko kela de ewa ka asuse ikweyi ko Oyohana mo: <<Ishini ala ge ebe ko Oyohana ododa ni oji ni ala ga ko ma? Ala ga ko ma agwu ni owu ya tuwa ni la? 25 Owoni olemani lo, oji ni ala ge ese ko ma? Ongo ni sho oshiye neneshi ni la? Aayi, awase ni ba sho oshiye neshi ni bo ole ka awose la. 26 Kwe, oji ni ala gese ko ga ma? Ala ga ko mi inobane la? Olemani, ase ni ala ge ese ko mo ni shi inobane. 27 Oyohana pini wa ase ni okpa ko Owuso ya kela ikweyi nu ya kamo,

<<<Ma, nyya to oyoleho hin oleho ya kwobonu dawo,

shini nawa kyowe gbishi wo.>

28 Nyya kadala, ipu ka asuse ni anya mani ashishe sho Oyohana lo; kwikyikyeni ase ni wo ogwejeji obula ko Owuso ni sho.>>

29 Kpiri kase, kpa awozegba, ishini apwela ko Oyesu ni, agye mo owe ko Owuso wokwokwoshi, ikweyi koni Oyohana yuwo obatisma ni. 30 Awofarisi kpa awofono ke tela ki imu no Owuso gbo da awa ni, ikweyi koni Oyohana yuwo obatisma lo ni.

31 <<Oji ni nyya mya asuse ki ishi mani kpa anu? Ale byo oji? 32 Alema bya ayileke ni bi ipishi ba yi iyiwa ogwu mo:

<<<Aha tajigwo da ala, ala tela ko gyoba, aha wigye ki ikwu da ala, ala tela ko kyegba.> 33 Koni Oyohana ko yo obatisma wa, oroza kwo ogwi inyi lo, ala kamo, <Ogbo omaku bibi.> 34 Oyi ka Asuse wa ya ro oza ya gwi inyi, ala kamo, <Oyi kinyi, oya ka awino zegba kpa awinozalabi.>>> 35 Ala ke ba gyo oziyi ko Owuso bwe ebe ka ayi nu.>>

36 Ongo ko oFarisi oye po Oyesu ko ga roza ole nu, kweyi Oyesu ga yagye ko roza. 37 Ishini onya ni wi inozalabi mani pwo mo Oyesu ya roza ole ko ongo ko oFarisi mani ni, obyo ogya ka ano kpeye, 38 Owa hagye itikpi ko Oyesu ya kyegba, ize ki iyi nu yo Oyesu ikpo gbinyi, ebeni oyi ikpo wa kpi inyeyi ki ikweyi nu, ogwi ikpo kweyi oki sha ano kpeye anu. 39 Ishini ongo ko oFarisi ni po Oyesu ni mo oza mani ni, oka ipu ko otu nu mo, <<Owoni ongo mani bi wi inobane obiya gyo onya ni ya gabo anu mani, kpe edo kase ni owe ni, owino ozalabi la.>>

40 Oyesu kyogwu mo, <<Osimo, ngbe ela oye ko ka da awo.>>

osimo ka mo, <<Ka da ami inofoza.>>

41 Oyesu kamo, <<Ango epa myore ka ashe ni ya kpase ikwiri ni. Oye myore ko odinari ogbogbo eho, oye aweho*. 42 Pepa wa gege ko sore lo, oshi ikwiri oni bita da awa. Byonabani anoho ipu wa ya yimu ko ongo mani she?>>

43 Osimo kyogwu mo, <<Ase ni myore nwashika ni.>>

Oyesu ka da anu mo, <<Okepwo neneshi.>>

44 Ebeni Oyesu pyi iyi to onya mani oka do Osimo mo, <<Omo onya mani? Ishini nwwo ole wo ni, oda ami inyawo ko nikpo lo, onya mani yumi ikpo na kpize kiyi nu oki wumikpo kpinyeyi ki ikweyi nu. 45 Ogwumi ikpo ishini nwwo ole wo ni lo, onya mani ke bwi ishini nwwa ni oyipu ko gwumi ikpo. 46 Onyuma ano ikweyi lo, onya mani ke shuma ano kpeye ikpo. 47 Ikweyi koni nyya ka da awo, ozalabi nu nwashika ayi na koni oyimu hin nwashika ni. Nyya kadala mo ase ni ozalabi nu le gbayayi ni ayi na imu nu ya le gbayayi kin la.>>

48 Ebeni Oyesu ka da nu mo, <<Ayo ozalabi wo na.>>

49 Ashishini ko ogboga ni bagye kpa awa ni kwotu ko diyiwa oka mo, <<Anu mani wa anoho ni ya no ozalabi?>>

50 Oyesu ka do onya mani mo, <<Ga kpo otu mene, otuse wo ngma awo.>>