1 Ni ishi ki Imya kikyoga ni gbo Oyisi lo ni aba yo mo Osheyi ba pya ni, 2 kweyi awose ka awosapa kpa awofono ba tiyi ko owe ko yo Oyesu ngmo, ake ba yo oshi ka asuse.

3 Ebeni ibiri gipu ko otu ko Oyahuda ni aba yo mo Iskariyoti, oye ipu ka ayikoko ko Oyesu igwepa. 4 Oyahuda gebe ka awose ka awosapa kpa awogbeho kole ko Owuso ga gbela kpa awa ko tikpo ko owe ni oya yo Oyesu ya ra dawa ni. 5 Ashotunehe kweyi kyogwu ko da anu ikwiri. 6 Okyogwu, oya tikpo ko owe ni oya yo Oyesu da awa ishini ase baba lo ni.

7 Ishini eno gye ko ri Imya ki Ikyoga ni gbo Oyisti lo ni, eno ni aba yo oyi ko otukpo ngmo ko ri Imya ko Osheyi ni. 8 Oyesu to Obitrus kpo Oyohana oleho mo, <<Ala ga kyebetu daha ko roza ki imya ko Osheyi.>>

9 Ado oka mo, <<Ebenya ni oya yimu shini ahan ga ya ni imya mani?>>

10 Okyogwu mo, <<Owoni ala gipu ko ogya, ongo oye yawa tala kpo ogya ki inyawo, ala gboso gipu kole ni oya ga nu ni. 11 Kweyi ala ka di ine kole mo, <Inofoza mo an doka: Oda ko ogboga yini, ebeni nyya wa roza ko Osheyi kpa awogbosun ni?> 12 Kweyi oya shiya ala oda ki iso nyakwu, akyanutu kpiri. Ala yo ozarore ebeni.>>

13 Aga kweyi ga ma byoni oka da awa ni. Kweyi ayo ozarore ko Osheyi.

14 Ni ishi ya ko roza ni, Oyesu kpa ayikoko ko Oyesu bagye oka. 15 Oka da awa mo, <<Ngbeyi kishi mani gbeji wa ko roza ko Osheyi kpala ome shina mowe. 16 Nyya kadala, nyya roza mani kpa ala kelo gbi ishini ala ba wa gyikweyi nu neneshi obula ko Owuso.>>

17 Oza abwa ki inyi kweyi okeshi do Owuso kweyi kamo, <<Ala ze shini ala ko di iyi kala. 18 Nyya kadala, nyya gwinyi mani kpa ala kelo so obula ko Owuso wa.>>

19 Oki zo ikyoga, kweyi okeshi do Owuso kweyi kyigbo da ayikoko ko Oyesu mo, <<Omani pini wi ikpiye hin ni nyya ze ikweyi kala; ala bi ya mani shini ala rela hin.>>

20 Mamani ishini aroza kweyi ni oza abwa kweyi mo, <<Omani pini wa abwa ko okoyi pepe ko oyi hin ni ayi shonu ikweyi kala ni. 21 Ase ni ke ya yun ra ni ya roza kpa ami owatu oye kpo nu. 22 Oyi ka Asuse ya gekwu byoni akwobonu ka bwi ikyikyo ni, igbe ke na ta ase ni yo ra ni.>> 23 Ayole nu kwotu ko diyiwa oka mo, anoho ipu ka aha ya gege ko yo oza mani?

24 Ebeni akwotu ko shawa kpi iyiwa mo anoho ya wo oneneshi ipu wa. 25 Oyesu ka da awa mo, <<Awose ka Ashashe ba yuwa oza ko oshu, kweyi aba yi iyiwa ogwu mo ase neshi. 26 Ala ke ka lemani lo. Ase ni wa anyakwase ipu kala na zi iyinu wa ase leke, kweyi oteyi ipu kala ni zi iyinu wo oyole. 27 Anoho wo oneneshi, ase ni yo oka ni la kwe, ase ni wo oyole ni? Ami ke yagye ipu kala bya ase ni wo oyole ni.

28 Ala wa ase ni bagye kpami ishi ko omama hin ni. 29 Kweyi nyya da ala obula byoni ada hin da ami ni, 30 shini ala roza gwinyikweyi ko oka kpa ami ipu ko obula hin kweyi ala wa bagye ebe, ba kepwo ikweyi ka ayi ki ipwoma igwepa ki Izrayila.

31 <<Osimo, Osimo, Ibiri ya doka shini ana shobita na ya ala sha byo omu ni. 32 Ami ke tinarigwu da awo oSimo shini otuse wo naka gbo lo. Kweyi ishini okwikye we ebe hin, ta ayene wo otugbagba.

