1 Oyesu she ebe ni bita kweyi anu kpa awogboso kwikye gogya nu, Onazaret. 2 Eno ko Minyo, okwotu ko foza ekpa, kweyi igbashi yo kpiri kawase ni pwo ni yi kwu.

Kweyi adiyiwa oka mo, <<Ebenya ni ongo mani pyo oza mani. Ebenya ni opyo oziyi kpa awoza ki igbashi ni oya ya mani?>> 3 Anu mani wi ino gwinu lalo? Inanu pini wo Omeremu lalo? Ayinanu pini wo Oyakubu kpo Isu kpo Oyahuda kpo Osimo lalo, ayinanu nonya bagye kpa aha na lo?>> Kweyi otu wa bya kweyi atela ko kyogwu kpa anu.

4 Oyesu ka da awa mo, <<Aba mi inobane gyiyi ebebe nya, ogya nu kpi ipwole nu ke aba mo gyiyi lo.>> 5 Ogege yo oza ki igbashi oyoye ebe ni lo, sa ase gbayi ni loshu lo ni osuwa abo kweyi apyo ogege. 6 Kweyi igbashi yo kwu ikweyi koni agbo otuse lo ni.

Ebeni Oyesu bose gogya kweyi ya foza. 7 Oya awogboso igwepa ogwu kweyi otuwo oleho epepa, oda awoshu ko ngma awomaku bibi.

8 Oka da awa mo, <<Ala ka byo ojije ki ikpo ki yawu lo, so okposhi. Ala ka byo ikyoga kwe oshu, kwe ikwiri lo. 9 Ala lo okpabawu, ala ke ka byo oshiye epa lo. 10 Ole ni ala ganu kpiri ala banu gbi ishini ala she ebe ni bita. 11 Kweyi ebe ni ala ga kweyi atela ko ya ala omaba kwe atela ko pwo ono totu kala, ala gwo omula ka apatikpo kala she ebe ni ishini ala ba she ebe ni bita, shini na wo olobene ikweyi wa.>>

12 Ebeni abose gese ga tono mo ase na shagbotu. 13 Angmo omaku bibi nwashika, kweyi anya awine ke ere ano kweyi ada awo ogege.

14 Ose Ohiridus pwo oshu mani, koni ase nwashika gyo Oyesu ni, ashini kase kamo, <<Anu mani wo Oyohana ine ko Obatisma ni gekwu ni pini nyiso ikwu la, oza ni ya ni oya ya awoza ki igbashi mani ni oma.>>

15 Ashishini mo, <<Owi Iliya.>> Kweyi ashini mo, <<Owinobane byo oye ipu ka awinobane nekye.>>

16 Ishini Ohiridus ke pwe ela mani ni okamo, <<Oyohana ni nyyikweyi ngma ni nyiso ikwu!>>

17 Ikweyi koni Ohiridus abiyinu kwobonu ta adakare oleho mo ana yo Oyohana yi gbo kweyi yo to oruduru. Ohiridus ya mani shini ona sho Ohiridiya, onya ko oyinanu Ofilibus, ni odoka ni otu. 18 Ishi oni Oyohana ya ka do Ohiridus mo, <<Oshoshi koni oya zo onya ko oyinawo gbo lo.>> 19 Ohiridu yo Oyohana bi otu kweyi ya tiyi ko owe ko yo ngmo. Oke gege lo, 20 ikweyi koni Ohiridus ya yoshi ko Oyohana kweyi ya gbo gbogbo koni ogye mo owase neshi ni. Ishini Ohiridus pwela ko Oyohana ni otu nu bya kotata, kwikyikyeni oki gbi imu ko pwela nu.

21 Ogwejeji, Ohiridiya pyo owe eno ki imya ko omoma ko Ohiridus. Ohiridus yi imya da awonongbo kpa awoteyi ka adakare kpa anyakwase ko Ogalili. 22 Ishini oyi ko Ohiridiya gyoba ni, oyo otu ko Ohiridus kpa awase ni opawa ko roza ni sha.

Ebeni ose ka do oyi nonya oni mo, <<Kpiri ko oza ni odoka nyya da awo.>> 23 Oshokoyi kpo ene gwogwa danu mo, <<Kpiri ko oza ni odoka nyya da awo, kwo obula hin nyya yi kepa kpa awo.>>

24 Oge ese ga di inanu oka mo, <<Oji ni nyya doka?>>

Inanu mo, <<Ikweyi ko Oyohana ine ko Obatisma.>>

25 Ebebeni oyi nonya ni ge ebe ko ose kpo oza ni oya yimu ni mo, <<Nyya yimu shini oda ami ikweyi ko Oyohana ine ko Obatisma ipu ko okpa.>>

26 Ebeni otu ko ose bya kotata ikweyi koni ogwene obutu ka awogboga ni, oya yimu ko wobi lo. 27 Ebebeni ose zoko da adakare nu mo ona ga bi ikweyi ko Oyohana wa. Oga yo Oyohana ikweyi ngma ipu ko oruduru. 28 Abi ikweyi nu wa ipu ko okpa. Oyi do oyi nonya ni, kweyi obi ga yi di inanu. 29 Ishini awogboso Oyohana pwela mani ni, aga yo okwu nu yi bize ga yi nyi.

