1 Eno ko Minyo oye Oyesu ya yawu ipu keho ki izire, kweyi awogboso kwotu ko kyikweyi ki izire kweyi ba ha. 2 Ashini ka Awofarisi do oka mo, <<Ojiya ni ala ba yo oza ni ono wobi ni Eno ko Minyo?>> 3 Oyesu ka da awa mo, <<Ala mo oza ni Odawuda ya ishini anu kpa awoya ki iyawu nu ba ngmemye ni lo? 4 Ogipu ko Ole ko Owuso, kweyi ga zo ikyoga ni akyanutu do Owuso, oha oza ni wo ono da awosapa ko ha kin ni. Kweyi oki yo ashishini da awoya ki iyawu nu.>> 5 Ebeni Oyesu ka da awa mo, <<Oyi ka Asuse pini wa Adole ke Eno ko Minyo la.>>

6 Eno ko Minyo oye ogipu ke ekpa Ase ko Oyahuda kweyi ya foza, ongo oye ni abo nu ka abore winyi ye ebeni. 7 Ashishini ka Awofarisi kpa awofono ba tikpo ko oza ni aba ya abo abyo shini ana kwo Oyesu epwo ni, akpiyi shagye kwe Oyesu ya da ashe ogege Eno ko Minyo. 8 Oyesu ke gyo oza ni yipu ko otu wa ni, oka do ongo ni gbose ka abo winyi mani mo, <<Nyiso shini ohagye obutu ka ananoho.>> Ebeni onyiso hagye.

9 Ebeni Oyesu duwoka mo, <<Onya shoshi ko ya Eno ko Minyo, oneshi kwe obibi, ko da ase olayi la kwe ko ya ase ngmo?>>

10 Ishino otiyi muwa kpiri ni, kweyi oka do ongo mani kamo, <<Nata ka abo wo.>> Oya mani byoni oka da nu ni, kweyi opyo oshu ka abo nu. 11 Awa ke otuwa hakyashi kweyi aba gbela kpi iyiwa ikweyi ko oza ni aba ya kpo Oyesu.

12 Eno oye Oyesu bose ga ashikwu ke efu ko tinarigwu, otinarigwu do Owuso gbi ishini ebenya. 13 Ishini ebenya ni, oya awogboso kpiri gwu kweyi oshase igwepa ipu wa kweyi yuwo gwu mo ayikoko ko Oyesu: 14 Osimo ni iye nu wo Obitrus ni, kpo oyinanu Andru kpo Oyakubu kpo Oyohana kpo Ofilibus kpo Obatolomi, 15 kpo Omatiyu kpo Otoma kpo Oyakubu oyi ka Alfayu kpo Osimo ni gbo otu dose ko okpagye nu ni, 16 kpo Oyahuda oyi ko Oyakubu ki kpo Oyahuda Iskariyoti ni yo Oyesu ra da awa ni.

17 Osa kpa ayikoko ko Oyesu nu bwi ikweyi ke efu wo okpagye. Kweyi asuse nwashika bwa agye ko Ojudiya kpo Ojerusele kpa agbabo ki ishu ko Otaya kpo Osidon, 18 wa ko wa foza fofu nu kweyi ona ki da awo ogege wa. Awase ni omaku bibi ya da awa owe ya mani ada awo ogege. 19 Kweyi ase kpiri ba yimu ko ganu abo ikweyi koni oshu ya bose bwi ikpiye nu kweyi ya da awo ogege.

20 Oyesu tiyi ma awogboso, kweyi okamo,

<<Otunehe yo kpa awoleha, koni aba pyo obula ko Owuso.

21 Otunehe yo kpa awo ngme emye byo onabani, aba yipu. Otunehe yo kpa awase ni ba kyegba byo onabani ni, aba ye eye.

22 Otunehe yo kpa ala ni asuse ba yanya kala, aki tela kala, aki sa ala esa, aki ya ala ogwu mo ala wa ase bibi, ikweyi ko Oyi ka Asuse.

23 <<Ala gyoba kpeye okwunu, koni abola kala ya nwashika ipu ki iso. Mamani pini awokyikyi wa ya kpa awinobane la.

