1 Ishini Eno ko Minyo kweyi ni, Omeremu bwagye ko Omagdalin kpo Omeremu ene ko Oyakubu kpo Osalomi ga rano kpehe shini ana ga nyo Oyesu ikpiye. 2 Ototukpokyi ke eno kikyikyo ipu ko obize, ni eno bose ni, akwowe ko gebe ka amiri 3 kweyi aba diyiwa oka mo, <<Ipu ka aha, anoho ya jo okpo sho okwunu ka amiri?>>

4 Ishini ake ziyi iso, amo okpo nyakwu mani, ayi ja go okoka. 5 Ni agipu ka amiri ni, ami isongo oye sho oshiye nehe yagye abore, ebeni oshi yuwa kwu. 6 Oka dawa mo, <<Ala ka yoshi lo, ala ba labo ko Oyesu ko Onazaret, ni ayo poshi ni. Onyiso! Oyebeni lo. Ala wa mebe ni ayo nyi ni. 7 Ala ke ga ka da awogboso kpo Obitrus mo, <Oyohobu kala ya go Ogalili oma. Ala ba ga mo ebeni byoni oka dala ni.>>>

8 Ebeni oshi yuwa kwu kweyi aba wode, abose bwa amiri kpenya. Aka da ashishe lo, ikweyi koni aba yo oshi ni.

9 Ishini Oyesu nyiso eno kikyikyo ko obize ni, ase ni mo ikyikyo ni wo Omeremu bwagye ko Omagdalin, anu ni Oyesu ngmo omaku bibi ahapa sho ni. 10 Obose ga ka dawase ni bagye kpa anu ni kweyi aba byotu ba kyegba. 11 Ishini awogboso pwo oshu ko nyiso ko Oyesu ni, akyogwu lo.

12 Ni okela kweyi ni, Oyesu ki bose dase epa gogo ishini aba yawu ogya ni. 13 Awa ni kwikye itikpi ga ka dase shishini wa, ashishe ke kyogwu kpela ni lo.

14 Itikpi ko omani, Oyesu bose wa shiyinu da awogboso igwoye ishini aba roza ni; ogbuweha ikweyi koni agbo otuse lo ni kpa akpaha zoze wa ikweyi koni atela ko kyogwu kpela kawase ni mo ni.

15 Oka dawa mo, <<Ala gipu kese kweyi, ala ga tono ko oshu neshi dasuse kpiri. 16 Ase ni kyogwu kweyi ayo obatisma aba yi gbo, ase ni ke kyogwu lo, aba danu owe. 17 Kweyi ase ni kyogwu kpami, awoza mani kpiri ba gboso: Ipu kiye hin aba ngma awomaku bibi, aba kela ipu kawose pepe; 18 aba kwegwa kpa abo; kweyi ishini agwefa oya yuwa ojije lo. Aba ya abo ya sa awase ni ba gbere ni, kweyi aba pyo ogege.>>

19 Ishini Adole Oyesu kela mani dawa ni, ayo bize giso kweyi ga yagye abore ko Owuso. 20 Ebeni Awogboso bose gese kweyi ga tono ebebe nya, kweyi Adole yo kpawa bwebe kela koka wa kpo oza ki igbashi nwashika ni aya ni.