30 Ebeni ayikoko ko Oyesu gbayi obutu nu kweyi ka danu oza ni aya ni kpiri kpo oza ni afu ni. 31 Ebeni ase nwashika ba wa ba ga kweyi agbi ishi ko roza lo, oka da awa mo, <<Ala ka ami wa shan ge ebe ni aba ga minyo ni.>>

32 Ebeni abose gipu ko owu kweyi ge ebe ni gba ashishe lo ni. 33 Awase ni ke muwa ishini aba ga ni anyinya ki ikpo gbosuwa bwo ogya, bwo ogya kwobonu da awa. 34 Ishini Oyesu sa ni ome ewa ka asuse tukpa, iyinyinyi wa yo okwu, ikweyi koni omuwa lema byo obize ni gbase ko gbeho wa lo ni. Ebeni okwotu ko fuwa oza nwashika.

35 Ni eno sha ni, awogboso wa ka danu mo, <<Ebeni wi ikyashi, otu ya bi wa. 36 Ya awase mani na gipu ka awogya kpa ada ga ro ozarore abiyiwa shini ana re.>>

37 Okyogwu mo, <<Ala da awa oza na re.>>

Aka da nu mo, <<Ahan ga ro ikyoga ki ikwiri ni awo yo oko ka abola ba pye oya ahata ni wa da awa?>>

38 Oduwoka mo, <<Ikyoga ema ni ala gbo? Ala ga ma.>>

Ishini aga ma ni, aka mo, <<Ikyoga eho kpe ebinyi epa.>>

39 Ebeni Oyesu ka dawa mo ana yase na bagye ikpo, ikpo ikweyi ki ikyashi. 40 Abagye, ikpo, ikpo kase ogbogbo oyoye, kpase awaweho. 41 Ozo ikyoga eho kpe ebinyi epa kweyi otiyi mi iso, okeshi do Owuso kweyi oyiko da awogboso kweyi awogboso da ase. 42 Kpiri wa ha yipu. 43 Awogboso kpo shishini ko ikyoga kpe ebinyi nwo ogwugwu igwepa. 44 Ewa kase ni ho oza ni wa ango okpakwu eho.

45 Ebebeni oka da awogboso mo ana gipu ko owu shini ana kwobonu danu sheyi go Obetseda, anu ke na ye ewa ka asuse na ga wa ome. 46 Ishini oshu wa bita ni, ogi ikweyi ke efu ga tinarigwu.

47 Ni eno sha ni, owu yo otutehe ki ishu nyakwu, kweyi sha anu fufunu hagye okpagye. 48 Ebeni oma awogboso ba nonu kpo owu kpo ogwa ki inyo ya pyuwa. Abo ko ogye ene ko otu, oyawu we ebe wa ikweyi ki inyo. Oya yimu ko shigbo gwuwa ta, 49 ni amo yawu ikweyi ki inyo ni, ama byo owo oyi la. Angme egba, 50 ikweyi koni amo ni oshi yuwa kwu.

Ebebeni oka da awa mo, <<Ala gbotu gbagba! Ami la. Ala ka yoshi lo.>> 51 Ebeni oto gipu ko owu kpa awa, kweyi owu ni ya ta ni ka agye. Igbashi yuwa kwu, 52 ikweyi koni agyo oza ni gbodagye ikweyi ki ikyoga ni lo, koni ikweyi wa lenu ni.

53 Ishini ashigbo ge ese ko Ogenesaret ni, ayo owu gbo okwunu ke ega. 54 Ishini abose ipu ko owu ni ebebeni ase mo Oyesu kweyi gye. 55 Anyinya ga agbabo ko okpagye kpiri kweyi ga bya awine ke ere ikweyi ko ote ge ebe ni apwo mo oya nu ni. 56 Kweyi ebe ni oga, ogya leke kpo nyakwu, kwe ada, abya awine ke ere gi ipishi. Aba bo mo kwa ko shuwa bita na gabo akpaha ko oshiye nu kin, kweyi kpiri kawase ni gabo oshiye nu pyo ogege.