1 Kweyi oka da awa mo, <<Nyya kadala okwokwoshi, ashini kase hagye ebeni ba, aba gekwu lo gbi ishini aba mo obula ko Owuso wa kpo oshu.>>

2 Itikpi ke eni ihiri Oyesu zo Obitrus kpo Oyakubu kpo Oyohana kweyi byuwa gi iso ke efu jigiri awa fufuwa. Ebeni ikpiye ko Oyesu pya gogo obutu wa, 3 oshiye nu pya wo onehe purututu, sho oza ni shehe ese mani kpiri. 4 Kweyi Iliya kpo Omusa bose ba kela kpo Oyesu.

5 Obitrus ka do Oyesu mo, <<Inofoza, oshoshi ni aha be ebeni ni. Ahan gwa adaba eta ebeni, oye wa akako wo, oye wa ko Omusa, oye wa ki Iliya.>> 6 Oshi yuwa kwu, kweyi ogyo oza ni oya ka ni lo.

7 Ebeni akpa yuwa gwu, kweyi oko kela bwi ipu ka akpa ya kamo, <<Omani wo Oyi hin moshi ni nyya yimu ni. Ala pwela nu!>>

8 Ebebeni apyiyi, ama ashishe kpawa kelo so Oyesu.

9 Ni aba sa bwi iso ke efu ni, Oyesu pyuwa akpaha mo, ana ka ka da ashishe oza ni ama ni lo, so Oyi ka Asuse nyiso ikwu. 10 Ayela ni bi ipu ko otu wa kweyi aba diyiwa oka mo, <<onyiso ikwu wo oji.>>

11 Kweyi ado oka mo, <<Ojiya ni awofono ba kamo owotiri shini Iliya na wa ikyikyo?>>

12 Oyesu kyogwu mo, <<Kotata, Iliya ya wa ikyikyo, kweyi wa kyo oza kpiri yatu. Ojiya ni ake kwobonu yi tota mo, Oyi ka Asuse ya wa mowe kotata abo wa, kweyi aba tela nu? 13 Ami ke ya kadala, Iliya kwobonu wa wa, agyo lo, kweyi ayo oza ni aba yimu ni, byoni ayitota ikweyi nu ni.>>

14 Ishini awe ebe ka ashini ka awogboso ni, ame ewa ka asuse shogba tuwa kpa awofono ba ta awashu kpa awa. 15 Ni ewa ka asuse mo Oyesu ni igbashi yuwa kwu kotata kweyi anyinya ga to ogbogba.

16 Oduwoka mo, <<Ala ba ta awashu kpa awa ikweyi ko oji?>>

17 Ongo oye ipu ke ewa kamo, <<Inofoza, nbyo oyi hin ni gbo omaku bibi ni ya wobi ko kela lo ni wa da awo. 18 Kpiri ki ishini okwo, oya gwo gbo, kweyi okwunu nu ya kyowu kweyi ya hahanu oki ya ngmongmo kwakya. Nba awogboso ake gege ko no omaku bibi oni enya lo.>>

19 Oyesu ka da awa mo, <<Ala awine ko otuse gbayayi ki ishi mani, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Ala byo we ebeni wa da ami.>>

20 Kweyi abyo wa danu. Ishini omaku bibi mo Oyesu ni, ebebeni oyo gwo gbo ya ja okpagye kweyi okwunu nu ya kyowu.

21 Oyesu da ada ko oyi mani oka mo, <<Ose mani kwo gbeji wa?>>

Ada nu kamo, <<Bwi ishini owo oyi leke ni. 22 Ishini okwo kpiri oya yo ta go ola kwe inyo ko yo ngmo. Owoni oke ya gege, miyinyinyi ka aha shini otahabo.>>

23 Oyesu ka da nu mo, <<Ojiya ni omo owoni oya gege?> Ojoji ya le kwee da ase ni yo otuse ni.>>

24 Ebebeni ada ko oyi mani kamo, <<Nyyo otuse, otuse hin pa nwa lo, fu manu da ami!>>

25 Ishini Oyesu me ewa ba we ebeni ni, oka do omaku bibi mo, <<Awo omaku ko odoho kpo okyi igbenu, nyya ka da awo, bose sho, ka kwikye gi ikpiye nu ke lo.>>

26 Omaku bibi sheha, kweyi ja oyi mani ko otata ime obose sho. Oyi oni tagye byo okwu kweyi ase nwashika ba kamo, <<Ogekwu.>> 27 Oyesu ke bya abo kweyi nga anu hagye kpi ikpo nu, kweyi ohagye iso.