33 Okyogwu mo, <<Adole, ami yaba ko go oruduru, ko gekwu kpa awo.>>

34 Oyesu kamo, <<Obitrus, nyya ka da awo, obogwu ya tono ikyeni lo so tawashu igbeta mo ogyun lo.>>

35 Ebeni Oyesu duwo oka mo, <<Ishini ntala oleho mo ala ka ga kpo okyo kwe oshu ki iyo kwe okpabawu lo ni, oje nyala?>>

Akamo, <<Ojije nyaha lo.>>

36 Oka da awa mo, <<Anani owoni ala gbo okyo, ala ze, ki kpo oshu ki iyo. Kweyi owoni ala gbe ewakpa lo, ala yo obagidi kala ra shini ala re ewakpa. 37 Nyya kadala, ayitota ipu ko okpa ko Owuso mo: <Ayo ka tipu ka awinozalabi,>* nyya kadala owotiri shini awoza ni ata ikweyi hin bwa abo kawo bane kpiri na gya.>>

38 Awogboso kamo, <<Adole ma, ewakpa epa yoma.>>

Okamo, <<Ogbayi.>>

39 Oyesu bose ge Efu ko oZetu ko tinarigwu byoni owo odu nu ni kweyi awogboso byoshi. 40 Ishini ofe ebeni ni oka da awa mo, <<Ala tinarigwu shini ala ka gbo ipu ko omama lo.>> 41 Oshaga bye enu ka akyo tota kweyi ga kwagye tinarigwu mo, 42 <<Ada, owoni okyogwu, obi ya abwa ko owe mani yi bize shun, oke wi imun lalo, imu wo la ona gbodagye.>> 43 Ebeni oyoleho ko Owuso bose bwi iso kweyi to otugbagba. 44 Ikweyi koni obyotu kotata ni, obelela ko tinarigwu gbishini ehe ya shonu bwi ikpiye nu byo oyi.

45 Ishini otinarigwu kweyi ni okwikye ge ebe ka awogboso, oga ta awa ba gbola ipu ko otu byobya. 46 Oduwoka mo, <<Ojiya ni ala ba gbola? Ala nyiso shini ala tinarigwu shini ala ka gbo gipu ko omama lo.>>

47 Oyesu yipu kela ya ka, Oyahuda oye ipu ayikoko ko Oyesu nu igwepa kpe ewa ka asuse we ebe ko Oyesu. Oyahuda yawu ge ebe ko Oyesu ga to ogbogba ko oya. 48 Oyesu ke do oka mo, <<Oyahuda, oya yo Oyi ka Asuse ya ra mani la?>>

49 Ishini awogboso Oyesu mo oza ni ya gbodagye ni, aka mo, <<Adole, ahan sha ase igbo kpe ewakpa?>> 50 Kweyi oye ipu ka ayikoko ko Oyesu nu yo oshe ka anyakwase ko osapa oye akpaha ka abore ngma kpe ewakpa.

51 Oyesu ke kamo, <<Ala shibita!>> Kweyi ogabo anu akpaha kweyi da anu ogege.

52 Ebeni Oyesu ka da awose ko osapa kpa awadakare ni yo oko Ole ko Owuso kpa awanyakwase ni we ebe ko kwo ni mo, <<Ala wa kpe ewakpa kpo okposhi ko wa kwun byo nwwo owi? 53 Ishi kpiri nyyipu kole ko Owuso kpa ala, ala kwun lo? Omani ke wi ishi kala kpo oshu ke ebe dibu.>>

54 Ebeni ayo Oyesu kwu kweyi byo ge ebe ko osapa nyakwu. Obitrus gboso ebe lenu. 55 Ishini ake gwola otutehe ka akpada kole kweyi bagye ba gyola, Obitrus ya gyola kpa awa. 56 Oyole nonya oye mo Obitrus bwo oyoyu ko ola kweyi kamo, <<Ongo mani wo oye ipu wa.>>

57 Obitrus tawashu mo, <<Onya, ami gyo ongo mani lo.>>

58 Ipu ki ishi gbayayi ashe mo kweyi kamo, <<Owo oye ipu wa.>>

Obitrus kamo, <<Adole, ngyo lo.>>

59 Ipu ki ishi gbayayi, ashe ki kamo, <<Ko okwokwoshi anu mani yo kpa anu ikweyi koni owase ko Ogalili la.>>

60 Obitrus kyogwu mo, <<Adole, ngyo oza ni oya kela ikweyi nu mani lo!>> Ni otayayo ya kela ni obogwu tono. 61 Ebeni Adole pyiyi kwo Obitrus tiriri. Ebeni Obitrus rela ni Adole ka da anu ni mo: <<Ime obogwu na tono, oya tawashu hin igbeta kamo ogyun lo.>> ome 62 Obitrus sha akpada kole bita kweyi ga kyegba ko otata.

63 Awogbeho sho Oyesu enyo kpi izegwogwo. 64 Ayo oza gbiyi kweyi kamo, <<Bane daha! Anoho gwo?>> 65 Kweyi edo kesa kpiri aso.

66 Ototukpoki onongbo ka awanyakwase, awofono kpa awosapa wa gbayi, kweyi abyo Oyesu go obutu wa. 67 Akamo, <<Ka daha, awo pini wo Omezaya la?>>

Oyesu ka da awa mo, <<Owoni nka dala, ala ba kyogwu kpa ami lo, 68 kweyi owoni ndaloka, ala ba koje dami lo. 69 Bwi ishi mani go ohobu ke, Oyi ka Asuse ya yagye abore ko Owuso ine ko oshu.>>

70 Kpiri wa do oka mo, <<Awo pini wo Oyi ko Owuso la?>>

Okyogwu mo, <<Byoni ala ka ni, ami la.>>

71 Ebeni aka mo, <<Olobene koji ni aha ba yimu? Aha pwo bwo okwunu nu.>>