1 Oyesu ki kwotu ko foza okwunu ki ishu nyakwu. Ebeni ewa ka asuse wa gbayi obutu nu kweyi ogipu ko owu ga yagye, kweyi kpiri ke ewa mani hagye okwunu ki ishu. 2 Kweyi ofuwoza nwashika ipu kelase. 3 Okamo, <<Osheho oye gebe ko myi izire eho nu, 4 Ishini oya myi izire ni, ashini ki izire shonu okoka ko owe, ebe ni ano wa yi kpo re. 5 Ashishini shonu ebe ni gbo okpo ni, kweyi abwu papa ikweyi koni agba agye nwashika lo ni. 6 Ishini eno ke si izire ni, angmongmo, ikweyi koni agbo ogba lo ni. 7 Ashishini ki izire shonu ipu ki igye, kweyi igye gye yuwa bya, kweyi agwa lo. 8 Ashishini shonu ipu ka agye neshi, agye kweyi mi izire, ashini ma aweta, ashini ma awehiri kpo ogbogbo oye, ko oza ni otu ni.>>

9 Ebeni okamo, <<Ase ni gba akpaha ko pwo ona pwo.>>

10 Ishini Oyesu yagye fufunu ni, ayikoko ko Oyesu Igwepa kpase shishini wa doka ki ikweyi kelase nwashika ni oka ni. 11 Okyogwu mo, <<Oza gyogye ko Obula ko Owuso ni teba ni ayi gwa da ala. Awase ni ke bi ipu kala lo, ojoji kpiri aba ka da awa ipu kelase 12 shini,

<<Aba ma, ake ba gye lo;

aba pwo, ake ba gyo oza ni apwo ni lo;

shini ana ka shagbotu lo, kweyi ana ka yo ozalabi wa na lo.>>>

13 Ebeni Oyesu ka da awa mo, <<Owoni ala gyikweyi kelase mani lo, onya ni ala ba gye ke? 14 Edo ki izire ni osheho myi ni we ela ko Owuso. 15 Izire ni shonu ikweyi ko owe oni lema bya ase ni pwe ela ko Owuso, ebebeni Ibiri ke wa yela ni yi bize shi ipu ko otu nu. 16 Mamani, izire ni shonu ikweyi ko okpo ni lema bya awase ni pwe ela ko Owuso kweyi ze kpo otunehe. 17 Ikweyi koni ogba wa gagye lo ni, aha gye gbeji lo. Akwikye itikpi ishini owe kwe egye kela ko Owuso ta awa ni. 18 Izire ni shonu ipu ki igye ni lema bya ase ni ya pwe ela ko Owuso ni, 19 kweyi otu byobya ko oyagye kese mani kpe egya ko odu kpi imu ko oza shishini yo otuwa bize she ela ko Owuso. Mani oni, izire ni ke ma lo. 20 Izire ni shonu ikweyi ka agye neshi ni lema bya awase ni pwe ela ko Owuso ko otata kweyi akyogwu kpa nu. Mani oni, ashini mi izire ikpo aweta, ashini ma awihiri, ashini mo ogbogbo oye.>>

21 Oyesu ka da awa mo <<Ase ya kwo ola ikwomu ya heye ko ogwugwu? Aba yi hi ikweyi ko oka la shini na yu da ananoho ipu kole. 22 Oza ni teba kpiri, aba yi fu te ese, oza ni gwogwu kpiri aba yi gwa. 23 Ase ni gba akpaha ko pwo ona pwo.

24 Oki ka da awa mo, <<Ala pwo. Owatu ni ala myiyo kpa anu ni, anu pini aba mya kpa anu da ala, ki she mani. 25 Ase ni gbo oza aba fu manu danu, ase ni gbo lo, kwo oza ni ogbo gbayayi ni aba yi bize sho.

26 Oyesu ki kamo, <<Obula ko Owuso lema byo osheho ni myi izire eho nu ni. 27 Ke eno ko otu, ko ogbola kwe oyiyi, izire ya gye, anu abiyinu ke gyo oza ni yo ya gye ni lo. 28 Agye mi izire abiyinu, kikyikyo wo obwobwu, kweyi oyikweyi, kweyi ti ikpo neshi. 29 Ishini izire ze ni osheho wa yi gwu kpo okenge, koni ishi ko kyi izire ya ni.>>

30 Oyesu kamo, <<Oji ni nyya kamo obula ko Owuso le bya anu? Elase wonya ni nyya ka ikweyi nu? 31 Olema byo ikpo ko omusta, ni ayi tu eho ni. Ikpo nu wo nyonye ipu ki izire kpiri ni atu agye ni. 32 Owoni ogye, oya gyokwu ya shi izire wonyonya ipu ke eho; kweyi ya we efu ni ano ni biso ni ba lo ole ayabo nu. 33 Oyesu kela ko Owuso da awa kpe elase nwashika byo omani ni aba gege ko gyikweyi nu ni. 34 Oyesu kela kpiri da ase ipu kelase. Ishini oke yo fufunu kpa awogboso ni, kweyi ogwi ikweyi ko ojoji kpiri da awa.

35 Ni eno sha ni, Oyesu ka da awogboso mo, <<Ahan sheyi go gbeyi.>> 36 Ashe ewa bita gipu ko owu ki inyo kweyi akwotu ki iyawu. Owu ki inyo shishini gbosuwa. 37 Ebeni owu loshu nyiso ishu, ebe ni owu ni ta kpo ogwa ki inyo ya yimu ko yo owu bya. 38 Oyesu ya gbola, itikpi ko owu yi kweyi nu so Otinti. Awogboso shiyi kamo, <<Adole, inyo ya yaha re, obyo otu lo?>>

39 Ebeni Oyesu nyiso kweyi, okela do owu kpo ogwa ki inyo mo, <<Sha! Hagye!>> Ebeni owu hagye kweyi ebe ka agye. 40 Oka da awogboso mo, <<Ojiya ni ala ba yoshi? Kwikyikyeni ala gbo otuse lo la?>>

41 Ebeni oshi yuwa kwu. Aba diyiwa oka mo, <<Ongo mani wa anoho ome ni owu kpo ogwa ki inyo ba pwe ela nu?>>