1 Ishini Oyesu kwikye wo Okapanahu ni, ase pwo mo owole. 2 Ase nwashika wa gbayi bwi ipwole we ese gbishini ebe gyuwa lo, kweyi oya tono kela da awa. 3 Ebeni ango ene bya ashe ni winyi ni we ebe nu ikweyi ko ote. 4 Ni ama mo aba gege ko ge ebe ko Oyesu lo koni ewa shoshu ni, agwi iso ki inu kweyi yo sa wo okpagye ikweyi ko ote nu obutu ko Oyesu. 5 Ishini Oyesu mo otuse wa ni oka di ino winyi mo, <<Oyi hin, ayo ozalabi wo na.>>

6 Ashishini ka awofono ke ba kela ipu ko otu wa mo, 7 <<Ojiya ni, ongo mani ya ka mani? Oya kela ka arigbetu! Anoho ya gege ya no ozalabi? Ke so Owuso.>>

8 Ebebeni Omaku ko Oyesu ka danu oza ni yo otu wa ni, kweyi oduwoka mo, <<Ojiya ni ala ba kela mani ipu ko otu kala? 9 Onya le kwee: ko ka di ino winyi mo, <Ayo ozalabi wo na,> Kwe ko ka mo, <Nyiso, zote wo shini oyawu>? 10 Ami ke ya yimu shini ala gye mo Oyi ka Asuse gbo oshu ko no ozalabi ese mani.>> Ebeni oka di ino winyi mo, 11 <<Nka da awo, nyiso zo ote wo shini ogo ole.>> 12 Ebebeni onyiso zo ote nu kweyi yawu bwo otutehe wa ge ese. Oshi ya ananoho kwu kweyi aba sho Owuso iye ba ka mo, <<Aha moza lemani ebibye wa lo!>>

13 Oyesu ki bose ge ega ki ishu-nyakwu ko Ogalili. Ase lewa ge ebe nu kweyi okwotu ko ofu wo oza. 14 Ni oya shigbo ni omo Olawi, oyi ka Alifayu yagye oka ko zegba. Oyesu ka danu mo, <<Gbosun.>> Olawi nyiso kweyi gboso.

15 Ishini Oyesu kpa awogboso bagye ba roza ole ko Olawi ni, awozegba kpa ashini ka awinozalabi ba roza kpa anu kpa awogboso, ikweyi koni ase lewa gboso ni. 16 Ishini awofono ni wa Awofarisi ni mo ya roza dudu kpa awinozalabi kpa awino zegba ni, ada awogboso oka mo, <<Ojiya ni oya roza kpa awase mani?>>

17 Ishini Oyesu pwo mani ni, oka da awa mo, <<Awase ni loshu ni, ba ge ebe ko oloboshi lo, sa awine kere. Nwwa ela kase neneshi lalo, nke wa ikweyi ka awinozalabi la.>>

18 Awogboso Oyohana kpa Awofarisi ba kwo okwunu. Ashishini kase wa do Oyesu oka mo, <<Ojiya ni awogboso Oyohana kpa awogboso Awofarisi ba kwo okwunu, awogboso ba kwo okwunu lo?>>

19 Oyesu kyogwu mo, <<Awoya ko oba onyape ba gege ko kwo okwunu ishini oba ko onyape yo kpa awa ekpa ni? Aayi! Aba gege ko kwo okwunu ishini oba ko onyape yo kpa awa ni lo. 20 Eno ya wa ba ni aba yo oba onyape ya bize shuwa, bwi ishi oni aba kwo okwunu.

21 <<Ashishe ya gege ya yabo ka ayikyi pepe yago bo onekye lo. Owoni oya mani, opepe ya sha sho onekye kweyi oshosha nu ya labi. 22 Kweyi ashishe ya gege ya yi inyi pepe ya she eyi ko okpa nekye lo. Owoni aya mani, eyi ko okpa ya kya kweyi inyi ya shonu. Olemani lalo, aba yi inyi pepe ya she eyi ko okpa pepe la shini kpiri wa naka yishi lo.

23 Eno ko Minyo oye, Oyesu ya yawu ipu ke eho anu kpa awogboso kweyi emye ya ngmuwa, kweyi adri ikweyi ki izire. 24 Awofarisi ka danu mo, <<Ma, ojiya awogboso ba yoza ni ono ka Ase ko Oyahuda mo oshoshi ko ya Eno ko Minyo ka aha lo?>>

25 Oka da awa mo, <<Ala mo oza ni Odawuda kpa awoya ki iyawu nu ya ishini emye ya ngmuwa ni lo? 26 Ishini Abiyata wo oteyi ka awosapa ni, Odawuda go Ole ko Owuso ga ho ikyoga ni akyanutu da awosapa kin ko ha. Kweyi oyo shishini yi da awoya ki iyawu nu.>>

27 Ebeni oka da awa mo, <<Aye Eno ko Minyo da asuse la, aya asuse de Eno ko Minyo lalo. 28 Mani oni, Oyi ka Asuse wa Adole ke Eno ko Minyo la.>>