1 Eno oye Oyesu ya fa ase oza ipu ko Ole ko Owuso, kweyi oya tono ko oshu neshi, oteyi ka awosapa kpa awofono kpa awanyakwase we ebe nu. 2 Akamo, <<Ka daha, oshu wonya ni oya ya awoza mani kpa anu, anoho da awo oshu mani?>>

3 Okyogwu mo, <<Ami ki gbo oka oye ko da ala. Ala ka da ami, 4 obatisma ko Oyohana ni oya ya ni bwi iso la kwe bwe ebe ka asuse la?>>

5 Ebeni akwotu ko tawashu kpi iyiwa mo, <<Owoni aha kamo obwebe ko Owuso la, oya ka daha mo, <Ojiya ni ala tela ko kyogwu kpa anu?>> 6 Owoni aha ke kamo obwe ebe ka asuse la, ase ba taha akyo koni akyogwu mo Oyohana wi inobane ni.>>

7 Ebeni akamo, <<Aha gye ebeni obwanu wa ni lo.>>

8 Oyesu ka da awa mo, <<Ami ke ya kadala oshu wonya ni nyyaya awoza mani kpa anu lo.>>

9 Oyesu ki kelase mani da ase mo: <<Ongo oye gbeho ki inabi, kweyi oyi da awosheho oye abo kweyi ga anu go okpagye oye ga gbeji kotata. 10 Ni ishi gye ko kyi izire ni, oto oyole nu oleho ko ga zo ogwogwa ke efu mani ebe ka awo osheho. Awo osheho mani ke gwo kweyi no abo yeye. 11 Oki to oyoleho oye oleho, oyoleho ni ke agwo kweyi gbo owuru ki ne enya kpa abo yeye. 12 Oki to oyole ko omweta oleho, kweyi ayi ibiri kweyi to we ese.

13 <<Ebeni adeho mani kamo, <Oji ni nyya ya? Nyya to oyi hin ni nyya yimu ni oleho; kwe awosheho ba mo ya gyiyi.>

14 <<Ishini awosheho ka abola mo ni, aka diyiwa mo. <Ino ro ogwu nu yoma, ala wa shan yo ngmo, shini ogwu na wa akaka aha.> 15 Ebeni ato bwo oko ko ongma we ese kweyi ayo ngmo.

<<Oji ni ala ma byo ada keho mani wa ya kpa awa? 16 Oya wa kweyi wa ya awo osheho ka abola mani yi ngmo kweyi wa ye eho ya da awashe.>> Ishini ase pwela mani ni akamo, <<Oza mani naka gbodagye lo!>>

17 Oyesu ke yi iyi kwuwa tiriri kweyi odoka mo, <<Oji wi ikweyi kela mani ni ayitota ni mo,

<<<Akyo ni awomoda tela nu ni, anu pini wo oshu kole>? 18 Ase ni gbo ikweyi ka akyo mani oya kyigbo wuruwuru, ase ni oke gboso oya yo ya gba wo omu.>>

19 Awofono kpo ose ka awosapa ba tikpo ko owe ni aba yo kwu ebebeni, ikweyi koni agye mo okelase ikweyi wa ni. Awa ke ba yoshi ka asuse.

20 Akpiyi kwo ba mo oza ni oyaya ni, asha ase ba gboso shini ana moza ni oya ya ni, awa ni wa bya ase neshi ni. Aba yimu ko kwo Oyesu kpela oye shini ana yo nabo doshu ko ogbolamaga. 21 Ebeni awase ni ashuwa ni do oka mo, <<Inofoza, aha gye mo oza ni oya ka ki ya fu ni gyogye la, oya yimu ka ashe sha ashe lo, oke ya foza ko Owuso owe ko kwokwoshi. 22 Ogyogye la shini ahan zegba do Okesa kwe ahan ka ze lo?>>

23 Oyesu ke gyo oza ni yipu ko otu wa ni kweyi oka da awa mo, 24 <<Ala shiya ami odinari. Oyi ka anoho kpi iye ka anoho yipu nu?>>

25 Akyogwu mo, <<Ko Okesa.>>

Oka da awa mo, <<Ala do Okesa oza ni wa ko Okesa, ala do Owuso oza ni wa ko Owuso.>>

26 Agege ko ze eda da anu ikweyi ko oza ni oka iyi ke ewa ni ke lo. Igbashi yuwa kwu agege kela lo.

27 Ebeni ashishini ka Awosadusi ni mo onyiso ka amiri yaba lo ni we ebe ko Oyesu wa do oka mo, 28 <<Inofoza, Omusa kamo owoni ongo gbo onya kweyi omo oyi kpa anu lo gbi ishini ogekwu, oyinanu ya doka ko onya oni shini na mo oyi da anu. 29 Ishi oye agba ayene ahapa. Akikyikyo ipu wa gbo onya kweyi mo oyi lo gbishini ogekwu. 30 Ko omwepa, 31 kpa ako omweta doka nu, mama ni kpiri wa ase ahapa gekwu ashishe wa mo oyi kpa anu lo. 32 Ogwejeji nu, onya ni gekwu. 33 Nabani onyiso ka amiri, oya wo onya ka anoho ipu wa ikweyi koni kpiri wa ase ahapa do oka nu ni?>>

34 Oyesu kyogwu mo, <<Ala ase ki ishi mani ba gba anya kweyi aba bya anya go oda oba. 35 Awase ni ke shu ko bi ipu ka awonyiso amiri abayi oyi ni yawa ni aba gba anya kwe aba byuwa go oda ba lo, 36 kweyi aba gekwu lo; koni ale bya ayoleho ni. Awayi ko Owuso, ikweyi koni awayi ko nyiso ka amiri ni. 37 Omusa ke ka gbo ipu ki igwu ki ikyashi mo awase ni gekwu ba nyiso amiri, koni oya Adole ogwu mo, <Owuso ki Ibirayi, Owuso ki Ishakwu kpo Owuso ko Oyakubu.>* 38 Owo Owuso kawase ni gekwu lalo, oke wa ka awo gbo olayi la, ikweyi koni bwebe nu kpiri wa gbolayi.>>

39 Ashishini ka awofono kyogwu mo, <<Inofoza, okela wo gyogye la!>> 40 Kweyi ado oka ko ojije kelo.

41 Ebeni Oyesu ka dawa mo, <<Aba yamoji ba ka mo Okristi* wo Oyi ko Odawuda? 42 Odawuda abiyinu ka ipu ko Okpa ki Igye mo, <<<Adole ka da Adole hin mo, <Yagye abore hin,

43 gbishini nyya ya awomonyekwotu wo ba wa wo oka ki ikpo wo.>>>* 44 Odawuda yo ogwu mo <Adole.> Bwo owe wonya ni oya wo oyi nu?>>

45 Ni ase tayayo ba pwela nu ni, Oyesu ka da awogboso mo, 46 <<Ala gbera kpa awofono! Aba yimu ko yawu kpo obagidi, kweyi ba yimu shini ana tuwo ogbogba ipishi, ana da awa oka ko yagye neshi ipu ke ekpa kpe ebe ki imya. 47 Aba ya anyokwu ole ya bize, aki ba tinarigwu gbeji. Edo kase mani aba wa kwuwe epwo ko tata.>>