24 <<Ebi ke yo kpa ala ni wo olodu byo onabani, koni ala kwobonu pya abola kala. 25 Ebi yo kpa ala ni yipu byo onabani, koni ala ba wa ngme emye. Ebi yo kpa ala ni ba yeye byo onabani ni, koni ala ba wa byotu kweyi ba kyegba. 26 Ebi yo kpa ala ni asuse kela neshi ikweyi kala, koni mamani pini awokyikyi kala ya kpa awinobane ko okame la.>>

27 <<Ami ke ya kadala ni ba pwun ni: yimu ka awomonyekwotu wo, kweyi yo neshi kpa awino yanya wo, 28 sa awase ni ba sesa ni aboneshi, tinarigwu da awase ni ba yo obibi ni. 29 Owoni ashe labo akpaha oye, ki pyo omwepa da anu. Owoni ashe yo oshiye kpo, ka wobi ko obagidi wo lo. 30 Ase ni do oka ko oza kpiri odanu, owoni ashe yo oza bize, ka do oka lo. 31 Oza ni oya yimu shini ase na ya dawo awo ya dawa mamani.

32 <<Owoni oyimu kawase ni ba yimu wo kin, abola nya yebe ni? Kwa <awinozalabi> ba yimu kawase ni ba yimu wa ni. 33 Kweyi owoni oyo neshi kpa awase ni ba yo neshi kin, abola nya no opye? Koni awinozalabi ba ya mani. 34 Kweyi owoni okpase ni oyo otuse mo aba sore ni oza, abola nya ye ebe ni? Kwa <awinozalabi> ba kpa <awinozalabi> oza kweyi ba yitagye shini ana suwa ore gyogye. 35 Ke yimu ko omonyekwotu wo, yo oza neshi da awa, kpa awo oza, ka yo otuse mo ana sore lo. Ebeni abola wo ya wo nyakwu, oya wo oyi ka Ada Nyakwu ki iso, koni owine ko otu mene kpa awase ni ba shotunehe ikweyi ko oza ni aya da awa lo ni kpa awine ko otu bibi ni. 36 Miyinyinyi ka asuse, byoni Ada kala wine ki iyinyinyi ni.

37 <<Ala ka kwase epwo lo, shini ana ka kwala epwo lo. Ka ya ase ishi lo, shini ana ka yi ishi lo. Yo ozalabi gbase, shini ana yo ozalabi wo gbo. 38 Dase oza, aba dala nwo owatu, si ikpokyi kweyi janu ya shonu ataku wo. Owatu neshi ni ala myiyo kpa anu da ase ni aba myiyo kpa anu ya da ala.>> 39 Oki kelase da awa mo, <<Opwiyi ya gege ya pyo ofiyi abo? Kpiri wa ba gbo go ogo lo? 40 Oyi ki inokpa ya shi inofoza lo, ase ni ke afoza neneshi ya lema byo inofoza.

41 <<Ojiya ni oya mi ikpo ki ikyashi ni yipu ki iyi ko oyene wo kweyi orela ke efu ni yipu ki iyi wo ni lo? 42 Oya ya moji ya ka do oyene wo mo, <Wa shini na ngmi ikpo ki ikyashi ni yipu kiyi wo ni kweyi awo gege ko me efu ni yipu ki iyi wo ni lo? Ala awoyoziyi, ala ngme efu ni yipu ki iyi kala ni ome, shini ala mebe neneshi ko ngmi ikpo ki ikyashi shipu ki iyi ka ayene kala.

43 <<Efu neshi ya gwa labi lo, mamani efu labi ya gwa neshi lo. 44 Aba gye efu bwe ebe ko gwogwa nu la. Aba wa aza bwe efu ki igye lo, kwe ya gege ya wa aremu bwe efu ko ofigi lo. 45 Ase neshi ela neshi ya bose bwi ipu ko otu nu la, ase bibi ela bibi ya bose bwi ipu ko otu nu. Oza ni yipu ko otu ni pini okwunu ya ka la.

46 <<Ojiya ni ala ba yumogwu mo, <Adole, Adole,> Kweyi ala ba yo oza ni nka ni lo? 47 Nyya shiya ala oza ni owe ni, kpiri kase ni pwela hin kweyi yo oko kpa anu. 48 Olema bya ase ni kwotu kole nu ikweyi ki ikyikpo ni. Ishini owu wa to ole ni, ole ke kye lo, ikweyi koni amo ole ni neneshi ni. 49 Ase ni ke pwela hin kweyi tela ko yo oko kpa anu lema bya ase ni kwotu kole nu ikweyi ki isisagye ni. Ishini owu tole ni, okye shonu kpiri.>