1 Eno oye Oyesu ya tono okwunu kega kishu nyakwu ko Ogenesarati, ewa kasuse nwashika shogba to ba pwela ko Owuso, 2 omo owu kinyo epa hagye okwunu kega, ni awino kwebinyi shibita kweyi aba neya wa ni. 3 Ogipu kowu oye ni wa ko Osimo ni, oka danu mona sha gipu kishu nyakwu gbayayi. Ebeni oyagye ipu kowu ya fuwela ko Owuso.

4 Ishini okela kweyi ni, oka do Osimo mo, <<Yeya wo shebeni libu ni shini okwebinyi.>>

5 Osimo kadanu mo, <<Adole aba yoko kotu gbishini ebenya aha kwojije lo. Ikweyi koni oka mani ke, nyya sheya ipu kinyo.>> 6 Ishini aya mani ni, akwebinyi nwashika gbishini eya wa kwotu ko sha. 7 Ebeni aya awino kwebinyi ni bowu oye ni ogwu shini ana wa tuwabo, awa kpebinyi sho owu pepa, owu mwu gbishini akwotu ko gbobi geye kinyo.

8 Ishini Osimo Obitrus moza mani ni, okwagye obutu ko Oyesu, kweyi kamo, <<Ga sho obutu hin, Adole! Ami wine ko ozalabi la!>> 9 Igbashi yo Obitrus kpa awino kwebinyi mani kpiri yikwu ikweyi kebinyi nwashika ni akwu ni, 10 ko Oyakubu kpo Oyohana ayi ko Ozebedi mamani.

Ebeni Oyesu ka do Osimo kamo, <<Kayoshi lo; bwanani go ohobu oya kwasuse.>> 11 Ebeni apyowu wa wese kishu, asho ojoji wa kpiri bita kweyi agboso.

12 No Oyesu tayayo yipu ko ogya oye ni, ongo oye ni gbose kiyiwa ni webenu. Ishini omo Oyesu ni, ogbo okpagye ya bo mo, <<Adole, owoni okyogwu odamogege.>>

13 Oyesu ya abo so ongo mani, okamo, <<Otu hin ze, ose wo na kweyi!>> Ebebeni ose kiyiwa nu kweyi.

14 Ebeni Oyesu pyakpaha kamo, <<Kaka dashishe lo, ga shiyo dosapa, kweyi opeshi byoni ono ko Omusa ka ni, nawo oza ni ya shase mo opyo ogege.>>

15 Oshu ikweyi ko ongo mani gebebenya, kweyi ewa kasuse wa shini ana pwela nu kweyi ona ki dawo ogege wa. 16 Ishi shishini ke Oyesu ya kwikye ga yagye fufunu ya tinarigwu.

17 Eno oye Oyesu yafoza, ashishini ka Awofarisi kpa awofono, ni bwo ogya leke ko Ogalili kpo Ojudiya kpo Ojerusele ni wa bagye ebeni. Kweyi oshu ka Adole yo kpanu ko dawine kose ogege. 18 Ango oye byine kose kikpiye winyi ni gwutagye ote ni webe ko Oyesu. 19 Kweyi apyowe ko gipu kole lo, koni ase nwashika ni, kweyi atoshi giso kinu kweyi ayo sa tagye ote otutehe kewa obutu ko Oyesu.

20 Ishino Oyesu mo otuse wa ni, okamo, <<Oya hin, ayo ozalabi wo na.>>

21 Kweyi Awofarisi kpa awofono kwotu ko lo okwunu agye ba kamo, <<Anu mani wa anoho ya kela karigbetu? Anoho ke ya gege ya no ozalabi, so Owuso fufunu lalo?>>

22 Oyesu gyoza ni yipu kotu wa ni kweyi oduwoka mo, <<Ojiya ni ala ba ra mani ipu kotu kala? 23 Onya le kwe: ko kamo, <Ayo ozalabi wo na;> Kwe ko kamo, <Nyiso shini oyawu>? 24 Shini ala kegye mo Oyi ka Asuse gboshu ese mani ko no ozalabi,>> Okado inogbose kowinyi mo, <<Nka do mo, nyiso, zote wo shini ogole.>> 25 Ebebeni onyiso obutu wa, ozo ote ni ogwutagye ikweyi nu ni kweyi gole yasho Owuso iye. 26 Ananoho igbashi yuwa kwu kweyi aba sho Owuso iye. Oshi yuwa kwu kotata kweyi akamo, <<Aha moza kigbashi ikyeni.>>

27 Oyesu bose gese kweyi omino zegba oye, iye nu wo Olawi oyagye oda kozegba, Oyesu ka danu mo, <<Gbosun.>> 28 Kweyi Olawi nyiso, osho ojoji bita kweyi ogboso.

29 Ebeni Olawi byo Oyesu gole nu kweyi oyimya nyakwu danu, kweyi lewa ka awozegba kpase shishi bagye ba roza kpa awa. 30 Ashini ka Awofarisi kpa awofono ni ke bagye kpo Oyesu ni ba lokwunu agye dawogboso mo, <<Ojiya ni ala ba re ba gwa kpawo zegba kpa awinozalabi?>>

31 Oyesu ka dawa mo, <<Ase ni loshu ni ya yimu komo oloboshi lalo, ke sine kere. 32 Nwa ko yase neshi ogwu la lo; nwa ikweyi ka awine ko ozalabi shini ana shagbotu.>>

33 Ashini ka Awofarisi kpa awofono wa do Oyesu oka mo, <<Awogboso Oyohana kpa ka Awofarisi ba kwokwunu ba tinarigwu ishi kpiri, awogboso ke ba roza ba gwinyi.>>

34 Oyesu ka dawa mo, <<Kwala ma awoya koba konyape ba kwokwunu ishini oba konyape yo kpa awa ekpa ni? 35 Ishi ke ya waba ni aba yoba konyape ya bize shuwa ni. Ishi oni aba kwokwunu.>>

36 Oyesu kelase mani dawa kamo, <<Ashishe ya gege yayabo kayikyi pepe ya go kwonekye lo, koni ayikyi pepe yayo nekye yayi sha labi. 37 Kweyi ashishe ya yinyi pepe ya sheyi ko okpa nekye lo, owoni ayamani, eyi ko okpa ya kya kweyi inyi ya shonu, olemani lalo, aba yi inyi pepe ya sheyi ko okpa pepe la, shini kpiri wa naka yishi lo.>> 38 Aayi inyi pepe aba yi sheyi ko okpa pepe la! 39 Kweyi ase ni gwinyi nekye ya yimu ko pepe lo, oya kamo, <Onekye shoshi sho pepe.>