1 Awofarisi kpa ashini ka awofono ni bwo Ojerusele ni wa gbayi obutu ko Oyesu kweyi, 2 ama awogboso ba roza kpa abo <<Hirinyi,>> ana abo byoni odu ka aha ka ni lo. 3 Awofarisi kpa Ase ko Oyahuda ba roza lo, sa ayo odu ka abo nona, ikweyi koni aya abo byo odu ka anyakwase ni. 4 Ishini abwi ipishi wo ole, sa ana abo ome aba roza la. Aba gboso odu nekye nwashika byo owatu nona, kpe eyi, kpo ogwudu.

5 Awofarisi kpa awofono do Oyesu oka mo, <<Ojiya ni awogboso ba gboso odu ka anyakwase lo? Aba roza kpa abo <Hirinyi,> Ana abo byoni odu ka aha ka ni lo.>>

6 Okyogwu mo, <<Ishaya ko okwokwoshi ishini obane ikweyi kala awo byiga byiwa byoni ata ni mo,

<<Awase mani ba kelan okwunu kin la,

otuwa ke lenu kpa ami.

7 Aba geyagye da ami yeye kin la,

oza fofuwa wo ono ka asuse mo wa ko Owuso.>*

8 Ala sho ono ko Owuso bita, kweyi ala ya abo byo odu ka asuse.>>

9 Kweyi Oyesu ka da awa mo, <<Ala ma mo ala gbo owe neshi ko yo ono ko Owuso to okoka ikweyi ko odu kala! 10 Omusa kamo, <Geyagye da ada wo kpe ene wo,>* Kweyi <Ase ni sa ada nu kwe inanu esa owo otiri shini ana yo ngmo.>* 11 Ala ke kamo owoni ase ka da ada nu kwe inanu mo, <Kpiri ko oza ni ala bi ba pye ebe hin ni, nkwobonu gbomu ko yi do Owuso wa,> 12 Ebeni ala shobita yo oza da ada nu kpi inanu kelo. 13 Bwebe ko omani ala yela ko Owuso yi tokoka ikweyi ko odu kala ni ashibita tagye da ala ni. Kweyi ala ya awoza nwashika mani.>>

14 Oyesu ye ewa ka asuse kpiri ogwu we ebe nu kweyi ka da awa mo, <<Ala ya akpaha tagye shini ala pwo, kpiri kala shini ala gyo oza mani. 15 Oza ni bwe ese gipu kase pini ya ya ase ya <Kyinyi> lalo, ke so oza ni bwi ipu kase we ese ni pini ya ya ase ya <Kyinyi> la. 16 Ase ni gba akpaha ko opwo, ona pwo.*>>

17 Ishini oshe ewa bita gipu kole ni, awogboso ga do oka ki ikweyi kelase. 18 Oduwoka mo, <<Ala wi ikyo la? Oza ni bwe ese gipu kase ya yo ya <Kyinyi> lo ala gye lo? 19 Ikweyi koni ogipu ko otu nu lalo, ke yipu nu kweyi ya bose ikpiye nu.>> Bwe ebe ko omani Oyesu mo ozarore kpiri yo sere.

20 Oki kamo, <<Oza ni bwi ipu kase we ese pini ya yo ya <Kyinyi> la. 21 Koni kpiri ko oza ni ase ya ka bwi ipu ko otu kase byela bibi, kpe eba, kpo owi, kpo ngmase, 22 kpa afu, kpo otu labi, kpe egya, kpa agbaza, kpa anya, kpi ishi yoya, kpo ki iyo, kpi ikyo. 23 Kpiri ka awozalabi mani bose bwi ipu ko otu kweyi ya ase ya <Kyinyi.>>

24 Bwe ebeni Oyesu nyiso go okpagye ko Otaya kpo Osidon. Ogipu kole oye, kweyi oya yimu shini ashishe naka gye lo; oke gege yi iyinu teba lo. 25 Ebebeni onya oye ni oyi nu gbo omaku bibi ni pwe ela ko Oyesu ni, owa gbo obutu nu. 26 Onya ni wa ase ko Ogirik, amo Osiriya okpagye ko Ofinikiya. Obo Oyesu mo ona ngmo omaku bibi shi ikpiye ko oyi nu.

27 Oka danu mo, <<Sha ayeke bita na ro oza yipu ome, ikweyi koni oya shoshi shini ana yo ozarore ka ayi shagye di iwo lo.>>

28 Onya ni kyogwu mo, <<Olemani Adole, iwo ke ba roza ni shonu bwabo kayi ni.>>

29 Ebeni oka danu mo, <<Ikweyi koni okyogwu mani ni, kwikye gole, omaku bibi sho oyi wo bita wa.>>

30 Ogo ole ga to oyi nu gwutagye ogwudu, omaku bibi bose sho.

31 Ebeni Oyesu sha agye ko Otaya bita kweyi bwo ogya ko Osido gi ishu ko Ogalili kweyi ga agbabo ko Odikapoli. 32 Ebeni abyo ongo oye ni wo odoho oki ya shigwu ni wa do Oyesu abo mo na sa aboneshi eyi.

33 Obyo go okoka sho otutehe ke ewa kweyi ya abo nu la akpaha kweyi otehe kweyi oga anu abo igbenu. 34 Oyesu ngiyi iso kweyi ogbo layi faa, kweyi ka danu mo, <<Ifata!>> Ikweyi nu wo, <<Gwa!>> 35 Bwebe ni akpaha ko ongo ni gwa, Igbenu nu ra kweyi okwotu ko kela neneshi.

36 Oyesu pyuwa akpaha mo ana ka ka da ashishe lo. Oya wuwobi ko ka, awa ke ba go ohobu ko ka. 37 Ase nwonwu kpi igbashi. Kweyi akamo, <<Oyo ojoji kpiri neshi, ko odoho oyo pwaha, awo kyigbenu oyuwa kela.>>