1 Ni ayo pee kpo Ojerusele, kpo Obetafiji kpo Obetani ni afe ebe ke Efu ko Ozetu ni, Oyesu ta awogboso epa oleho mo, 2 <<Ala gipu ko ogya ni yo ohobu kala anoni, kweyi owoni ala gogya ni, ala ba mo oyi ko odagyi ni ashishe se wa lo ni togwa. Ala yiyi biwa. 3 Owoni ashe da ala oka mo, <Ojiya ni ala ba yoyi?> Ala ka danu mo, <Adole pini ya yimu la, oya kwikye anu anani.>>

4 Aga kweyi ga mo oyi ko odagyi gbogbo owofunu kole okwunu ko owe. Ni aba yo yi ni, 5 awa ase ni hagye ebeni ni duwoka mo, <<Oji ni ala baya ni, ala ba yo oyi ko odagyi yi la?>>

6 Aka da awa byoni Oyesu ka ni, kweyi awase ni shuwa bita ga. 7 Ishini abyo oyi ko odagyi wa do Oyesu ni akpo oshiye wa ta ikweyi nu, kweyi oyagye ikweyi nu. 8 Ase nwashika yo oshiye wa ta ikweyi ko owe, ashini gipu ke eho ga kye efu wa ta. 9 Awase ni bo ohobu kpa awase ni bi itikpi ni sheha mo,

<<An sho Owuso iye!>>

<<Otunehe yo kpase ni ya wa ipu ki iye ka Adole!>> *

10 <<Otunehe yo kpo obula ka ada ka Odawuda ni ya wa ni!>>

1 <<Iye shosha wa ko Owuso ni yiso!>>

11 Oyesu gogya ko Ojerusele kweyi ogo ole ko Owuso. Otiyi mo ojoji kpiri, ni eno ya sha ni obose go Obetani kpa awogboso igwepa.

12 Gbe ebenya ni aba sho ogya ko Obetani bita ni, emye ya ngmo Oyesu. 13 Omefu ko Ofigi oye ni gbefu ni ebe lenu, ebeni osha bo kwe ogbo ogwogwa. Ishini ofebeni ni, omo ojije lo sefu, koni owi ishi ko gwogwa nu lo ni. 14 Ebeni oka de efu mo, <<Ashishe ya ho ogwogwa wo kelo ko gbogbo-gbogbo!>> Awogboso pwo oza ni oka ni.

15 Ni apwo ogya ko Ojerusele ni, Oyesu gipu kole ko Owuso kweyi okwotu ko na wo riyo kya anu ra shi ipu kole. Oki ya sa abo oka ka awo shi ikwiri kpo oka ko yagye ka awo tora ko otitiribi, 16 kweyi oki wa ananoho obi ko zoje shigbo akpada kole ko Owuso. 17 Kweyi oya fa ase oza mo, <<Kwe ayi tota ipu ko okpa mo, <Aba yo ole hin ogwu mo ole ko tinarigwu ko ose kpiri.>*

Ala ke yo pya we ebe ko <teba ka awowi.>>

18 Ni awoteyi ka awosapa kpa awofono pwo mani ni, aba tikpo ko owe ko yo ngmo, aba yoshi ikweyi koni igbashi ya ase lewa kwu ikweyi ko ozafofu nu.

19 Ishini eno sha ni, anu kpa awogboso bose sho ogya ni.

20 Otukpokyi ni abose ba ga ni, ame efu ko Ofigi oni ngmongmo ko ogbogba. 21 Ebeni Obitrus ra kweyi ka do Oyesu mo, <<Adole, ma! Efu ko Ofigi ni otigbe ni ngmongmo!>>

22 Oyesu ka da awa mo, <<Ala yo otuse Owuso. 23 Nyya kadala okwokwoshi, kpiri kase ni ka de efu mani mo, <Ona shu ga gbo ipu ki ishu nyakwu,> Kweyi ogbo otu lo, oke yo otuse mo oza ni oka ni ya gbodagye, oya lemani danu. 24 Mani oni, nyya kadala, kpiri koza ni ala tinarigwu ba doka, ala yotuse mala kwobonu pye wa, kweyi oya wa kakala. 25 Kweyi ishini ala hagye ko tinarigwu kweyi ala bya ashe otu, yo ozalabi nu yi gbo shini Ada kala ni yi iso ni na yo ozalabi kala gbala. 26 Owoni oke gbase ozalabi lo, Ada wo ni yi iso ni ya yo ozalabi wo gbuwo lo.>>

27 Aki kwikye wo Ojerusele kweyi Oyesu ya yawu ipu kole ko Owuso, oteyi ka awosapa kpa awofono kpa anyakwase we ebe nu. 28 Awa doka mo, <<Kpo oshu wonya ni oya ya awoza mani? Anoho da awo oshu ko ya?>>

29 Oyesu kyogwu mo, <<Nyya da ala oka oye. Ala gyelo nyumagbo, nyya kadala kpo oshu wonya ni nyya ya awoza mani. 30 Ala ka da ami, obatisma ni Oyohana ya ni bwi iso ebe ko Owuso la kwe bwe ebe ka asuse?>>

31 Adiyiwa oka mo, <<Owoni aha kamo, <Obwi iso,> Oya daha oka mo, <Ojiya ni ala kyogwu kpa anu lo?> 32 Ake ba yoshi ko kamo, <Obwebe kasuse> koni ananoho kyogwu mo Oyohana wi inobane la.>>

33 Ebeni anyo Oyesu agbo mo, <<Aha gye lo.>>

Oyesu ka da awa mo, <<Ami ki ya kada ala kpo oshu wonya ni nyya ya awoza mani kpa anu ni lo.>>