28 Ishini Oyesu gi ipwole ni, awogboso ga ta anu fufunu kweyi do oka mo, <<Ojiya ni aha gege ko ngmo omaku bibi shi ikpiye ko oyi oni lo?>>

29 Oka da awa mo, <<Edo ko omaku bibi mani ba bose kin lo, si inarigwu kpo kwo okwunu.>>

30 Oyesu kpa awogboso she ebeni bita kweyi abwa agye ko Ogalili. Oya yimu shini ashishe na gye ebeni aba anu ni lo, 31 ikweyi koni oya fa awogboso oza ni. Oka da awa mo, <<Aba yo Oyi ka Asuse ya ra da asuse. Aba yo ngmo, kweyi itikpi ke eno ko omweta Owuso ya yo ya nyiso ikwu.>> 32 Awa ke gyikweyi kela ni oya ka ni lo, aba yoshi ko do oka.

33 Ishini Awo Okapanahu ni, oduwoka ipu kole ni aba nu ni mo, <<Awashu wonya ni ala ba ta owe oni?>> 34 Abagye kpo, koni agye mo awa tawashu ikweyi ko kamo anoho ya wo neneshi ni.

35 Ni abagye ni, Oyesu ya awogboso igwepa ogwu kweyi ka da awa mo, <<Kpiri kase ni ya yimu ko wa kikyikyo, owotiri koni oya wa ko gwejeji kweyi ya wo oyole ka ananoho.>>

36 Oyo oyi leke oye ogwu wa hagye otutehe wa. Oyo sakya kweyi ka da awa mo, 37 <<Kpiri kase ni yo oye ipu ka ayi leke mani omaba ipu ki iye hin, ami pini oyumo omaba oma, kweyi kpiri kase ni yumo omaba, ami pini oyumo omaba lalo ke wa ase ni tumoleho ni.>>

38 Oyohana kamo, <<Inofoza, aha ma ashe ya no omaku bibi enya shi ikpiye kase ipu ki iye wo, aha kamo ona shi bita ikweyi koni owo oye ipu ka aha lo ni.>>

39 Oyesu ka danu mo, <<Ala ka wo obi lo. Kpiri kase ni yo oza ki igbashi ipu ki iye hin, go ohobu oya ko obibi ikweyi hin lo, 40 kpiri kase ni tela ka aha lo, oyo kpa aha la. 41 Nyya kadala okwokwoshi, kpiri kase ni da ala abwa ki inyo ipu ki iye hin koni ala wa ko Okristi ni abola ya nyo lo.

42 <<Kweyi kpiri kase ni yo oye ipu ka ayi leke mani ni kyogwu kpa ami ni yo ozalabi, oya shoshi she danu oni shini ana ye ego nyakwu gbo bo oko kweyi yo ta gi ishu nyakwu. 43 Owoni abo wo yayo ya yozalabi, yigo tonu. Oya shoshi she shini opyo olayi ko gbogbo-gbogbo kpa abo oye gogo sho oni oya gba abo epa kweyi ayo ta go ole ko ola, 44 ebeni iyu ni ba ho okwu wa ni ba gekwu lo, kweyi ola ni ya yuwa ni ya gbo omyomyi lo.* 45 Kweyi owoni ikpo wo ya yo ya yo ozalabi, yigo tonu. Oya shoshi she shini opyo olayi ko gbogbo-gbogbo kpi ikpo gogo sho oni oya gbi ikpo epa kweyi ayo ta go ole ko ola, 46 ebeni iyu ni ba ho okwu wa ni ba gekwu lo, kweyi ola ni ya yuwa ni ya gbo omyomyi lo.* 47 Kweyi owoni iyi wo ya yo ya yo ozalabi, yi ngma tonu. Oya shoshi she shini ogo obula ko Owuso kpi iyi oye ya sho oni oya gbi iyi epa kweyi ayo ta go ole ko ola,

48 ebeni iyu ni ba ho okwu wa ni ba gekwu lo,

kweyi ola ni ya yuwa ni ya gbo omyomyi lo.*

49 Aba ma ananoho ma kpo ola.

50 <<Onwa shoshi, owoni onye ko onwa ke nyeba, oki ya wo onwa ke? Ala wo onwa la, ala gbo otu mene kpi iyi kala.>>